San Pra ai Abraham, Isak hte Yaku Ni a Poi Nhtoi (December 20) 20 December 2022

San Pra ai Abraham, Isak hte Yaku Ni a Poi Nhtoi (December 20)

Ji Abraham gaw, Madu Yesu Hkristu shing gyim masha atai garai n sa la shi ai shawng BC (2000) hta sak hkrung nga lai wa sai. Shi a Kawa gaw, Thare rai nga ai. Shi gaw, Hkade amyu hpan ni a ginra rai nga ai Ur Buga hpe tawn kau da nhtawm, Haran Buga de sa htawt nga mat ai. Kashu kasha ni panglai makau na zaibru zawn mayat maya wa na, nga nna Karai Kasang mang gala jaw ya ai majaw, Hkanan mung de bai htawt nga mat ai.

Karai Kasang gaw, Abraham hpe grai tsawra wu ai. Dai majaw, shi a kashu kasha ni hpe lamu hpung tang kaw na shagan ni zawn shalaw jahtam ya na, nga nna ga ndat da wu ai. Abraham hte madu jan Sa-ra gaw, asak grai kaba mat ai hpang, Karai Kasang ga ndat da ai hte maren, kasha Isak hpe shangai shaprat la lu ma ai.

Abraham a Karai Kasang a ntsa kamsham ai myit kade daram kaba ai lam chyam yu na matu, Karai Kasang gaw, Abraham hpe Shi a kasha shingtai Isak hpe hkungga nawng jau yak au na matu tsun wu ai. Abraham mung, Karai Kasang matsun ai hte maren kasha shingtai Isak hpe hkungga nawng jau kau na nga nna shi a lata hte sharawt dat ai. Dai shaloi Lamu Kasa langai mi gaw, Abraham a lata hpe hkap magra da wu ai. Ndai zawn Abraham gaw, Karai Kasang a ntsa kamhpa myit grai kaba ai majaw, Karai Kasang gaw, Abraham a kashu kasha ni hpe shaman mang gala ya sai.

Karai Kasang hte Abraham a lapran na ga ndat gaw Isak rai nga ai. Isak gaw, Beshiba ngu ai shara kaw nga nhtawm Rebeka mying ai num jan hpe la nna kasha shadang sha lahkawng lu ma ai. Esaw hte Yaku yan rai nga ai. Beshiba shara kaw hku wa kaba hku wa ai shaloi, Filistin amyu hpan ni a hkawhkam Abemelek kaw nna Isak garum lu la ai majaw, Isak gaw lusu nga pyaw wa sai. Isak asak kaba mat nna n gun yawm mat ai shaloi kasha Esaw hpe shaman mang gala ya na matu lajang ai. Shaloi shi a madu jan Sa-ra gaw, myit magaw hte Esaw a malai Yaku hpe shaman mang gala ya na matu lagyim lajang ya sai.

Kanu maw dat nna Yaku gaw mang hkang katut sai. Yaku nta kaw n nga lu mat nna katsa larban nga ai Haran buga de sa yen nga ra mat ai. Yaku gaw, dai buga kaw Leya hte Rahke mying ai num lahkawng hpe la nna nga ai. Yaku gaw, kasha shadang sha (12) lu ai; dai ni gaw, Hibru amyu hpan (12) ni a kaji ni tai wa ma ai.

Yaku gaw, Karai Kasang shagun dat ai Lamu Kasa langai mi hte gamu hkat ai hpang, Karai Kasang gaw, shi a mying hpe Isarel ngu nna shamying shagrau ya ai. Yaku u gut gu mat ai shaloi, Egypt mung na uphkang lit hkam Yosep hte rau sa nga matu Egypt mungdan de sa wa ai. Yosep gaw, htawm de Karai Kasang a amyu sha ni hpe Egypt mung kaw nna woi shapraw ya na matu shawng hpang ya ai uphkang du rai nga ai.

By;

Sister Rose Angeline Maran Nang Doi (SFX)

RVA-Kachin Service (Myitkyina)

#RVA_Kachin_Service

#Feastday_December20

#Sts_Abraham_Isaac_and_Jacob