San Pra ai Anastasius a Poi Nhtoi (December 19) 19 December 2022

San Pra ai Anastasius a Poi Nhtoi (December 19)

San Pra ai Anastasius gaw, Roma  mare kaw shangai chyinghkai wa ai rai nga ai. Shi gaw, Donatisim masa hte Origen a shut shai ai masa ni dingbai dingna jaw nga ai tsa ban (7) hta asak hkrung lai wa sai rai nga ai. Shi gaw, A.D (399) ning, November shata (27) ya shani, Sarabyin tai wa sai rai nga ai.

Origen a shut shai ai masa hte seng nna, shi a hpaji jaw Saradaw ni hte bawng ban ding lik yu ai hpang shazim kau ya lu sai. A.D (311) ning hta Africa dan, ding dung maga hta e, Donatism ngu ai shut shai ai masa bai chyam bra wa ai. Donatism ngu ai masa gaw, Sacramentu a akyu chyeju aw, Sacramentu jaw ya ai wa a myit jasat lai akyang hte seng nga ai, ngu ai shut shai tara rai nga ai. Dai shut shai sharin shaga lam hpe mung, Wa Sarabyin Anastasius gaw, atsawm sha shading sharai kau ya lu sai.

Wa Sarabyin Anastasius gaw, Mungkan ja sutgan a antsa myit n lawm ai Sarabyin, grai chyoi pra ai masha, nga nna myit kaba lai wa ai. Shi a makam masham myit ngang ai, akyu hpyi shaja ai, shagrit shanem ai myit, machye machyang hpe sawk sagawn mayu ai myit, htauli htaula myit ni gaw, yawng a matu kasi kaja tai ya sai. Wa Sarabyin gaw, A.D (404) ning, December shata (19) ya shani, Roma mare kaw, Madu hta yup pyaw ban sa mat wa sai rai nga ai.  

Wa Sarabyin Anastasius n nga mat ai hpang, Nawku hpung kawn, Shi hpe San Pra ai Masha dang dat let, Shi a Poi Nhtoi hpe mung, December shata (19) ya shani ngu masat shagrau dat ya sai rai nga ai.

Daini Nawku Hpung gaw, Wa Sarabyin Anastasius a Poi Nhtoi hpe galaw nga ga ai aten hta, anhte Hpung Masha ni mung, Wa Sarabyin zawn, tinang a kun dinghku, wuhpung wuhpawng ni hta manaw manang ni shut shai wa ai ten, mara tam tsun jahpoi ai lam n galaw ai sha, mai kaja ai lam de woi sharai ya lu ai ni, byin tai nga ga law.  

By;

Sister Rose Angeline Maran Nang Doi (SFX)

RVA-Kachin Service (Myitkyina)

#RVA_Kachin_Service

#Feastday_December19

#St_Anastasius_Pope