Wudang Hte Seng ai San Pra ai Ywhan a Poi Nhtoi  (December 14) 14 December 2022

Wudang Hte Seng ai San Pra ai Ywhan a Poi Nhtoi  (December 14)

San Pra ai Yawhan hpe St. John of the Cross nga nna masha law malawng chye shajang ma ai. Shi gaw, 1542 ning, Jun shata (24) ya shani hta Spain Mungdan, Fontiveros mare kaw shangai chyinghkai wa ai rai nga ai.

Shi a asak (21) ning du ai shaloi, Medina mare kaw nga ai, Carmelite Tawra Jau Jawng de shang nna John of the Cross ngu nna shamying la wu ai. San Pra ai Jau Yawhan gaw, shi hpe “Shani shagu ru yak jam jau jaw na matu” Karai Kasang kaw shani shagu akyu hpyi wu ai.

Shi Jau tai wa ai hpang Vercelli mare kaw na Albert ka lajang tawn da ai hkan sa tara 1209 hpe, shi myit ra ai hte maren hkan shatup na matu shi a ntsa na ni shi hpe ahkang jaw ya manu ai. Dai hkan sa tara gaw grai laja lana rai nga ai; langai hkrai sha atsim sha rai nga nna hkan shatup ra nga ai.

San Pra ai Jau Yawhan gaw, 1568 ning hta Avila mare kaw na San Pra ai Teresa hte rau hkan sa tara bai gram lajang tawn ai Discaled Camelite Jawng nnan hpe hpaw da ya sai. Dai wuhpung shang ai ni gaw, atsim sha nga ai, shagrit shanem ai myit madung tawn ai, ru yak jam jau lam ni hpe kabu gara hkap la nna hkan sa tara ni hpe shatup lai wa ma ai.

Carmelite Jau Magam Gun Wuhpung hte seng nna bai gram shading sharai ya ai majaw, Jau Yawhan hpe dai Wuhpung na Jau usa ni mara shagun ma ai sha n-ga, Jau Yawhan hpe rim la kau na matu, lagyim galaw ma ai. Jau Yawhan hpe rim la nna htawng kaw bang kau ma ai.

Dai zawn rai nna, htawng kaw sharawng da hkrum ai aten hta laika kaja ni law law ka da ai lai wa ai hta; Wenyi hte seng ai Mahkawn Mangwi (Shing n rai) Spiritual Canticle; Tsawra myit a Ahkrung nga ai Wan Shing Let (Shing n rai) Living Flame of Love ngu ai mung lawm nga ai. Shi ka da ai, Wenyi a Nsin Shana (Shing n rai) Dark Night of the Soul mying ai laika hta “Karai Kasang a sutgan hte hpaji byeng-ya hpe chye la lu na matu, shawng nnan ruyak jam jau law law hpe hkap la ra ai.” nga nna ka shalawm da nga ai.

Kalang mi na, Diego mying ai Jau langai mi gaw, hkansa rit kawp tara hpe n hkan shatup ai sha n-gawn n sawn rai nna nga ai majaw, San Pra ai Yawhan (St. John of the Cross) kawn Dai Jau hpe shadum wu ai. Jau dai gaw, myit malai lu na malai, San Pra ai Jau Yawhan hpe asawng asang di nna ginwang ting kaw mara shagun, shatan hkawm wu ai. Dai majaw, Jau Yawhan gaw, grai tsan ai Ubeda shara de htawt kau ai hkrum nu ai. Dai Ubeda shara kaw sha San Pra ai Jau Yawhan gaw, 1591 ning, December shata (14) ya shani hta Madu kaw yup pyaw ban sa wa sai rai nga ai.

San Pra ai Jau Yawhan n nga mat ai hpang, 1675 ning, January shata (25) ya shani, dai aten na Wa Sarabyin Clement (10) kawn, Shi hpe e A Lu ai Masha hku nna masat shagrau dat ya sai rai nga ai.

Dai hpang, 1726 ning, December shata (27) ya shani, dai aten na Wa Sarabyin Benedict (13) kawn, Shi hpe San Pra ai Masha dang dat let, Shi a Poi Nhtoi hpe mung, December shata (14) ya shani masat shagrau dat ya sai rai nga ai.

Daini Nawku Hpung gaw, Wudang Hte Seng ai San Pra ai Ywhan a Poi Nhtoi hpe galaw nga ga ai aten hta, anhte mung, San Pra ai Yawhan zawn, tinang lu da ai atsam marai hpe majoi mi lahpawt kau ai lam n nga ai sha, yawng a matu, mai kaja ai hku nna jai lang lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)

#RVA_Kachin_Service

#Feastday_December14

#St_John_of_the_Cross