San Pra ai Juan Diego a Poi Nhtoi (December 9) 09 December 2022

San Pra ai Juan Diego a Poi Nhtoi (December 9)

San Pra ai Juan Diego gaw, 1474 ning hta, shangai chyinghkai wa ai rai nga ai. Shi gaw, sak ram wa ai hte Sumpan galaw shapraw jak rung kaw amu galaw lai wa sai rai nga ai.

1531 ning, December shata (9) ya jahpawt e, shi Nawku jawng de sa wa ai lam kaw, Mexico mungdan, Guadalupe ngu ai shara hta e, Nu Maria gaw, shi kaw sa dan pru ai. Dai shaloi, Nu Maria a Myiman gaw, Jan zawn htoi kabrim nga ai; Ja lung seng nep da ai kaw shi hkawm nga ai.

Nu Maria gaw, Juan hpe “Nye a tsawra myit, matsan dum myit, garum jaw mayu ai myit, makawp maga ya mayu ai myit hpe madun lu na matu, ndai shara kaw Nawku Jawng langai mi gap na hpe ngai ra sharawng ai.” nga nna tsun ai. Dai shaloi jang, Juan Diego gaw, Wa Saradaw hpe wa tsun dan yang, Saradaw gaw, dai lam hpe n kam ya wu ai. Dai majaw, Juan gaw Shi a ga hpe Saradaw n kam ai lam, Nu Maria hpe wa nhtang sa tsun dan ai.

Saradaw gaw, mabyin langai ngai sha n mu lu yang, ngai n kam ai nga ai majaw, Nu Maria gaw, “Bum ntsa na numri pan ni hpe hkan di la ntawm, sumpan hte gayawp nna Saradaw hpe wa jaw u.” ngu nna Juan hpe matsun dat wu ai. Saradaw hpe sa jaw na matu sumpan hpe Juan hpaw nna hpyan dat ai shaloi Sumpan kaw Nu Maria a Sumla kap nga ai hpe mu lu nna grai mau mat wu ai. Dai shaloi she, Saradaw gaw, kam mat nna Nu Maria dan pru pru re ai shara hta Nawku Jawng langai mi gap ya sai. Mau hpa sumla kap ai sumpan hpe mung, hkik hkam ai shara kaw shagrau da ya sai.

Guadalupe mare na, Nu Maria a mabyin gaw, grai mying kaba wa ai. Dai mare kaw Nu Maria hpe “American mungdan ni a shamyet shanat ai Nu” nga nna shamying masat da sai rai nga ai. Shi gaw, 1548 ning, shi a asak (74) ning hta, Madu kaw yup pyaw ban sa mat wa sai rai nga ai.

Shi n nga mat ai hpang, 1990 ning, May shata (6) ya shani hta, dai aten na, Wa Sarabyin Yawhan Pawlu (II) gaw, Moi Juan Diego hpe Nu Maria dan pru dan ai, Mexico Mungdan, Guadalupe na Nu Maria Nawku Htingnu hta A-lu ai masha hku nna masat shagrau dat sai rai nga ai.

Dai hpang, 2002 ning, July shata (31) ya shani Mexico Mungdan, Guadalupe na Nu Maria Nawku Htingnu hta sha Wa Sarabyin Yawhan Pawlu (II) hkum nan San Pra ai Masha dang dat let, Shi a Poi Nhtoi hpe mung, December shata (9) ya shani ngu masat shagrau dat sai rai nga ai.

Daini Nawku hpung gaw, San Pra ai Juan Diego a Poi Nhtoi hpe myit dum galaw nga ai aten hta, anhte a prat hta mung, Karai Kasang Wa, Madu Yesu hte Nu Maria ni gaw, anhte hpe kaning re ai magam lam hta mi shatsam wa ai raitim, Maisa, Madu e, ngu hkam la let, hkan sa shatup lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service

#RVA_Kachin_Service

#Feastday_December9

#St_Juan_Diego