San Pra ai Ambrose a Poi Nhtoi (December 7) 07 December 2022

San Pra ai Ambrose a Poi Nhtoi (December 7)

San Pra ai Ambrose gaw, lai wa sai A.D (340) ning hta Germany Mungdan, Trier mare kaw shangai chyinghkai wa ai rai nga ai. Shi hpe Italy Mungdan, Milan mare hpe Laksan makawp maga ai ya ai San Pra ai Masha ngu nna masat da ai rai nga ai.

Ambrose a kawa n nga mat ai hpang, shi gaw Roma mare kaw hpaji sharin la nna Milan mare uphkang du aya shatsam ai hkrum nu ai. Shi gaw, Hpung masha garai n raitimung, Milan mare masha ni gaw, shi hpe Saradaw aya dang da na matu myit hkrum ma ai. Dai majaw, Ambrose gaw, Kashin Kamun hkam la nna, Jau tai wa sai. Dai hpang, Mila mare na Saradaw aya hpe mung hkap la sai. Saradaw tai wa ai hpang, shi lu tawn da ai sutgan ni hpe matsan masha ni hpe gara jaw kau nna shawa masha ni a matu shi a hkum hpe ap tawn kau nu ai.

Saradaw Ambrose a nga sat nga sa lam ni gaw, ding ngam galaw ra nga ai yu maya magam bungli galaw ai zawn rai nna sha mu lu nga ai. Shi gaw, akyu hpyi ai, Chyum laika hti sumru ai, tara hkaw na lajang nna shi lu ai aten ni hpe shama ai. Shi a shing gyim sak hkrung aten kaw na, lak lai dik ai mabyin langai gaw, Mila mare na Nawku Htingnu hta shi a Tara hkaw ai hpe na lu ai majaw, San Pra ai Augustine myit malai lu mat wa ai lam rai nga ai. Dai lam gaw, manu daw dan n lu ai awng dang lam kaba langai mi rai nga sai.

Hpung masha ni hku hku hpang gara hkrum ai aten hta mung, Nawku Jawng kaw jan taw nga ai Ja Gawm ni hpe dut kau nna, yak hkak ai ni hpe lusha mari jaw kau wu ai. “Ndai ja rai ni hpe Nawku Hpung lu da ai lam gaw, matsan masha ni hpe garum jaw na matu she re; kyem mahkawng da na matu n rai nga ai” nga nna Saradaw Ambrose tsun ga ai.

San Pra ai Ambrose gaw, Karai Kasang hpe tinang hkum ap nawng na matu, amyu shahyi sha ni a Hkawnsek Prat hpe hkam la ai myit jasat ni hpe grai n gun jaw madi shadaw ya ai. Dai majaw, shi gaw, Numsha ni law law hpe Hkawnsek Prat hte sak hkrung nga shangun lu ai. Shi a yaw shada ai dai lam hpe “Masha jahpan shayawm ya ai” nga nna mara shagun ma ai. Shanhte hpe Saradaw gaw, “Shinggyim masha jahpan shayawm ya ai lam gaw, hkawnsek tai taw ai ni a majaw n rai, masha shada da majan gasat ai she masha jahpan shayawm ya taw ai re” nga nna ja ja bai tsun mahtai jaw wu ai.

San Pra ai Saradaw Ambrose gaw, A.D 397 ning, April shata praw (4) ya shani, shi a asak (57) ning hta, Madu kaw yup pyaw ban sa mat wa sai rai nga ai. Shi a Moimang hpe Milan mare na, Nawku Htingnu kaw uphkang aya lu ai wa hpe makoi mayang ai hkrang hte maren grai hkik hkam ai hte makoi mayang da ai rai nga ai.

Shi n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, December shata (7) ya shani ngu masat dat ya sai rai nga ai.

San Pra ai Saradaw Ambrose a labau kadun hpe hkaja la nna, anhte hpung masha ni mung, tinang a mai kaja ai magam bungli a majaw, tinang a makau grup yin na ni n myit mada ai sha galai shai wa lu ai hpe myit dum let, shani shagu na anhte a sak hkrung hkawmsa lam ni hta mung, mai kaja ai hku nna sak hkrung hkawmsa lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)