San Pra ai Saradaw Aloysius Versiglia hte Jau Callistus Caravarioa Yen a Poi Nhtoi (November 13) 13 November 2022

San Pra ai Saradaw Aloysius Versiglia hte Jau Callistus Caravarioa Yen a Poi Nhtoi (November 13)

San Pra ai Saradaw Aloysius Versiglia gaw, Italy Mungdan, Pavia Ginwang, Oliva Gessi mare kaw, lai wa sai 1873 ning, June shata (5) ya shani, shangai chyinghkai wa ai rai nga ai. Shi a asak (12) ning hta Vadocco Jau Tai Jawng de shang mat wa ai. Dai shara kaw, San Pra ai Don Bosco hte chye chyap la lu nu ai.

1895 ning hta, Aloysius Versiglia gaw, Jau tai wa nna, Genzano mare na, Jau tai jawngma ni hpe yu lai wa sai. Salesian Sasana magam gun wuhpung ni, Miwa mungdan de shawng nna lang sa du ai hta mung, ningbaw magam gun hpai lai wa sai rai nga ai. Shanhte gaw, 1906 ning hta Miwa Mungdan, Shiu Chou mare hta, jawng hpaw la lu masai. Dai hpang (15) ning ngu na, 1924 ning, January shata (9) ya shani hta Shi, Saradaw tai wa sai rai nga ai.

Bai nna, San Pra ai Jau Callistus Caravari gaw, Italy Mungdan, Turin ginwang na, Courgne mare hta, lai wa sai 1903 ning, June shata (8) ya shani shangai chyinghkai wa ai rai nga ai. Shi mung, Saradaw Aloysius hte maren Valdocco Jau tai jawng kaw laika hpaji sharin lai wa sai. 1924 ning, Miwa mungdan de sasana majen je sa wa ai kaw shi mung lawm sa wa ai; Shi gaw, Saradaw Aloysius Versiglia kaw na Jau tai Sakramentu hkam la lai wa ai. Dai hpang Shiu Chou Saradaw ginwang kaw Saradaw a malai Jau kaba, Vicariate aya dang da hkrum wu ai.

Saradaw Aloysius hte Jau Callistus yan gaw, Miwa amyu shayi masum a asak lawt lam hte hkawnsek prat hpe makawp maga ya ai majaw, Lin Chou hka kau na Li Htau ngu ai shara hta, 1930 ning, February shata (25) ya shani e sat kau hkrum lai wa masai. Ndai zawn Saradaw hte Jau yan gaw, tara a majaw sat kau hkrum ai mabyin lam hpe, Roma mare Nawku Hpung a ginjaw kaw na, San Pra ai Masha Masat Shagrau ai Wuhpung, Congregation of Causes of Saints gaw, 1976 ning, November shata (12) ya shani madi shadaw masat shagrin dat ya sai rai nga ai.

Dai hpang, 1983 ning, May shata (15) ya shani, dai aten na, San Pra ai Wa Sarabyin Yawhan Pawlu (II) gaw, Wa Saradaw hte Wa Jau yan hpe A Lu ai Masha jahpan kaw shalawm masat dat ya sai rai nga ai.

Dai hpang, 2000 ning, October shata praw (1) ya shani gaw, San Pra ai Wa Sarabyin Yawhan Pawlu (II) sha, Saradaw Aloysius hte Jau Callistus yan hpe San Pra ai Masha ngu dang dat let, Shan Lahkawng a Poi Nhtoi hpe mung, November shata (13) ya shani ngu, masat shagrau dat ya sai rai nga ai.

Daini Nawku Hpung gaw, San Pra ai Saradaw Aloysius Versiglia hte Jau Callistus Caravarioa Yan a Poi Nhtoi hpe, galaw nga ga ai aten, anhte a Pra hta mung, tinang makau grup yin hta tinang garum shingtau la na matu, ra kadawn nga ai ni hpe lawan ladan garum shing tau la chye ai ni byin tai nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)