Amiens Mare na San Pra ai Godfrey a Poi Nhtoi (November 8) 08 November 2022

Amiens Mare na San Pra ai Godfrey a Poi Nhtoi (November 8)

San Pra ai Godfrey gaw, 1065 ning hta Fransik Mungdan, Soissons mare kaw shangai chyinghkai wa ai rai nga ai. Shi Jau tai wa ai hpang Champa Mare, Nogent shara na jawng kaw Jau kaba lit shatsam ya ai hpe hkrum sai. Jawng dai gaw, yak hkak mang hkang ni hte hkrum kadup taw ai aten rai nga ai. Jawng gaw gram ra wa, Hpung masha gaw n law, nga ai ni sha mung hkansa rit kawp tara hta n gun grai kya taw ma ai.

Raitimung, atsam marai rawng ai Jau Godfrey gaw, Karai Kasang jaw da ai atsam hpe akyu jashawn let galaw ai majaw, gram galai ai lam ni awng dang lu nu ai. Dai hpang shi hpe Rheims mare na, San Pra ai Remi Jau Jawng kaw lit bai shatsam ya ai shaloi shi n sa ai.

1104 ning hta shi gaw, Amiens mare na Saradaw lit shatsam ya ai hpe hkrum sai. Shi a Saradaw ginwang na shading sharai, galai shai ra shi ai lam ni hpe atsawm sha galaw ya lu sai. Shi a dingman tara hte galaw ai ni hpe n ju n dawng, manawn masham ai tai hpyen ni pru wa sai.

Shi hpe dingbai dingna jaw ai ni hpe mahtai jaw ai hku nna, 1114 ning hta shi nga ai Cistercian Jawng kaw nna htawt mat wa nu ai. Dai mang hkang hpe hparan ai zuphpawng ngut ai shaloi shi hpe bai shaga la ma ai raitim, Saradaw Godfrey bai n n-htang wa lu ai laman 1115 ning, November shata (8) ya shani hta Soisson mare na, San Pra ai Crispin Nawku Jawng kaw Madu hta yup pyaw ban sa mat wa sai rai nga ai.

Saradaw Godfrey n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, Shi n nga mat ai Nhtoi rai nga ai, November shata (8) ya shani hpe masat shagrau dat ya sai rai nga ai.

Daini Nawku Hpung gaw, San Pra ai Saradaw Godfrey a Poi Nhtoi hpe galaw nga ga ai aten hta, anhte a prat hta mung, Wa Saradaw Godfrey zawn, jaw teng ai lam hpe galaw jang, tsun jang, n ra sharawng ai, n-ju n-dawng ai masha ni pru wa chaylu rai nga ai hpe myit dum let, myit daw myit htum lam n nga ai sha, matut nna hkawmsa lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)