San Pra ai Charles Borromeo a Poi Nhtoi (November 4) 04 November 2022

San Pra ai Charles Borromeo a Poi Nhtoi (November 4)

San Pra ai Charles Borromeo gaw, Jau tai jawngma ni laksan hkungga kam hpa shamyet ai Sanpra ai masha rai nga ai. Shi gaw, 1538 ning, October shata praw (2) ya shani hta, Italy Mungdan, Arona Mare kaw shangai chyinghkai wa ai rai nga ai.

Shi a asak (22) ning du ai shaloi, dai ten na Sarabyin rai nga ai shi a kawa di, Sarabyin Pius (4) gaw shi hpe Cardinal aya dang ya nna Milan mare kaw na, Saradaw kaba lit shatsam ya sai. Trent Mare kaw galaw ai, Nawku Hpung ting a Zuphpawng kaba ngut kre ai shaloi, Saradaw Kaba Charles Borromeo gaw, shi a ginwang tinang gawan hkawm nhtawm, Jau ni hpe bungli rau ai shaloi shawa ni hpe woi hpawng nna, tara ga sharin na matu matsun lai wa ai.

Shi gaw, Nawku Hpung a matu, Saradaw ginwang kaw Jau tai jawng shawng hpaw hpang dat ya ai Saradaw rai nga ai. Shi a ga shaga atsam hte hpaji madang grai wa ntsaw timung shi hkaw shabra ai lam gaw, galoi mung tang du nga ai. Saradaw Charles Borromeo gaw, nawku daw jau lamang rai nga ai Liturgy hpe grai manu shadan let hkungga chye ai. Shi gaw, tin shapun rai nna, akyu hpyi ai lam galoi mung n galaw ai.

Galang mi na Jau langai mi gaw, shi kaw sa nhtawm “Misa galaw nga yang myit bra wa wa re ai” ngu nna tsun ai. Dai shaloi, Saradaw Charles gaw, “Nang Misa Hkungga nawng jau na matu nawku tawn de garai npru sa wa yang, Misa palawng galai ai gawk kaw hpa galaw a ta? Nang hpa hpe tau hkrau galaw a ta?” nga nna san wu ai.

Bai nna, shi a manang Saradaw langai mi mung; “Hpa galaw na amu mung n nga ai” ngu tsun ai shaloi, Saradaw Charles gaw, Saradaw langai mi galaw gun hpai ra ai amu ni hpe galu galang jahpan hpe ka nhtawm, dai lit langai hpra hpe hpa majaw galaw ra ai, gara hku galaw ra ai lam ni ka ai hpang, dai Saradaw hpe jaw dat wu ai. Jahpan hta lawm ai lit shagu a jahtum e; “Saradaw langai mi ting wa: Hpa galaw na n nga ai, nga nna tsun ai baw i?” nga nna mung ka shadum dat wu ai.

Saradaw Charles gaw, amu hte seng nna tinang hkum nan galaw shaman da sai majaw, hpa magam bungli hpe raitim, tin shapun rai nna n galaw ai sha, shi hte seng ai amu kade mi law nga timung, ngut kre ra ai aten hta atsawm ngut kre lu hkra galaw ai wa rai nga ai.

1576-1578 ning laman hta hku wa kaba byin wa ai. Shaloi, shi lu malu arai, nawku hpung hte seng ai shara nkau mi hte Kun-rai nkau hpe dut kau nhtawm, jam jau hkrum ai masha ni hpe gam garan jaw wu ai. Shi a woi awn hparan lajang ai lam ni hpe, shara shagu hkan na ni ra sharawng ai gaw n rai nga ai. Raitimung, shi a Sagurem lit magam hpe kade mi myit ru myit tsang hkrum ai raitim, myit n htum ai sha ding yang shakut nga ai.

Saradaw Charles gaw, asak grai naw ram ai aten, 1584 ning, shi a asak (46) ning hta, Arona mare kaw, Madu hta yup pyaw ban sa mat wa sai rai nga ai.

Shi n nga mat ai hpang, 1602 ning, May shata (12) ya shani hta gaw, dai aten na Wa Sarabyin Clement (8) kawn, Shi hpe A Lu ai Masha masat shagrau dat sai rai nga ai.

Dai hpang, 1610 ning, November shata praw (1) ya shani hta gaw, dai aten na, Wa Sarabyin Pawlu (5) kawn, shi hpe San Pra ai Masha dang dat let, Shi a Poi Nhtoi hpe mung, November shata praw (4) ya shani, masat shagrau dat sai rai nga ai.

Daini Nawku Hpung gaw, San Pra ai Saradaw Charles Borromeo a Poi Nhtoi hpe galaw nga ga ai ten hta, anhte a sak prat hkrun lam hta mung, tinang a galaw ra ai magam gaw hpa ni re ai kun? ngu ai hpe galoi mung myit sawn sumru yu let, dai magam bungli ni hpe ngut kre hkra galaw chye ai ni byin tai nga ga law.

By;

Sister Rose Angeline Maran Nang Doi (SFX)

RVA-Kachin Service (Myitiyina)