Lituregical Sign/Gesture, sign of the cross) Anhte galoi mung a galaw nga ai Madu a Kabu Gara shiga hti ai shaloi kahtan,n'gup n'ten hte sinda hta Udang masat galaw ai gaw hpa baw lachyum re ai kun

1. San: (Lituregical Sign/Gesture, sign of the cross) Anhte galoi mung a galaw nga ai Madu a Kabu Gara shiga hti ai shaloi kahtan,n'gup n'ten hte sinda hta Udang masat galaw ai gaw hpa baw lachyum re ai kun,Wa Jau e chyeju hte n'dai ga san hpe naw htai ya rit. NMouk Jau Aseng Manbung Lawk (9) kaw nga n'na ya Miwa Mung Thengchung kaw du nga ai Moring Dashi Hkawn Ja a ga san hpe htai ya na nngai.

2. Langai ngu na hta Karai Atai Langai hta Karai marai masum nga ai myit dum shangun ai, Dai gaw Karai Atai langai hta Marai masum rai nga ai Kawa Karai Kasang, Kasha Karai Kasang rai nga ai Madu Yesu Christu hte Chyoipra ai Wenyi Karai Kasang rai nga ai Ndai makam masham gaw anhte Catholic Nawku Hpung masha ni kam nan kam ra ai makam masham a n'pawt madung rai nga ai.

    

   Lahkawng ngu na hta Karai Kasang hpe shakawn kung dawn akyu hpyi ai lam rai nga ai. Missa Hkungga Nawng ai shaloi, shing n'rai Nawku Daw Jau Lamang hta Kabu Gara shiga rai nga ai Mahte, Marku, Luka hte Yawhan laika ni hpe e Nawku woi ai Wa Saradaw, Wa Jau, Deacon ni shawa Nawku Hpawng Hpung masha ni hpe n'dau ai ''Ya hti na gaw Mahte, Marku, Luka, shing n'rai, Yawhan a laika hta na kabu Gara shiga rai nga ai'' N'dai ndau ngut ai hpang Nawku Hpung shawa bai htai, ''Karai Kasang Kaw shakawn anga nga u ga law'' nga n'na bai htang ai.

Dai shaloi Nawku Hpung shawa gaw Tinang nang a kahtan n'tsa, N'ten hte sinda kaw Udang masat hpe galaw let dai karai kasang a mung ga hpe na la hkam la lu na re majaw kabu sha rawng shakawn kung dawn ai lam rai nga ai. Hebre masha ni hpang de shagun dat ai laika 14:12 ''Kaning rai n'me law, Karai Kasang a mungga gaw, ahkrung nga ai hte a let nga ai rai n'na, n'shan lahkawng maga dai ai nhtu hta mung grau dai ai hte, myit masin hte Wenyi hpe mung, nra hkri hkraw hte laswi hpe mung, dinghkren ginhka chye n'na, kraw lawang na myit mamyit hte mawmawn ai hpe mung je yang hparan ya lu ai.'' Manu dan dik ai Karai Kasang a mungga na la lu na re ai hte chyeju dum shakawn ai lam rai nga ai.

Masum ngu na hta Madu Yesu Hkristu Udang n'tsa e jen noi si hkrum ai hpe myit dum shangun ai. Madu Yesu Christu Udang N'tsa si hkam ai gaw yawng mayawng hpe Karai Kasang hte Jinghku bai hku n'na hkye hkrang la ai chyeju hpe hkam la lu na matu rai nga ai. Mt 17 hta Madu Yesu Udang n'tsa e jen noi si hkrum ai, masha ni jahpoi asawng ai hpe hkam la ai machyi kaba n'ni n'kri hpe dik htum hkam sha lai wa ai. Hpang jahtum shi a asak hpe anhte shing gyin masha ni a si hkam ai. Ndai hkye hkrang la ai mungsung hpe myit dum shangun ai.

Mali ngu na hta kabu Gara shiga hti maw ai sha loi kahtan n'tsa e, N-gup hte sinda e Udang masat galaw ai a lachyum gaw – (1) Karai Kasang a mungga hpe Tinang a chyechyang Kungkyang ai bawnu nyan marai yawng hte hkap la kam sham na (2) Tinang a tsun shaga ai lam mahkra hte Karai amungga hpe htawn na, kaga masha ni hpe mung tsun na, hkaw tsun na (3) Tinang a galaw sa wa ai magam bungli myit mang yaw shada ai lam mahkra gaw kabu Gara shiga hte maren galaw sa wa na, sak hkrung na, ngu ai rai nga ai.

Manga ngu na hta gaw anhte kam sham ai Karai Kasang, Kawa Karai Kasang, Kasha Karai Kasng, Chyoi Pra ai WenyiKarai a mying ningsang hte tinang a hkum hkrang, Ahkyak dik ai baw, N'gup hte myit masin salum ni hpe shaman la ai rai nga ai.

Karai Kasang hpe bawnu nyan marai mahkra hte kam sham na, Tinang a Tsun shaga ai lam mahkra gaw Karai a mung ga hpe tsun shabra shachyam na Kabu Gara Shiga hpe hkaw tsun na. Tinang a galaw sa wa ai magam bungli mahkra gaw kabu Gara shiga hte maren sak hkrung hkawm sa na.

Ndai hte hte Moring Dashi Hkawn Ja a Ga san hpe htai ya lu n'ngai.