Akyu Hpyi Ai gaw Myit Aru Yu Ai Hta N Nga N Mai Madi Shadaw Lam Re Nga Wa Sarabyin Tsun Ai

Wa Sarabyin: Akyu Hpyi Ai gaw Myit Aru Yu Ai Hta N Nga N Mai Madi Shadaw Lam Re

 September 28, bat masum ya shani, Hpung Shawa Masha ni hte hkrum shaga lamang hta, Wa Sarabyin Francis, akyu hpyi ai lam gaw myit aru yu ai hta n lawm n mai madi shadaw lam re ngu tsun da ai.

 Karai Kasang hte kata lam nihtep nga lu hkra shakut nna myit aru yu ai hta akyu hpyi ai a ahkyak ai lam hpe tsun ai rai nga ai. Dai gaw akyu hpyi ai a ahkyak ai lam rai nga ai. Akyu hpyi ai hta tsaw ra myit gaw nga ra ai, bang da ra ai.

 Akyu hpyi ai a marang e anhte myit ai hta grau sung ai lam hpe hkam la lu ai; Karai Kasang hte kata lam nihtep nga lu shangun ai.

 San pra ai ni a sanseng prat a makoi magap taw ai ahkyak dik gaw Karai Kasang hte nihtep nga lu ai, shi hta kam sham myit kaba wa ai. Dai lam ni ngang gring wa magang Karai Kasang hpe shakawn shagrau shakawn kungdawn na loi grau magang rai nga ai.

 Myit aru yu ai lam galaw ai gaw anhte a prat hta galaw ra ai lam langai rai nga ai. Shinggyim masha ni rai ga ai majaw dai myit aru ai lam shagu gaw hkrak tup teng man jaw ang ai mung n rai na re. San Pawlu hkum nan tsun da ai hta, anhte galaw ra ai chye nga tim n galaw byin ai lang law law rai ga ai, nga rai nga ai.

 Karai Kasang myit ra ai hpe sumru galaw gun hpai sa wa na gaw anhte a matu ahkyak ga ai. San Marku a Kabu Gara Shiga hta tsun da ai hte maren Satan hpe Karai Kasang hte n mai shut ga ai.

 Mungkan sutgan madu ai wa gaw Yesu Madu hpe hkap la na n mai byin ai. Hpa majaw nga yang shi hta Satan rawng taw nga ai majaw rai nga ai, nga nna Wa Sarabyin Fancis tsun shadum da ai.

 San Mahte a Kabu Gara Shiga hta mung, sut su ai ramma langai gaw mungkan sut gan hpe myit marin ai majaw Madu Yesu a hpang hkan na matu saw shaga la hkrum ai shaloi, lawt ga tsun nna Madu kaw na pru mat wa ai. Karai Kasang hte tsan gang mat ai kumla rai nga ai.

 Myit aru yu ai kaw na lu la ai daw dan lam hpe teng man jaw ang ai hku, Karai Kasang myit ra ai hpe lata hkawm sa na grai yak ai. Hpa majaw nga yang shinggan mu mada ai lam gaw lau la ai, shing n rai, gunglau ai lam sha rai nga ai.

 Akyu hpyi ai rai yang gaw dai n kaja ai lam ni hpe koi yen kau lu na, tawt lai lu na, Karai Kasang hte nihtep hku kau lu shangun na rai nga ai.

Source: Vatican News

By Fr. Patrick Gawmaw Hkawng Yae

#vaticannews

#rvakachinservice