Yangon Saradaw Kaba Cardinal Chalrles Bo A Lu Sha Gam Ladaw Shang Wa Ai Wanwu Chya Nhtoi Missa Hkungga Mungga

Dai ni gaw Lu Sha Gam ladaw shang wa ai wanwu chya nhtoi rai nga ai. Madu Yesu a nni nkri hkam la ai, si hkam ai hte bai hkrung rawt wa ai, Pascha mungsung lam hpe myit dum galaw na matu hkyen lajang lam galaw hpang ai nhtoi rai nga ai. Ahkaw ahkang ngu ai gaw hkap la chye yang akyu rawng nga ai. Latin ga, ga malai langai nga ai, dai gaw, “ya lu la nga ai ahkaw ahkang hpe ntat kau ai sha lu hkra la u, hpang de dai zawn re ai ahkaw ahkang lu yang she lu sana re” nga ai lam rai nga ai. Ndai ahkaw ahkang gaw dai ni lu sha gam ladaw shang wa ai nhtoi kaw nna Pascha poi shani du hkra lapran lu la nga ai ahkaw ahkang rai nga ai.

Shaning shagu Lu Sha gam ladaw hta anhte hpe jaw ya nga ai ahkaw ahkang kaba gaw, ‘shani shagu anhte galaw nga ai, shamu shamawt nga ai masa kaw nna lagaw lahkam mi shingdu de hting ngut sit tsap let tinang a prat hpe dinglik yu ai lam galaw shangun ai,’ ahkaw ahkang kaba rai nga ai. Anhte yawng gaw shani shagu nrau nhtau re ai masa hte shamu shamawt nga ra nga ga ai rai nga ai. Myit jasat lam hpaji ning hkring Socrates tsun yu ai, “myit sumru dinglik yu ai lam ni nnga ai prat gaw akyu nrawng ai prat re, nga pyaw ai prat ntai lu mai ai” nga nna tsun yu ai. Nrau nhtau shamu shamawt shakut shaja sha ra nga ai prat hta, sumru dinglik yu ai lam ni galaw na, ngu ai lam gaw yak hkak lam tai nga mai nga ai. Dai re majaw, Nawku hpung kaw nna, tinang a prat hpe bai sumru dinglik yu ai lam ni galaw na matu aten ladaw lajang jaw ya nga ai.

Anhte hpe Karai Kasang a kashu kasha ni tai wa shangun ai chyeju kumhpa hpe jaw ya ai Kashin Gamun Sacramentu hpe myit dum nna, dai Sacramentu a marang e anhte hpe shatsam dat ai , anhte galaw gun hpai ra na lit magam ni hpe myit sumru yu mai nga ga ai. Tinang a prat gaw kaja wa nan Karai Kasang a kasha langai zawn htoi tu nga ai kun?   Karai Kasang a kasha hte bung nga ga ai kun? Tinang a makau grup yin na manaw manang ni hte tsun shaga kanawn matsum lam galaw nga ai aten, karai kasang a kalu kaba ai tsawra myit, shi madu a n gaw nwoi ai matsan dum lama ai lam ni ngai hta masha ni mu mada nga ma ai kun? Myit yu ra ga ai.

Lu Sha Gam ladaw aten nhtoi ni ngu ai gaw Madu Yesu hta ni ni htep htep shanu nga ra na aten ni rai nga ai. Lam amyu my a majaw, anhte a prat hta agung alau ni hkrum wa ai aten anhte kaning rai chye ga ai kun? Lu Sha Gam ladaw shagu anhte galoi mung galaw nga ga ai ahkyak ai chyeju kum la hpan 3 hpe bai sumru yu ai lam galaw na matu saw shaga mayu ai.

Dai ni gaw, akyu hpyi ai, lu sha gam ai, alu atan bang ai lam ni rai nga ai. Ahkyak dik ai lam gaw anhte hpe asak jaw ya ai Madu a man hta anhte a masin salum hpe asan sha hpaw malang da ra na, ngu ai lam rai nga ai. Sumla soi ning hkring Holman Hunt ngu ai wa soi shatsawm da ai mying dan hkung ai sumla langai mi hta, nta anem sha re ai nta langai a man hta wan shatu da ai wan pyen ding langai lang nna Madu Yesu tsap nga ai, makau grup yin gaw sin nga ai. Wan pyen ding a nhtoi a majaw dai nta chying hka htoi nga ai. Chying hka chyawm gaw numru hkum sum hpa hte gayawp makai nga ai hpe yu yang nhpaw ai ram ram na sai chying hka rai na masa nga ai. Chying hka a shinggan maga de, chying hka hkyin dang  ngu na mung nnga nga ai. Nsin hpe jahtoi ya na matu madu Yesu du sa nga ai raitim, kata kaw nna nta madu ngu na wa chyinghka nhkap hpaw la yang Madu yesu kaning nmai di nga ai. Ndai sumla gaw Shingran Laika 3:20 hta na “Yu u ngai gaw chyinghka akawk let tsap nga nngai: nye a nsen na nna chyinghka hpaw ya ai wa kadai kaw raitimung, ngai shang nna shi hte rau lu rau sha na nngai, shi mung ngai hte rau lu rau sha lu na ra ai” nga ai lam rai nga ai.

Madu Yesu gaw nye a matu nhtoi, anhte a matu myit mada shara rai nga ai. Shi a hpang sharawng shara, shawng tsawra myit kaba hte hkan nang nga na matu saw shaga nga ai wa rai nga ai. Shi madu gaw nhtoi rai nga ai hte, nsin gaw galoi mung awng dang lu na nrai. Shani shagu kachyi chyi rai nna anhte a myit htingkup ai lam, tingkyeng myit myit ai lam ni hpe tawn kau da na matu Madu anhte hpe saw shaga nga ai. Manaw manang ni hpe tsawra myit madun na matu, matsan dum lama ai lam madun na matu Madu anhte hpe saw shaga nga ai. Gyip ai chyinghka ngu ai, akyu hpyi ai, Lu sha gam ai, alu atan bang shakut ai lam hta shakut hkawm sa nga na matu Madu anhte hpe saw lajin nga ai. Masha nnan tai wa let, Madu hte grau bung wa hkra shakut na maatu saw shaga nga ai. Madu a shaga ai nsen gaw, “Nye a hpang hkan mayu ai wa kadai raitimung, tinang a hkum hpe ning dang nyet kau let, shani shagu tinang a udang hpai let ngai kaw hkan nang ru ga” ngu ai lam rai nga ai.

Shani shagu anhte hkrum kadup nga ai masa gaw, tinang a lam hpe sha tinang myit, tinang myit ra ai lam ni hpe sha myit machyu hkan nang, hkrit tsang ai lam ni, myit tsang ai lam ni hpe chyu myit, lam shagu hta nkaja ai hku chyu mu mada, nhkru ai masa hte chyu dinglun nna nga ai masa byin chye nga ga ai. Ndai lam ni hpe tsi shamai kau lu na lam gaw, akyu hpyi shakut nna nga, tinang hkrai mung akyu hpyi, nawku hpung hte mung rau hpawng nna akyu hpyi chye ai, lam magup hpe Karai Kasang a lata hta ap ya da chye ai myit rawng ai masa hte akyu hpyi ai lam ni rai nga ai.

Bai lu sha gam ai lam hte mung shamai shatsai lam galaw la lu nga ai. Hpa majaw nga yang, Lu sha gam ai lam a marang e, tinang a hkum hpe up hkang da lu ai, hpu nau ni hpe tsawra matsan dum lama ai myit ni madun lu shangun ai. Tinang hta grau yak hkak jam jau hkrum nga ai ni hpe shawang tsawra myit madun shapraw lu shangun nga ai.

Akyu hpyi ai, Lu sha gam ai, alu atan bang shakut ai lam ni gaw anhte hkum shagu hpe chyoi pra san seng wa shangun lu nga ai hte, Karai kasang a jet ai sape ni tai wa shangun lu nga ai.

Lu sha gam ladaw shang wa ai aten, Shakawn Kungdaw daw 51 hku nna anhte hpe lam matsun madun lam atsawm sha galaw ya nga ai, “Karai Kasang e, na a chyeju hte maren ngai hpe matsan dum la e, na a n gaw nwoi myit kaba nga ai hte maren, nye a mara arut kau ya e, nye a shut hpyit ai hpe atsai awoi kashin kau ya e, nye a yubak kaw nna ngai hpe jaseng ya e, nye a mara ngai chye nga nngai, nye a yubak nye a man e tut tut rai nga ai. nang tsun nga ga ding hpring nga u ga, na a tara dara ai lam hta mara n kap u ga, Nang hpe chyu sha ngai yubak galaw nna, na man e nhkru ai amu galaw ni ai,”

Jahtum ginchyum hku nna tsun ga nga yang, Karai Kasng a tsawra matsan dum la na hpe anhte ra nga ga ai. Shani shagu Chyoi pra ai Wenyi a chyeju atsam hte wan shagrung ya na anhte ra nga ga ai. Karai Kasang a tsawra ai lam hpe sakse hkam nga ai ni anhte tai nga ra ga ai.

Lu Sha Gam Ladaw a shaman chyeju yawng hkam la lu mu ga, shada da akyu hpyi garum ya hkat nga ga.

Translated to Kachin by : Fr.Bernard Dashi Tang Ji