Wa Sarabyin: Asak Kung Sai Ni Hta Hpaji Byeng-Ya Hte Hkri Shawn Da Ai

August 24, bat masum ya shani, Wa Sarabyin Francis, hpung shawa masha ni hte hkrum shaga ai ten, asak kaba ai ni hta hpaji byeng-ya ni hpe hkri shawn da ai re, nga nna tsun da nga ai. 

Chyum daw hpe gaw Rom 8:22-24 hpe la da ai. Ma shangai shaprat ai shaloi machyi kaba hkrum ai hte anhte a hkumhkrang hkye hkrang la hkrum ai lam hpe San Pawlu shingdaw da ai lam rai nga ai. 

Mu lu ai arai hpe kadai wa myit mada nga a ta? Rai ti mung n mu lu ai mahtang hpe myit mada nga ga yang gaw, dai hpe anhte hkam sharang ai hte ala nga ga ai, nga nna San Pawlu tsun da ai hpe Wa Sarabyin madi madun da nga ai.

Si ai gaw kalang bai shangai la ai re

Wa Sarabyin Francis gaw Nu Maria sumsing lamu de woi shalun la hkrum ai lam hte Madu Yesu Hkristu bai hkrung rawt ai mungsung a matut mahkai ai lam lhpe mung tsun da ai.

Karai Kasang gaw Nu Maria hpe bai hkrung rawt sai Hkristu hte hkrum matut ya sai majaw shi a shinggyim hkum hkrang gaw hten za mat ai n rai; Karai Kasang jaw ya ai Shi a asak hte shinggyim hkum hkrang nawng Nu Maria hpe sumsing lamu de woi shalun la ai.

Shinggyim asak si ai gaw lahkawng lang ngu na bai shangai wa ai lam rai nga ai. Kanu a hkritung kaw nna shangai wa ai shaloi, anhte gaw Karai Kasang jaw da ai asak nan nan naw rai ga ai. Si wa ai shaloii mung dai hte maren sha naw rai nga ga ai.

Dai gaw Madu Yesu hta byin wa ai hte mung bung ai lam rai nga ai. Bai hkrung rawt sai Madu Yesu gaw mungkan ga na Yesu sha rai nga ai. Shi a shinggyim asak hpe n jasum kau ai. Shi hta jum lu ai hkra lu ai shinggyim hkum naw nga ai. Dai n nga, n lawm mat yang gaw shi n rai sai.

Madu Yesu bai hkrung rawt ai (Paska) hpang Madu Yesu, kasa ni hpe Shi a nma ni hpe madun dan ai gaw kaja wa teng sha shinggyim hkum hte naw re nga ai hpe madun ai rai nga ai.

Yesu Madu sumsing mungdan hta hpu nau ni hpe saw shaga ai hkungran poi ga shadawn hpe mung Wa Sarabyin Francis madi madun da ai. Ndai gaw anhte ni a hpang na prat ngu ai myit mada shara hte Karai Kasang lajang da ai tsawra myit hpe mu lu na matu garum ya ai.

Asak kaba sai ni hta hpaji byeng-ya hte da da hkri shawn da ai machye machyang, mahkrum madup sut dum nga ai. 

Anhte a sak prat gaw nli tum zawn mung rai nga ai. Dai nli tum hpe lup kau ai rai nna, dai lup da ai nli tum kaw nna apu asi pu si shangun ai. 

Dai lup da ai gaw mungkan hta nga manga hte rau bai shangai prut pru wa na ra ai. Ngu mayu ai gaw kaga ni hpe akyu jaw na ra ai rai nga ai. 

Anhte a bai hkrung rawt ai hkum hkrang gaw mungkan asak hta hkying, mung, seng hku htam grau law ai asak hpe lu la na ra ai, nga nna Wa Sarabyin Francis sharin shaga da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-08/pope-francis-general-aud...