Hkahtawlik Nawku Hpung, Num Sha Langai Mi, N'gun Shaja Hkam La Ngut Ai Hpang, Kaga Hristian Hpung De, Num Wa Hpung Shang Mat Ai Rai Yang, Mara Lu Na Kun?

Ga San : Katholik Nawku Hpung Num Sha Langai Mi N'gun Shaja Hkam La Ngut Ai                  Hpang Kaga Hristian Hpung De Num Wa Hpung Shang Mat Ai Rai Yang Mara Lu Na Kun?

               : Asak 18 ning n'hpring ai num sha la sha ni hpe anhte katholik nawku hpung hku hkungran ya mai ai kun?

                Shadau Jau Ginwang Lawk 2 na Lucia Lamam Hkawn Lum.

Kaga makam masham shing n'rai Hpung kaga de chye nga ninglen myit lawm ai hte kadai a jahkrit shama ai lam n'nga ai sha htak mat ai n'dai zawn hpung htak ai wa gaw Nawku Hpung kahkyin gum din lam hpe jahten sharun ai hte tinang a makam masham hpe jahpoi ahpyak n'gawn n'sawn di ai lam rai nga ai.

Canon numbat 1364 Daw Kaba langai Nawku Hpung a Upade hta lawm ai Apostate ngu ai tinang a makan masham hpe n'gawn n'sawn di shingdu tawn kau da n'na hpung htak ai wa rai nga ai. Ndai zawn re ai hpung htak ai ni hpe Nawku Hpung a chyeju kumla sacramentu yawng dawm kau ya ai.

Ndai zawn re ai hpung masha ni Nawku Hpung de bai shang wa na nga yang Nawku Hpung de bai shang wa na nga yang Nawku Hpung masat da ai makam masham hte seng ai magam bungli ni hpe tsang hte tsang galaw shatup ai hpang ging dan ai ngu hkap la ai hpang she Nawku Hpung a kata  de bai hkap la mai ai rai nga ai.
Nawku Hpung shawa a man e tinang shut shai ai lam hpe hpyinem tawngban ra ai.

Kashin Kamun chyeju kumla sacramentu hkam ai shaloi tawn da Kashin Kamun Ga shaka hpe bai tawn da ra ai.

Kasa ni a kamsham ai ga hta lawm ai makam masham hpe kam sham hkap la ai lam hpe Nawku Hpung seng ang ai ni hte hpung shawa a man e ga sadi ga shaka bai hkam ra ai.

Lahkawng ngu na gasan hta asak 18 n'ing n'hpring shi ai la sha, num sha ni hpe Nawku Hpung hte hkungran ya ai kun?

Ndai hta catholic Nawku Hpung a canon Upade numbat 1083 Daw Kaba langai hta la sha ni gaw asak 16 n'ing hpring ra ai, num sha ni gaw asak 14 n'ing hpring ra ai. Asak hpring jang she Nawku Hpung kata hkungran na mai nga ai. Asak masat da ai hta lama n'hpring yang Nawku Hpung kata hkungran na ahkang n'jaw ai.

Canon numbat 1083 Daw kaba lahkawng kaw matsun da ai gaw Bishop Conference, ngu ai dai mungdan, dai mungdaw ni htung lai len hta hkan n'na saradaw ni a zup hpawng kaw n'na asak masat ya ai lam galaw lu ai hpe matsun da ai. Grau n'na mungdan asuya masat da ai asak madang hpe hkan ai lam hpe mung mu lu ai.

Anhte Myen mungdan asuya masat da ai, tara shang hkungran na asak gaw num sha, la sha maren 18 n'ing hpring ra ai hpe masat da ai. Catholic hpung masha ni gaw lasha asak 16, ning hpring ra ai, numsha asak 14 ning hpring ra ai. Dai hta asak naw kaji ai ni hpe tara shang hkungran na ahkang njaw ai.

Anhte Myen Mungdan hta shara n'kau mi, myu sha n'kau mi hta Nawku Hpung hte mungdan masat ai asak hte grau kaji ai ni hpe mung hkungran ya ai hpe mung mu lu ai.

Nawku a masat da ai asak la kasha 16, ning num kasha 14 ning hpring jang gaw Nawku Hpung kata tara shang hkungran ya ai.