Vercelli Mare na San Pra ai Eusebius a Poi Nhtoi (August 2) 02 August 2022

Vercelli Mare na San Pra ai Eusebius a Poi Nhtoi (August 2)

San Pra ai Eusebius gaw, A.D (283) ning, March shata praw (2) ya shani hta Italy Mungdan, Sardinia mare kaw, shingkang sari rawng ai kanu yan kawa kawn shangai chyinghkai wa ai rai nga ai. Shi a kanu gaw, shi hpe Roma mare de woi sa nna hpaji sharin hkaja la shangun ai.

Wa Sarabyin Sylvester hkum nan shi hpe “Lector” Chyum Laika Hti Aya dang da ya nna, Piedmont ginwang na, Vercelli Mare de lit shatsam ya ai hpe hkrum sai. Dai yang na, Wa Jau ni hte rau nga ai hpang, dai mare na Saradaw lit shatsam ai hpe bai hkrum nu ai. Sinna hkran na hkrang lang ai Nawku Hpung kaw Jau ni hte rau shawng nga ai gaw, San Pra ai Saradaw Eusebius rai nga ai. Shi gaw, Shi a Jau ni a san seng san pra lam hte seng nna laja lana shakut ya nu ai.

Saradaw Eusebius gaw, makam masham hte seng nna, Arian hpung a shut shai tara hpe ja ja ning hkap lai wa ai. A.D (354) ning hta galaw ai, Milan Zuphpawng “Synod of Milan” hta shi gaw, dai ten na Hkristan Makam Masham a Share Shagan “Champion of Christianity” rai nga ai San Pra ai Athanasius hpe, n hkrit n tsang ai hte makawp maga ya lai wa sai. Shi a makam masham myit hta maju jung ai lam a majaw, shi gaw, Palestine mungdan de sa kau hkrum nu ai. Shi gaw, lam shagu hku nna zingri zingrat shatsang hkrum timung, makam masham myit kaji mi pyi n yawm ai sha n-ga, grau grau she ngang wa nu ai.

A.D (361) ning hta Constanius si mat ai shaloi, Saradaw Eusebius gaw, dai daw buga de bai nhtang du wa lu sai. Shi a Vercelli ginwang de bai nhtang wa ai lam kaw, makam masham htak mat wa ai ni hpe lam ding yang atsawm sha bai matsun sharai ya lai wa sai.

Saradaw Eusebius gaw, A.D (371) ning, August shata praw (1) ya shani hta Madu kaw yup pyaw mat wa sai rai nga ai.  

Shi n nga mat ai hpang, Nawku Hpung gaw, shi hpe San Pra ai Masha masat dang dat let, Shi a Poi Nhtoi hpe mung, August shata praw (2) ya shani ngu masat shagrau dat ya sai rai nga ai.

Daini Nawku Hpung gaw, Vercelli Mare na San Pra ai Eusebius a Poi Nhtoi hpe galaw nga ga ai aten hta, anhte Hpung Masha ni mung, Wa Saradaw Eusebius zawn sha, tinang a makam masham hpe kaning re ai masa hte hkrum kadup wa ai raitim, gwi gwi hte sak se hkam lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)