San Pra ai Joachim hte Anna Yan a Poi Nhtoi (July 26) 26 July 2022

San Pra ai Joachim hte Anna Yan a Poi Nhtoi (July 26)

Hkungga ai Nuwa hpung masha ni, anhte Catholic Nawku hpung gaw, shaning shagu July shata (26) ya shani hta, Nu Maria a Kanu yan Kawa, Madu Yesu a Kaji Yan Kawoi rai nga ai, San Pra ai Joachim hte Anna yan a Poi Nhtoi hpe galaw nga ga ai re.

San Pra ai Joachim hte Anna hpe Nu Maria a kanu yan kawa ngu nna, Nawku Hpung hkungga jaw shagrau nga ga ai. Shanhkawng a lam hpe Yaku a laika hte tsa ban lahkawng na chyum laika hte seng ai, Apocryphal Laika ni hta mu lu nga ai re. Shan hkawng a labau lam ni hpe grai hkum tsup hkra ka da ai labau laika buk ni gaw nau n nga ai daram rai nga ai.

San Pra ai Joachim hte Anna gaw, Yuda amyu, Dawi a htinggaw kaw na yu hkrat wa ma ai. Shan gaw, Galile ginwang, Yerusalem mare kaw sa shanu ngai ai ni rai ma ai. San Pra ai Joachim gaw, sagurem sha ai wa rai nna, shanhkawng gaw, asak grai kaba ai hpang e she, Chyoi Pra ai Nu Maria hpe shangai chyinghkai la ai rai nga ma ai.

San Pra ai Anna, a lachyum gaw, Chyeju “Grace” ngu ai rai nna, shi shangai na numsha gaw, Mungkan ting jawm chye mat wa, shakawn shagrau ya na wa rai na re, nga nna tau tsun da hkrum na nhten, ngu nna chye la mai nga ai. Moi shawng na, Hkristian Nawku jawng ni gaw, Anna hpe shagrau let masat dingsat galaw ai, Nu Maria a Kanu nga nna grai shakawn shagrau lai wa masai.

San Pra ai Joachim hpe mung, grai san seng ai wa, makam masham myit grai kaba ai wa, Nu Maria hpe kaji ai ten hta, Chyum Laika hti sharin ya lai wa sai hpe shingran let, daini du hkra anhte mung Nu Maria hpe shakawn shagrau nga ga ai re. Shanhkawng galoi aten nnga mat ai hpe gaw, aten hkrak nchye ai raitim, Tsaban (4) hta San Pra ai Helen gaw, San Pra ai Joachim hte Anna yan a nta htingra kaw Nawku jawng langai gap lai wa sai rai nga ai. Raitimung, Shanhkawng a hkum tsawp moi mang hpe shara mi kaw sha lup makoi mayang da ma ai, nga nna sha labau hta ka matsing da ma ai.

Nawku hpung gaw, July shata (26) ya shani hpe, Chyoi Pra ai Nu Maria a Kanu Yan Kawa a Poi Nhtoi ngu masat shagrin dat sai hte maren, anhte Nawku Hpung Masha ni yawng a matu mung, Kanu Kawa Shagrau Poi hku nna masat galaw nga ga ai re.

Dai majaw, Nawku Hpung gaw, San Pra ai Joachim hte Anna Yan a Poi Nhtoi hpe galaw nga ai aten hta, anhte Kashu Kasha ni hku nna mung, tinang a Kanu Kawa ni, tinang hpe lam woi awn hkawmsa taw nga ai chyeju madu ni hpe lak san shakawn shagrau nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)