San Pra ai Hkawhkam Kaba Henry (2) a Poi Nhtoi (July 13) 13 July 2022

San Pra ai Hkawhkam Kaba Henry (2) a Poi Nhtoi (July 13)

Germany mungdan a Hkawhkam kaba Henry (2) gaw, A.D 973 ning, May shata (6) ya shani hta shangai chyinghkai wa ai rai nga ai. Ratisbon mare na, San Para ai Saradaw Wolfgang gaw, shi hpe Hkristian makam masham npawt nhpang lam ni hpe sharin ya lai wa sai. Asak (23) ning hta, Kawa a hkang galai nna, Bavaria ginwang uphkang du kaba lit shatsam hkrum lai wa nhtawm, asak (30) ning hta shi a lawu lahta hkawhkam Otho (3) n nga mat wa ai. Dai shaloi, dai n nga mat sai Hkawhkam a hkang galai na matu Emperor madang ahkang aya hpe Wa Sarabyin Benedict (8) kawn Henry hpe shatsam dat sai. 

Hkawhkam kaba Henry (2) gaw, makam masham myit grai rawng ai; Nawku Hpung kata na gram sharai ya ai lam, sasana majen je ai lam ni hta matsan ai ni hpe alak mi yu gawn ai magam bungli law law hpe galaw lai wa sai. Tawra Jau byin mayu ai majaw, shi lu ai Hkawhkam ahkaw ahkang hte shi hpe hkap la na matu Verdun mare na, Tawra Jau kaba kaw hpyi shawn wu ai. Shi a makam masham kaba ai shaman chyeju hpe mu nna, shi hpe Tawra Jau tai na ahkang jaw ya sai.

Mungdan uphkang na lit mung matut gun shangun wu ai. Tawra hte hkawhkam rai nga ai, Hkawhkam kaba Henry (2)) gaw, Mungkan ga ntsa gun ai lit gaw shawa wuhpung kaja lam a matu, Karai Kasang hkum nan lajang ya ai lit re ngu nna hkap la ai; shi a lit hpe shagrit shanem ai myit hte shawang tsawra myit kaba hte galaw gunhpai lai wa nu ai.

Hkawhkam kaba Henry (2) gaw, sasana magam gun ni a ginjaw law law hpe hpaw da ya ai; wanglu wanglang makam masham hpe hkan shatup na ahkang jaw ya ai hte Bumverg mare na Saradaw a Nawku htingnu hpe mung gaw gap ya lai wa sai.

Shi gaw, kashu kasha nlu ai sha, 1204 ning hta n nga mat sai rai nga ai. Hkawhkam kaba Henry (2) gaw, German amyu sha ni a Saxon htinggaw kaw na hpang jahtum ngu na hkawhkam mung rai nga ai.

Shi n nga mat ai hpang, 1147 ning, July shata hta dai aten na, Wa Sarabyin Eugenius (3) kawn shi hpe Sanpra ai Masha hku nna dang dat let, Shi a Poi Nhtoi hpe mung, July shata (13) ya shani masat shagrau dat ya sai rai nga ai.

Daini Nawku Hpung gaw, San Pra ai Hkawhkam kaba Henry (2) a Poi Nhtoi hpe galaw nga ai aten hta, anhte a prat hta mung, Karai Kasang Wa lata shatsam wa ai, lit magam rai jang, kaning re ai magam bungli hta raitim, shang tsap gun hpai lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)