Ausburg Mare na San Pra ai Ulric a Poi Nhtoi (July 10) 10 July 2022

Ausburg Mare na San Pra ai Ulric a Poi Nhtoi (July 10)

San Pra ai Ulric gaw, Germany Mungdan, Ausburg mare kaw A.D (893) ning ram hta shangai chyinghkai wa ai rai nga ai. Shi a Kawa gaw, Suabia ginwang uphkang du kaba Count Hucbald a kasha rai nga ai. shi gaw, asak (7) ning kaw nna, St. Gall Tawra Jau Jawng hta laika hpaji sharin la nna, asak (16) ning hta Augsburg mare na Saradaw Adalbero gaw, Ulric hpe shi a ningtau lit hkam shatai ya sai. Jau tai wa ai hpang shi gaw, Karai Kasang ra sharawng ai lithkam kaja tai nna, myit su myit kung rai let magam ni hpe hkungga la ra myit hte galaw gun hpai ai. Matsan masha ni a ntsa alak mi rai gam garan  jaw ai myit, yu gawn ai myit ni grai rawng wu ai.

A.D (923) hta Hkawhkam Henry the Fowler gaw, shi hpe Augsburg mare na Saradaw shatai ya sai. Saradaw Ulric shawng shachyen ai lit magam gaw, Magyars amyu sha ni kawn shang htim gasat, roi rip hkrum nga ai German amyu sha ni hpe shalan shabran ya na hte myit n gun jaw ya ai lam rai nga ai. Shanhte hpe shalan shabran ya ai hku nna Nawku Jawng langai mi shawng gap ya ai. Shi a masha ni matu, n hkring n sa akyu hpyi let ta tut bungli galaw ya ai.

Magyars masha shazai ni gaw, A.D (955) ning hta kalang mi bai shang htim gasat ma ai raitim dai lang gaw, Augsburg mare masha ni awng padang lu la ma ai. Dai awng padang ninglaw lu la ai lam gaw, aten tup shanhte a matu akyu hpyi ya, n gun jaw ya ai hte shalan shabran ya nga ai shanhte a Saradaw Ulric a majaw re nga nna hkap la ma ai. San Pra ai Saradaw Ulric gaw, St. Gall Jawng kaw shi a hpang jahtum aten, A.D (973) ning, July shata (4) ya shani du hkra magam gun hkring sa let nga lai wa sai.

San Pra ai Saradaw Ulric a lupwa kaw lamik kumla law law byin pru wa ai majaw, Wa Sarabyin Yawhan (15) gaw, A.D (993) ning, July shata (4) ya shani hta Saradaw Ulric hpe San Pra ai Masha dang dat let, Shi a Poi Nhtoi hpe mung, July shata (10) shani masat shagrau dat ya sai rai nga ai. Dai zawn masat shagrau dat ai lam gaw, Sarabyin langai mi a shawng nnan lang hkik hkam dik ai hte shagrau dat ai lam re, nga nna mung, labau hta ka matsing da nga ai.

Daini Nawku Hpung gaw, Ausburg Mare na San Pra ai Ulric a Poi Nhtoi hpe galaw nga ai aten hta, anhte Hpung Masha ni mung, Nawku Hpung a Kaning re ai lit magam hta raitim, yawng e kam nna shatsam wa ai rai jang, ning hkap ai lam n nga ai sha, gun hpai shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)