San Pra ai Aloysius Gonzaga a Poi Nhtoi 21 June 2022

San Pra ai Aloysius Gonzaga a Poi Nhtoi (June 21)

San Pra ai Aloysius Gonzaga gaw, “Ramma ni laksan kam shamyet lu ai San Pra ai Masha” ngu masat shagrau hkrum ai wa mung rai nga ai. Shi gaw, 1568 ning, March shata (9) ya shani hta, Italy Mungdan, Mantua mare na ahkang aya kaba ai Gonzaga htinggaw kawn shangai chyinghkai wa ai rai nga ai.

San Pra ai Aloysius Gonzaga gaw, Kawa a myit hkan shatup ya ai hku nna, hpyen amu sharin ai wun_kat ni, hpyen hprim ni hte lusu masha ni a dawsha poi lamang ni kaw sa du shang lawm ya ai. Raitimung, shi gaw ndai zawn lusu ai ni a pyaw len ai lamang ni hpe n yu sharawng wa ai, grai yu hkyet rung wa ai, myit grai yu htum wa ai, mara shalaw ai amu re hpe mu ya ai majaw, tara shatup ai lam hpe madaw lata la na daw dan wu ai.

Laban bat mi hta masum ya ntsin hte muk sha sha nna lusha gam ai; shi hkum hpe shingna hte gayet nna yup tung aten hta rawt nhtawm shi gawk na nlung ntsa hputdi let akyu hpyi ai. Hkum shan agung alau hpe yen lu na matu amyu shayi ni a man kaw du jang shi myi man hpe gum tawn ai. India mung kaw sasana magam gun nga ai Jesuit Sasana Magam gun ai ni a lam, ka tawn ai laika buk hti lu ai hpang, shi mung dai wuhpung kaw shang na matu myit daw dan kau nu ai.

Dai majaw, San Pra ai Aloysius Gonzaga gaw, 1585 ning hta shi lu ai sutgan hte ahkang aya ni hpe rap di shingdu gayin tawn kau da nhtawm, Roma mare kaw na Jesuit Jau Magam Gun Wuhpung de shang mat wa nu ai. Gum rawng gum tawng myit hpe ning hkap lu na matu, shat shadu ai gawk hta yu maya amu hpe galaw na matu hpyi shawn let sa nga ai.

1591 ning hta ana ahkya kaba hkrum ai masha ni hpe yu gawn ai majaw, dai ana shakap la nna shata (3) na ai hpang, June shata (21) ya shani hta, shi a asak (23) ning sha naw rai yang, Madu kaw yup pyaw ban sa mat wa sai rai nga ai.

San Pra ai Aloysius Gonzaga hpang jahtum ka kau da ai laika hta; “Tsawra ai nu e, Karai Kasang hte man chyaw nga lu sai si mat sai wa a matu yawn nga nna, Karai Kasang hpe n gawn n sawn n galaw hkrup na matu sadi u; an-nu gaw sumsing lamu kaw bai hkrum na re.” nga nna ka kau da wu ai.

Shi n nga mat ai hpang, 1605 ning, October shata (19) ya shani, dai aten na Wa Sarabyin Pawlu (5) kawn shi hpe A Lu ai Masha hku nna masat shagrau dat ya sai rai nga ai.

Dai hpang, 1726 ning, December shata (31) ya shani hta gaw, dai aten na Wa Sarabyin Benedict (13) kawn shi hpe San Pra ai Masha dang dat let, Shi a Poi Nhtoi hpe mung, June shata (21) ya shani ngu masat shagrau dat ya sai rai nga ai.

Daini Nawku Hpung gaw, San Pra ai Aloysius Gonzaga a Poi Nhtoi hpe galaw nga ga ai aten hta, anhte a Prat hta mung, n grin ai dinghta ga a arawng sadang, ja sutgan ni hpe myit marin ai lam n nga ai sha, grin ai Sumsing Sutgan hpe tam mahkawng lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)