San Pra ai Gregory Barbarigo a Poi Nhtoi (June 18) 18 June 2022

San Pra ai Gregory Barbarigo a Poi Nhtoi (June 18)

San Pra ai Gregory Barbarigo gaw, lai wa sai 1625 ning, September shata (16) ya shani, Italy Mungdan, Venice Mare na nga pyaw ai kun dinghku kawn shangai chyinghkai wa ai rai nga ai. Shi gaw, hpaji chye ai masha rai nga nna, Venice mare na, Maigan Sumtsan Dakkasa Rung Lit Salang (Ambassador Contarini) a Magam gun tai wa sai.

Dai hpang shi gaw, Jau tai wa nna, kade nna yang, Wa Sarabyin Alexander (7) gaw, shi hpe Bergamo mare kaw na Saradaw aya dang dat ya wu ai. Hpang jahtum shi gaw, Saradaw Kaba (Cardinal) tai wa nna Padua ginwang hpe yu gawn lai wa sai rai nga ai.

Shi gaw, machye machyang grai hkum ning tawn ai hte maren, shakut sharang ai atsam hte Nawku Hpung kata gram sharai ra ai lam ni hpe Trent Zuphpawng kaba hpe mung, masing jahkrat atsam dat nna galaw ya sai. Shi a shakut shaja ai a marang e, Italy Mungdan, Bergamo hte Padua mare na Jau tai jawng ni hpe grai awng dang hkra gram galai shai ya lu sai. Jau tai jawng kaw Laika Hti Htingnu hte htangdip gawng ni hpe hpaw da ya lai wa sai rai nga ai.  

Saradaw kaba Gregory Barbarigo gaw, aten shagu Karai Kasang hte ni ni htep htep rai nga ai majaw, shi a Hpung Masha ni hte Saradaw Ginwang ting, akyu hpyi grai hkam la lu ma ai. Shi a San Seng San Pra ai myit jasat hte shakut shaja myit gaw Hpung Masha ni a matu, kasi kaja dik tai wa sai. Dai hta n-ga, shi a machye machyang hpaji hte n hkring n sa shakut shaja ai myit jasat ni gaw, shi a Hpung Masha ni a matu manu shadawn n lu ai kumhpa kaba tai lai wa sai rai nga ai.

Saradaw kaba Gregory Barbarigo gaw, 1697 ning, June shata (18) ya shani hta Madu kaw yup pyaw ban sa mat wa sai rai nga ai.

Shi n nga mat ai hpang, 1761 ning, July shata (6) ya shani, dai aten na Wa Sarabyin Clement (13) kawn shi hpe A Lu ai Masha hku nna masat shagrau dat ya sai rai nga ai.

Dai hpang, 1960 ning, May shata (26) ya shani hta gaw, dai aten na Wa Sarabyin Yawhan (23) kawn shi hpe San Pra ai Masha dang dat let, Shi a Poi Nhtoi hpe mung, June shata (18) ya shani ngu masat shagrau dat ya sai rai nga ai.

Daini Nawku Hpung gaw, San Pra ai Gregory Barbarigo a Poi Nhtoi hpe galaw nga ga ai aten hta, anhte a Prat hta Mung, tinang gaw, Jau, Mama Magam gun ni rai rai, Nawku Hpung woi mi rai rai, Dum nta hpe woi awn nga ai mi rai rai, yawng a kam hpa gying ai masha hte kasi kaja madun chye ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)