San Pra ai Germaine Cousin a Poi Nhtoi (June 15) 15 June 2022

San Pra ai Germaine Cousin a Poi Nhtoi (June 15)

San Pra ai Germaine Cousin gaw, 1579 ning hta, Pyin-Thit Mungdan, Pibrac Mare kaw shangai chyinghkai wa ai rai nga ai. Germaine gaw, Shi a asak hkrung prat tup ayak ahkak hte chyam dinglik hkrum ai lam ni hte n lawt ai sha hkrum katut lai wa ai. Shi gaw, shangai wa ai aten kaw nna hkra lata n mai shamu shamawt ai hte yuhkraw mawnghkaw ana mung lu wu ai. Germaine ma kaji aten kaw nna, Shi a chyinghkai kanu n nga mat sai. Kawa gaw, Germaine a matu hpa mung n myit yu ai sha hpang num bai la wu ai. Dai shi a Kanu Ba gaw, Gemaine hpe grai zingri shatsang ai, shanhte hte arau n ta kaw mung n nga shangun ai sha Germaine hpe Fransik mungdan, Toulouse bum mayan kaw Sagurem shangun wu ai.

Germaine hkawn ji gaw, ru yak tsin yam ni a lapran kaw, makam masham ngang ngang hte nga lai wa ai; Akyu hpyi ai; Rosary hti sumru ai; shani shagu misa hkungga nawng jau ya ai de sa lawm rai nga ai. Shi hpe jaw sha ai matsan masha ni sha ai Hkaulan Man (Paung_Muk_Chyang) hpe matsan masha ni hpe shani shagu bai gam garan jaw kau nga ai. Ma kaji ni hpe shaga jahpawng la htawm, Hkristan Makam masham lam ni hpe sharin ya ya rai nga ai.

Lani mi na aten hta, Shi a hpang kanu gaw, Germaine hpe shahpa lagu nna palawng kata makoi da ai nga nna mara kata mara shagun wu ai. Germaine a hkum ting sawk jep yu ai shaloi shi a palawng kata kaw tsawm la ai ginhtawng ten na nampu nampan ni hpe sha mu lu wu ai.

Germaine Hkawnji ma gaw, 1601 ning, shi a asak (22) ning hta Madu kaw yup pyaw ban sa mat wa sai rai nga ai.

Germaine n nga mat ai shaning (50) ning na ai hpang, shi a hkum tsawp moi mang hpe bai hpaw yu ai shaloi, shi a hkum sai shan ni gaw, majing malang sha naw rai nga ai. Dai majaw, shawa masha ni mu lu na matu, shi a n hten n yat mat ai Moi Mang hpe laning mi tup madun da let, hkungga jaw ma ai. Germaine Hkawnji Ma hte seng nna, kaga lamik kumla ni amyu myu naw nga nga ai re.

Germaine n nga mat ai hpang, 1864 ning, May (7) ya shani, Shi hpe Nawku Hpung Kawn, A Lu ai Masha hku nna masat shagrau dat ya sai rai nga ai.

Dai hpang, 1867 ning, June shata (29) ya shani, dai aten na, Wa Sarabyin Pius (9) kawn, Shi hpe San Pra ai Masha dang dat let, Shi a Poi Nhtoi hpe mung, June shata (15) ya shani ngu masat shagrau dat ya sai rai nga ai.

Daini Nawku Hpung gaw, San Pra ai Germaine Cousin a Poi Nhtoi hpe galaw nga ga ai aten hta, anhte a Prat hta Mung, Kaning re ai Prat hte sak hkrung hkawmsa taw nga ga ai raitim, San Pra ai Germaine zawn, makam masham ngang ngang jum da nhtawm, Rosary hti sumru ai; shani shagu akyu hpyi let, mai byin ai aten shagu hta, Misa Hkungga Lamang ni hpe shang lawm lu hkra shakut sa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)