Constantinople Mare na San Pra ai Methodius a Poi Nhtoi (June 14) 14 June 2022

Constantinople Mare na San Pra ai Methodius a Poi Nhtoi (June 14)

San Pra ai Methodius gaw, Sicili Zinlawng na mying grai kaba ai nga pyaw ai kun dinghku kawn A.D (788) ning hta shangai chyinghkai wa ai rai nga ai. Shi gaw, Italy Mungdan Syracuse mare kaw hpaji hkaja la ngut nna, hkawhkam hkaw kata e bungli galaw na matu, Constantinople mare de sa mat wa ai. Raitimung, shi myit tawn ai rung amu magam gun tai na malai hpung magam gun tai na matu daw dan kau wu ai.

Shi gaw, Chios Zinlawng hta e, Tawra Jawng Langai mi sa gap nna nga nga yang, Constantinople mare na Saradaw Kaba San Pra ai Nicephorus gaw, shi hpe Constantinople mare de bai shaga la wu ai. San Pra ai Methodius gaw, San Pra ai masha ni a sumla hpe hkungga jaw shagrau ai masing hpe jahten sharun kau ya ai Iconoclst ni a zingri shatsang ai hpe n hkrit n tsang ai sha ning hkap ya lai wa sai. Nawku Hpung a masing hte maren nhtan shai ai ndai masha ni gaw, Constantinople mare na Saradaw Kaba Nicephorus hpe dai mare kaw na gawt shapraw kau ma ai.

San Pra ai Methodius hpe Roma mare de sa nna, Wa Sarabyin Paschal (I) hpe Sinpraw Dan (Near East) na mang hkang hte seng nna sa shaga shangun ma ai. Methodius mung, Roma mare de sa nhtawm Iconoclast masing sharin ya ai wa rai nga ai, Leo Armenia mying ai wa si mat ai aten du hkra Roma mare kaw sa nga ai. A.D (821) ning hta Methodius gaw, Constantinople mare de bai nhtang wa ai. Raitimung, dai aten na ginwang up hkang nga ai Michael the Stammerer (Michael Ma-a Wa) gaw, Methodius hpe ning hkap nhtawm Antigoni Zinlawng de shaden kau ai majaw, dai zinlawng kaw sanit ning tup sa nga kau da wu ai.

A.D (842) ning du ai shaloi, Hkawhkam Kaba a gaida Jan Theodora gaw, Methodius hpe Constantinople mare na Saradaw Kaba lit dang ya sai. Methodius gaw, Saradaw Kaba lit hkap la ai hte rau San Pra ai Masha ni a Sumla hpe hkungga jaw ai masing hte seng nna, Zuphpawng Kaba “Council” shaga nhtawm, Nawku Hpung a Masing hpe masat shagrin la sai. Ndai masing hpe ahkyak kaba tawn ai kumla hku nna Lusha Gam Ladaw a Shawng shani na Laban Nhtoi hpe Feast of Orthodoxy “Galoi mung Tengman ai Makam Masham hte Seng ai Poi Nhtoi” ngu nna masat hpang dat sai rai nga ai.

San Pra ai Saradaw Methodius gaw, laika ka ai lam hta mung grai mying kaba ai. Shi ka da ai laika ni kaw na San Pra ai Theophanes a Labau “The Life of St. Theophanes” hpe hkum tsup hkra ka lang da ya nga ai. Shi gaw, Karai Kasang hte seng ai laika ni, ga shagawp ni hte Nawku Hpung hpe makawp maga ai laika ni law law ka kau da sai. Hpung masha ni grai tsawra hkungga manu shadan ai San Pra ai Saradaw Kaba Methodius gaw, A.D (847) ning, June shata (14) ya shani, Constantinople Mare hta, Madu kaw yup pyaw ban sa mat wa sai rai nga ai.

San Pra ai Saradaw Kaba Methodius n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, June shata (14) ya shani ngu masat shagrau dat ya sai rai nga ai.

Daini Nawku Hpung gaw, Constantinople Mare na San Pra ai Methodius a Poi Nhtoi hpe galaw nga ga ai aten hta, anhte a Prat hta Mung, kalang lang tinang hkap la da lu sai makam masham a majaw, ding bai ding na lam ni hte hkrum katut wa ai raitim, myit n daw n hten ai sha, matut shakut hkawmsa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)