San Pra ai Norbert a Poi Nhtoi (June 6) 06 June 2022

San Pra ai Norbert a Poi Nhtoi (June 6)

San Pra ai Norbert gaw, Madu a shaning (1082) ning hta Germany Mungdan, Cleves Mare kaw shangai chyinghkai wa nna, “Conons Regular of Premontre” Mying ai Magam Gun Wuhpung hpe gaw de da ya sai rai nga ai. Shi gaw, Ramma aten hta Mungkan a pyaw hpa len hpa hta hkan nna n ging n dan sha Deacon tai wa sai. Raitimung, Shi a asak (33) ning du ai shaloi, Gumra kaw na di hkrat ai majaw, ndum ndam rai mat nna nari hkum mi a hpang she bai dum wa wu ai. Dai shaloi, Shi gaw, Madu Karai hpe “Ngai hpe hpa galaw shangun mayu a ta” nga nna san ai. Dai shaloi, “N Kaja ai hpan kaw nna gale wa nna, kaja ai amu magam hpe galaw u, simsa lam hpe tam sawk u, lu hkra shakut u” (Turn from evil and do good, seek peace and pursue it.” nga ai nsen hpe shi na la wu ai.

Dai hpang Jau tai lu hkra Xanten mare kaw akyu hpyi shaja, jam jau hkawm shakut let, nga nga wu ai. Shi lu malu sutgan ni hpe, mung masha ni hpe gam jaw kau wu ai. Wa Sarabyin Gelasius kaw mara sa raw ai, dai shaloi, Wa Sarabyin gaw, shi hpe shi ra sharawng ai shara hkan Kabu Gara Shiga hkaw shabra na ahkaw ahkang jaw wu ai.

Madu a shaning 1121 ning hta Jau Norbert gaw, Shi a manang Jau Marai (13) hte rau grai shim ai Premontre hka-raw kaw Premontratensian Canons mying ai Magam Gun Wuhpung hpe sa hpaw hpang da wu ai. Wa Sarabyin Honorius gaw, dai Wuhpung hpe 1125 ning hta ahkaw ahkang jaw madi shadaw dat ya sai rai nga ai. Manga ning na ai hpang Jau Norbert hpe Sarabyin Honorius gaw, Magdeburg mare na Saradaw aya dang da ya wu ai. Saradaw lit shatsam ya hkrum ai majaw, Shi gaw, matsan mayan re ai buhpun hte Magdeburg mare de shang wa ai. Shaloi Saradaw jawng chyinghka sin ai wa gaw, shi re ai hpe n chye ai majaw, kaga mawhpyi ni hte rau sa nga matu hkap jahkring kau hkum nu ai. Shaloi shawa wuhpung gaw, “Shi gaw Saradaw she re” nga nna matawn ma ai majaw, hkrit let mau mat ma ai. Dai shaloi, Saradaw Norbert gaw, Chyinghka Sin ai wa hpe “Hpunau wa e, hpa n ra ai, Ngai hpe ndai shara de woi sa ai ni hta nang grau jaw ai hku nna masat la nga ndai. (Never mind, dear brother, you judged me more truly than those who brought me here)” nga nna tsun pru wa wu ai. Saradaw Norbert gaw, Saradaw tai wa timung, Tawra Jau ni a nga sa lai len hte maren sha, asim sha rai tara shadik nna nga nga wu ai. Shi gaw, Nawku Hpung kata na n kaja ai kasi ni, gram ra ai ni hpe gram galai na matu myit da ting let shakut lai wa sai rai nga ai.

Ndai zawn Saradaw Norbert gaw, Nawku Hung a Sasana Magam hpe shakut shaja nga ai aten, Madu a shaning 1134 ning, June shata (6) ya shani hta Madu kaw yup pyaw ban sa mat wa sai rai nga ai.

Saradaw Norbert n nga mat ai hpang, Madu a shaning 1582 ning hta gaw, dai aten na Wa sArabyin Gregory (13) kawn, Shi hpe San Pra ai Masha dang dat let, Shi a Poi Nhtoi hpe mung, June shata (6) ya shani hta masat shagrau dat ya sai rai nga ai.

Daini Nawku Hpung gaw, San Pra ai Wa Saradaw Norbert a Poi Nhtoi hpe galaw nga ga ai aten hta, anhte Hpung Masha ni mung, Wa Saradaw Norbert zawn, anhte a prat hta shut shai ai mara ni galaw kau hkrum timung, jet ai myit malai hte Karai Kasang Wa a hpang de bai gayin wa nhtawm, mai kaja ai asak aprat hte hkawm sa chye ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)