A Lu ai Richard Thirkeld a Poi Nhtoi (May 29) 29 May 2022

A Lu ai Richard Thirkeld a Poi Nhtoi (May 29)

A Lu ai Richard Thirkeld gaw, makam masham ngang kang ai lam hta kasi kamang rai nga ai. Madu Karai Kasang a majaw, rim hkrum nna sat kau krum ai aten du hkra kabu gara rai shi a asak hpe ap nawng kau nu ai.

A Lu ai Richard gaw, England Mungdan, Durham Mare kaw shangai chyinghkai wa nna, Oxford Dakkasu hta e laika hpaji sharin la lai wa sai. Asak ram kaba wa hkra Fransik Mungdan na Douai Rheims Jau Tai Dakkasu hta Jau ni hte seng ai hpaji hpe sharin hkaja la ngut nna Jau tai wa sai. Jau tai ai hpang, San Pra ai Jau Richard gaw, England Mungdan York ginwang kaw e, sasana magam gun lit shatsam ya ai hkrum nu ai.

A Lu ai Richard gaw, shana aten ha htawng masha langai mi hpe sa gawan ai majaw, n tsen ai hkrum nu ai. Jau re ai lam chye mat wa nna shi hpe York mare kaw na Kidocte htawng kaw sharawng kau ma ai. Jau Richard gaw, mara raw ya ai majaw, sat kau na matu daw dan ai hkrum nu ai. Raitimung, shi sat kau ai garai n hkrum shi yang, naw ngam nga ai htawng masha ni a mara ni hpe mung, Mara raw Sacrementu jaw kau da ya wu ai. A Lu ai Richard hpe masha ni n chye na hku, jen noi ai, dun garawt hkawm ai hpang sat kau ma ai. Masha yawng mayawng gaw, Wa Jau Richard hpe grai tsawra hkungga ai hkrai rai ma ai majaw, masha ni n chye na hku sat kau ai rai nga ai.

1583 ning hta shi a prat tup myit mada ra sharawng let, ayan akyu hpyi nga ai, “Makam masham a majaw, si hkam” mat wa nu ai.

Shi n nga mat ai hpang, 1886 ning hta, Wa Sarabyin Leo (3) gaw, shi hpe A lu ai masha hku nna masat shagrau dat ya sai rai nga ai.

Daini Nawku Hpung gaw, A Lu ai Wa Jau Richard Thirkeld a Poi Nhtoi Nhtoi hpe galaw nga ai aten hta, anhte mung Wa Jau Richard zawn, tinang lu da sai makam masham hpe kaning re ai shara hta raitim, kaning re ai jam jau lam ni hkrum sha wa ai raitim, gwi gwi hte sakse hkam lu ai, Hkristu a hpyen ma kaja ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)