San Pra ai Bede a Poi Nhtoi (May 27) 27 May 2022

San Pra ai Bede a Poi Nhtoi (May 27)

San Pra ai Bede gaw, English amyu sha ni kaw nna langai sha re ai Hpaji Ninghkring nga nna masat ya hkrum ai San Pra ai wa rai nga ai. Shi gaw, England Mungdan, Jarrow Mare kaw, lai wa sai A.D (673) Ning, hta shangai chyinghkai wa ai rai nga ai. Shi hpe Venerable “Hkungga La Ra Ging ai Wa” nga nna shi a San Seng San Pra ai majaw, masat shagrau ya nga ai re.

Shi a asak (7) ning du ai shaloi, shi gaw Wearmouth Mare kaw na, San Pra ai Petru yan Pawlu Tawra Jau Jawng kaw sa shang mat wa nu ai. Shi a prat hta kaga Jau jawng loi li kaw sa du yu ai hta lai nna, ngam ai aten ni hta, akyu hpyi ai, Tawra Jau ni a hkansa tara ni hpe sharin hka ja ai, Chyoi Pra ai Chyum Laika Sharin hka ja la nna, aten ni hpe shama wu ai.

Jau Bede hpe dai aten ni hta Hpaji machye machyang ning tawn dik ai wa nga nna, masat ya ma ai. San Pra ai Jau Bede gaw, grai manu dan ai Chyum Laika hte Labau Laika ni hpe ka kau da ya ai. Shi a shing gyim asak a hpang jahtum nhtoi (40) ya hta Kasa Yawhan ka da ai Kabu Gara Shiga hpe English ga hku nna gale kau da ya sai. Ga gale ngut ai hte “All is finished” Yawng Ngut Kre Sai, nga nna hpang jahtum ga tsun kau da ai.

A.D (735) ning, May shata (26) ya shani hta shi nga ai gawk na ga ntsa kaw “Kawa, Kasha, Chyoi Pra ai Wenyi kaw hkungga shakawn nga u-ga.” (Glory be to the Father, and to the Son and the Holy Spirit) ngu ai Shakawn Kungdawn akyu hpyi ga tsun kau da ngut ai hte Madu kaw yup pyaw ban sa mat wa sai rai nga ai.

Shi n nga mat ai hpang, 1899 ning hta, dai aten na Wa Sarabyin Leo (23) kawn shi hpe, San Pra ai Masha dang dat let, Shi a Poi Nhtoi hpe mung, May shata (27) ya shani masat shagrau dat ya sai rai nga ai.

Daini Nawku Hpung gaw, San Pra ai Bede a Poi Nhtoi hpe galaw nga ga ai aten hta, anhte Hpung Masha ni mung, San Pra ai Bede zawn tinang hpe Karai Kasang Wa jaw da ya sai dinghta asak prat hta mai kaja ai, manu dan ai magam bungli ni hpe galaw kau da lu ai ni byin tai lu hkra shakut sa wa nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)