San Pra ai Matthias a Poi Nhtoi (May 14) 14 May 2022

San Pra ai Matthias a Poi Nhtoi (May 14)

San Pra ai Matthias gaw, Madu Yesu Kashin Kamun hkam la ai shani kaw nna sumsing lamu de lung wa ai aten du hkra Madu Yesu hte rau ngai lai wa ai kasa langai mi rai nga ai. Madu Yesu sak hkrung ten  hta marai lahkawng hkawng rai nna shi a sasana machyen je na matu Shi Madu hkum nan lit shatsam ya ai, Sape (72) kaw na malawm wa mung rai nga ai.

Pentecost shani grai n du shi yang, Kasa Petru gaw, Kasa (11) akyu hpyi nga ai hpawng kaw, “Madu Yesu bai hkrung rawt wa sai a sakse tai na matu, Yuda Iskarut a shara kaw marai langai bai lata na ahkyak ai lam” tsun ai. (Kasa 1:21)

Dai majaw, Barsabbas hte Matthians hpe jawm lata yang, Matthias lata hkrup sai. Nambat (12) rai na matu, Yuda shara kaw marai  langai lata ai gaw, Ga Shaka Dingsa hta htinggaw (12) kaw nna nga pra hkrat wa ai Israel amyu sha ni a kumla rai nga ai. Israel nnan rai nga ai, Nawku Hpung hpe Madu Yesu hkum nan Kasa (12) hpe lit shatsam nhtawm de da ai lam madun ya nga ai.

Kasa Matthias gaw, Chyoi Pra ai Wenyi hkam la lu ai hpang, Kabu Gara Shiga hpe Jude mung kaw nna, Caspian Panglai du hkra hkaw hkam nu ai. Shi gaw, agung alau hpe dang kau lu na matu, hkum shan ra sharawng ai lam ni hpe koi gam ai gaw, ahkyak kaba re ai lam ahkyak tawn sharin ya ai. Ndai myit jasat hpe Madu Yesu kaw nna shi sharin la nna shi hkum nan hkan shatup lai wa sai rai nga ai.

Kasa Matthias gaw, shi sharin shalat ya ai masha shazai ni e n kaw n law di hkrum ai hpang, zingri shatsang hkrum nna Colchis mare kaw makam masham a majaw sat kau hkrum lai wa sai. Shi moimang hpe shaning law law Yerusalem mare kaw zing da ai hpang, San Pra ai Helen gaw, Roma mare de htawn makoi mayang da sai rai nga ai.

Daini Nawku Hpung gaw, Kasa Matthias a Poi Nhtoi hpe myit dum galaw nga ai aten hta, anhte marai hkum shagu hpe mung, Shi Madu Karai WA a magam gun na matu saw shaga lata la wa ai aten hta, ung ang lam n nga ai sha, gun hpai lu hkra myit masin ni hpe lajang shajin da nga ga law. 

By;

Sister Rose Angeline Maran Nang Doi (SFX)

RVA-Kachin Service (Myitkyina)