Wa Sarabyin: Sagu Rem Wa Kaja, Madu A Nsen Hpe Madat Let Shi A Hpang Hkan Ga

May 8, Laban shani, San Peter Shawa Pa hta, Regina Coeli Akyu Hpyi lamang a shawng, tara laika sharin lamang hta, Wa Sarabyin Francis, Sagu Rem Wa Kaja, Madu A Nsen Hpe Madat Let Shi A Hpang Hkan Nang Ga, ngu tsun da nga ai.

Si mani tsawm htap ai hkrang shapraw ai sagu rem wa gaw shi a sagu hpung ni hte rau rai nga ai. Karai a shagu hpung ni gaw Shi a nsen hpe madat ma ai, Shi hpe chye ma ai, Shi a hpang hkan nang ma ai, ngu Wa Sarabyin Francis, Chyum Laika hpe lakap nna sharin shaga da ai.

Madat nna na la mu!

Chye la mu!

Hkan nang mu!

Ndai ga si masum gaw Sagu Rem Wa Kaja Laban shani a Kabu Gara Shiga a ahkyak dik kri madun shiga rai nga ai.

Karai Kasang hta kam hpa kam shamyat ai ni yawng a mahkrum madup gaw grai tsawm htap nga ai. Karai Kasang gaw Shi hkum hpe shi madat ai; anhte Shi kaw akyu hpyi shagu madat ya ai; Shi hta kam hpa kam sham myit hte shaga shagu madat ya ai.

Karai Kasang Gaw Shi A Sagu Hpung Hpe Chye Ai

Yesu Madu hpe madat mara ai ni hpe Karai Kasang chye ai. Karai Kasang gaw anhte a lam chye ai; kata lam, ntsa lam yawng chye ai.

Yesu Madu gaw, anhte a hku hkau lam, kam myit, tsawra myit, ginlung kahkyin gumdin lam ni hpe, tam nga ai.

Dai gaw anhte hpe chye na ya na, hkap la ya na matu rai nga ai. Anhte a ntsa, Shi a tsaw ra ai gaw galoi mung arai nga ai. Kadai hpe mung shingtai n kau da ai. Dai gaw Yesu Madu a tsaw ra myit rai nga ai.

“Sung htum ai nsin hta ngai lai hkawm mat wa ti mung; nang ngai hte rau nga nga ndai majaw, Madu e, ngai hkrit na nngai n rai. Hpa majaw nga yang, na a sagu rem daw hkrawng hte sumdoi gaw ngai hpe makawp maga ya nga ai.” (Shk.Kd 23:4)

Karai Kasang gaw anhte a nni nkri lam, yak hkak jam jau lam, shakut shaja ra ai lam ni yawng hpe hkam jan lu shangun ai. De a majaw anhte gaw Karai Kasang a tsaw ra ai hpe chye na hkap la lu ga ai.

Madu Karai Kasang hpe anhte a prat a myit masin hta shang ningngai nga na ahkang jaw ga ai rai yang gaw anhte a mayak jam jau hkam sha lam yawng hpe jahkoi kau ya na; shaloi Shi anhte hte nihtep nga ai hpe hkam sha lu na; Shi anhte hpe si mani ai, myit galu kaba ai hte tsaw ra matsan dum lama nga ai hpe hkam sha lu na ga ai. Dai gaw Sagu Rem Wa Kaja nan rai nga ai.

Sagu Rem Wa Kaja A Hpang Hkan Nang Ga

Karai Kasang a hpang hkan ni teng yang gaw Shi hkawm sa ai pandung lam de Shi hte rau hkan nang ma ai. Sagu rem wa kaja ni gaw mat mat ai sagu ni hpe matsan dum tsaw ra myit kaba hte lakawn lawan lanu lahku la lu hkra hkan tam ma ai.

“Shanhte gaw mat mat ai shagu ni hpe hkan tam na matu rawt sa ma ai” (Lk 15:4). Shanhte hte tsan ai shara de du mat ai ni hpe maja let bai shani la ma ai. Kaw si hpang gara, machyi hkam sham nga ai ni hpe jahkru shakat tsi gawn lajang ya ma ai.

Shanhte gaw hkrap myipri hte rai nga ai sagu ni kaw du hkra sa nna shanhte hte rau hkrap rau hkam sha let shalan shabran ya ma ai. Shanhte a lata ladawn let lakawn la nna nihtep htingbu ni hte shani ya ma ai. Shanhte a lahpa hta mara let woi la ma ai.

Wa Sarabyin Francis, ndai Paska Ladaw hta (4) ngu na laban, Sagu Rem Wa Kaja Laban Shani, ndai mungga htawn ngut ai hpang Kanu Nu Maria gaw, anhte ni Hkristu Madu hpe madat mara let shi hpe grau grau chye chyang let Shi a hpang hkan nang nna ra kadawn ai ni hpe daw jau sa wa lu na matu, akyu hpyi htinglu htinglai da ya ai.

By Fr. Patrick Gawmaw Hkawng Yae

https://www.vaticannews.va/en/pope/news/2022-05/pope-at-regina-coeli-hear-and-follow-the-lord-our-good-shepherd.html