San Pra ai Stanislaus a Poi Nhtoi (April 11)

San Pra ai Stanislaus gaw, Madu a shaning 1030 ning, July shata (26) ya shani, Poland Mungdan, Sezepanov Mare kaw shangai chyinghkai wa ai rai nga ai. Shi a kanu yan kawa gaw, shi hpe Karai Kasang kaw ap da ma ai. Kaja wa mung, Kanu yan Kawa n nga mat ai hpang, shi lu ai ja sut gan kumhtaw ni hpe matsan masha ni hpe gam garan jaw kau da nhtawm, Karai Kasang a Hpaji hpe sharin hkaja la mat wa nu ai.

Krakow Mare na, Saradaw Lampert gaw, Stanislaus hpe Jau tai aya hkam ya sai. Dai Saradaw Lampert n nga mat ai hpang, 1072 ning hta, Saradaw a hkang galai shatsam ya ai hpe hkrum nu ai. Dai zawn, Saradaw Stanislaus gaw, shi a Sagurem lit magam gun la ai hpang, Jau Ginwang shagu hpe shaning shagu sa du gawan hkawm lai wa sai. Jau ni, Hpung Masha ni hpe wenyi myit jasat nnan hte sharin shakyang ya ai, matsan ai ni hpe alak mi rai nna garum jaw ya sai. Matsan masha ni hte gai da gai na ni a mying jahpan galaw tawn da nna nnan garum jaw lai wa sai rai nga ai. Shi a jawng wang gaw, matsan masha ni aten tup law taw ai sharai tai wa sai.

Dai aten hta gaw, Poland Mungdan hpe Hkawhkam Boleslaus (2) kawn up hkang ai aten mung rai nga ai. Dai Hkawhkam wa gaw, dinghku num langai mi hpe kashun la tawn nna pyaw len nga ai majaw, Saradaw Satanislaus gaw Hkawhkam hpe num ai tara n shang ai amu hte seng nna laja lana rai mara shagun ai hte Nawku Hpung kaw nna shapraw kau wu ai.

Krako Mare na, Cathedral Nawku Htingnu de hkawhkam wa du sa ai shaloi, Saradaw Stanislaus gaw, Nawku nga ai hpe jahkring kau nhtawm, Mare shinggan na Nawku Jawng kaji de Misa sa galaw mat wu ai. Dai shara de, Hkawhkam Wa hkan sa wa nna, dai shara kaw nan Saradaw Stanislaus Misa Hkungga Nawng Jau nga ai kaw sat kau da nu ai. Hkawhkam wa a hpyen la ni gaw, Saradaw a hkum hpe daw daw rai kahtam daw nhtawm, matse labye dusat ni hpe kabai jaw kau ma ai. Ndai mabyin gaw, Madu a shaning 1079 ning, April shata (11) ya shani byin lai wa sai rai nga ai. Saradaw n nga mat ai aten, Shi a asak (48) ning du sai rai nga ai. Saradaw Stanislaus a nrut nra ni hpe Krakow mare kaw na, Cathedral Nawku Htingnu kaba kaw makoi mayang da ma ai.

 Saradaw Stanislaus n nga mat ai hpang, Madu a shaning 1253 ning, September shata (17) ya shani, dai aten na Wa Sarabyin Innocent (4) kawn, Shi hpe San Pra ai Masha dang dat let, Shi a Poi Nhtoi hpe mung, April shata (11) ya shani masat shagrau dat ya sai rai nga ai.

Daini Nawku Hpung kawn, San Pra ai Saradaw Stanislaus a Poi hpe galaw nga ai aten hta, anhte mung, Nawku Hpung hte n htan shai ai magam lam ni hpe tsep kawp n galaw ai sha, Nawku Hpung a sharin shaga lam hte hkrak hkan sa shatup lu ai ni byin tai lu hkra shakut sa wa ga ngu, n gun jaw let, gam garan ya dat lu n ngai law.

By;

Sister Rose Angeline Maran Nang Doi (SFX)

RVA-Kachin Serivice (Myitkyina)