Kashin Kamun Mying hpe gara hku lata ra na rai?

Kashin Kamun Mying hpe gara hku lata ra na rai?

Kashin kamun hkam ai gaw, Kahtawlik hpung a makam hta Sakramentu chyeju kaba langai rai nga ai. Shaman da ai kashin kamun hka hte kashin kamun hkam la na wa a baw hta jaw ya let npawt shut hpyi mara hte tinang hkum nan shut hpyi mara ni hpe kashin kau ya ai; hkrungrawt lu ai chyeju jaw ya ai; kashin kamun hka hta kalang bai shangai ya ai; Kashin Kamun mying hpe jaw ya ai. Kanu Kawa ni ma hpe shangai ai hte mying jaw ai zawn sha, Nawku Hpung hta Kashin kamun hka hte bai shangai la ai hta mung kashin kamun mying jaw ai rai nga ai. Kashin kamun mying gaw San pra ai masha ni a mying hpe la nna jaw ai rai nga ai. Kashin Kamun mying hpe San pra ai masha hku nga pra lai wa ai ni a mying hpe mung mai jaw ai ngu shawng na nawku hpung woi ni n-gun jaw lai wa ai. Raitim, dai mying hpe lata ai shaloi, atsawm hkrak sawk sagawn da lu ai ni a mying rai ra ai; dinghpring dingman ai, Karai Kasang a hpang hkan ai, Shi hta kam sham myit kaba ai, dai zawn re kasi la hpa shara nga ai ni, mying kaja ai ni, shani shagu na prat hta Karai Kasang myit ra ai hte dinghpring dingman lam hta, makam masham hta htep lahti rai hkawm sa ai ni a mying rai ra ai ngu matsun da ai.

Kashin kamun mying jaw na rai yang, tinang jaw na mying madu wa, San pra ai hku nga sa ai shani shagu na prat hpe shawng shagawn ra ai. Masha law malawng gaw Chyum laika hta rawng ai ni a mying hpe madung la nna jaw kam ma ai. Dai tinang jaw mayu ai san pra ai mying madu wa a prat hpe sawk sagawn sumru let dai tinang kamhpa ai, katsi kaman la lam ni hpe tam sawk sagawn ra ai. Shaloi she, dai san pra ai mying madu wa zawn, hkam la ai wa kasi la nna sak hkrung hkawm sa na rai nga ai. Dai San pra ai wa mung, shi a kasi kamang mung dai hkam la ai wa hpe lam woi madun ya na rai nga ai. San pra ai ni a lam hpe galoi mung sawk sagawn nga ra ai.

Hkristan manu sari hte makam masham hta ngang kang ai nawku daw jau lam ni hte htuk ai mying hpe lata ra ai. Nawku Hpung kaw nna hkap la ai San pra masha a mying hpe n re ai kaga masha mying ni hpe n mai hkam la ai.

Kashin kamun hkam ya na wa, shing n rai, Jau langai ngai hpe san sagawn la ra ai. Na a kashin kamun mying, shing n rai, kasha ni a kashin kamun mying hpe lata la lu na matu Jau ni hpe san sagawn la ra ai. Shi gaw nang hpe kaja dik hpaji jaw, hkyen lajang ya lu ai wa rai nga ai.

Wenyi kanu kawa ni kaw na hpaji hpyi la ra ai. Kashin kamun hkam ai hta wenyi kanu kawa lawm ra ai. Shanhte gaw dai kashin kamun hkam la na wa hpe wenyi lam hta kanu kawa ni hte kashin kamun hkam na ma hpe woi awn lam madun ya na matu rai nga ai.

Makam masham labau hte tinang dinghku a shawng lam a matu sawn dinglik da ra ai. Nkau kun dinghku kanu kawa ni gaw shanhte a nta masha ni hpe shanhte hkum nan ra sharawng ai, shing n rai, hkungga ai ni a mying hpe jaw mayu chye nga ai. Nawku hpung a matsun hte hkrak jaw ra ai hpe myit dum ra ai.

Kashin kamun hkam la, kashin kamun mying shamying la sai wa gaw ningnan re ai makam masham hta sak hkrung hkawm sa ai kasi kamang hte kumla tai nga ra ai. Kaga sakramentu ni hpe bai matut hkam la lu na matu hkyen lajang sa wa ra ai. N-gun shaja bai hkam la ai shaloi mung, n-gun shaja mying bai mai hkam la ai. Dai hta, kashin kamun mying hpe sha matut la mai ai zaw, kaga san pra ai ni a mying langai ngai hpe bai mai la ai.

Hkristan makam hte, shing n rai, nga sat nga sa hte nhtan shai ai ni a mying hpe gaw galoi n mai hkam la ai. Ga shaka dingsa prat, ga shaka ningnan prat, kade nna shi ai prat hta na nawku hpung e san pra masha tang da sai ni a mying, Lamu kasa ni a mying ni hpe la mai ai. Trinity Karai Kasang a mying hpe la mai ai ngu gaw n tsun da ma ai. Raitim, kashin kamun hkam la ai ni yawng gaw dai Trinity Karai Kasang a mying hte sha hkam ai rai nga ai. Dai Trinity mying rai nga ai, Kawa, Kasha, Chyoi Pra ai Wenyi a mying hte n rai yang kashin kamun mung n awng ai rai nga ai.

Kashin Kamun mying la ai shaloi, dai mying madu wa nawku hpung a sharin shaga ai hte n htan shai ai wa rai yang, dai masa hpe gaw nawku hpung kawn myit n hkrum ai, n-gun n jaw ai, n hkap la ai rai nga ai.