Lusha Gam Ladaw Laban ( 5 ) Ya Shani Cardinal Charles Bo Hkaw Tsun Ai Mungga

Dai ni na kabu gara ai shiga hta, shut hpyit ai num sha langai a lam, dai num sha a shut lai wa sai prat hpe Madu Yesu sharai ya dat nna, kabu gara ai shiga sake hkam ai num sha langai byin tai wa ai lam hpe na la lu nga ga ai.

Wa Sarabyin Francis gaw, amyu shayi num ni, ahkaw ahkang lu la na lam ni hte seng nna, grai n gun dat galaw nga ai Wa sarabyin re. Shawng nnan na Christian ni hta, lak lai ai magam lit ni, galaw gun hpai lai wa ai amyu shayi num ni a lam ni hpe, Wa Sabyin chyahkring hkring tsun shadum lam galaw ai.

Nawku hpung a magam lam hta amyu shayi num ni a, lit lamang ahkyak ai lam hpe, loi tsun mayu ai.

Anhte a Asia dan hta, sasana galaw nga ai amyu shayi num ni law law nga nga ai. shamai shatsai ya ai sasana magam hta shang lawm galaw nga ai amyu shayi nurses, doctors ni law law. Mama ni law law nga nga ai.

Manam daw manam hkalum ai sasana magam hta shawng lawm nga ai amyu shayi num ni mung law law nga ai. Jam jau hkrum nga ai num sha ni hpe hkalum lakawn la lam galaw ai, grau nna dut hpaga galaw hkrum ai majaw htenza mat ai num sha ni a prat hpe bai gaw gap ya ai sasana lam ni hta shang lawm gun hpai nga ma ai.

Simsa lam, gaw gap ai sasana magam hta shang lawm nga ai num sha ni mung law law nga nga ai. Lama na, anhte a Mungkan hpe amyu shayi num ni up hkang woi awn ai rai yang, majan ngu ai nnga na re, Ukraine majan zawn re ai ni n byin pru na re, nga nna tsun ai lam pyi nga nga ai. Majan mang hkang byin nga ai shara buga ni hkan, simsa lam nga wa hkra shawng de tsap nna, woi awn shakut nga ai Kahtawlik amyu shayi num sha ni law law nga nga ai.

Shinggyim bawng ring sasana magam lam ni hta nga yang mung, amyu shayi num ni shawng lam hta tsap nna shang lawm nga ma ai.

Tinang a asak aprat hpe ap nawng let, Madu Yesu a tsawra lam hpe sakse hkam nga ai, Mama ni, mungkan ting hta rai rai, sen 7 daram nga nga ai.

“Amyu shayi num ni nlawm ai nawku hpung gaw matsan mayan re ai nawku hpung re” nga nna Wa Sarabyin Francis tsun ai. Amyu shayi num ni a lit lamang, nawku hpung hta grai ahkyak ai lam hpe mung, Wa sarabyin Francis kaw nna chyahkring hkring tsun shadum lam galaw nga ai.

Wa Sarabyin Francis matsun shadum ai, Kabu gara ai shiga shachyam shabra lam galaw ai masha ni hta, nga ra ai atsam ning ja ni gaw:  

• N gup aga hte galu galang hkaw tsun lam nrai, asak aprat hte sakse hkam nga pra ai;
• Tsun shaleng dan ai masa nrai, kaja wa ta tut Madu Yesu hte hkrum kadup lu hkra garum ya ai;
• Kabu gara shiga shachyam shabra lam galaw ai hta, kabu pyaw ai. Kabu gara ai shiga shachyam shabra ai masha ni a, myi man gaw, lup wa de nna bai wa ai myi man zawn nrai;
• Sharawng awng ai myit hte pru hkawm sa nna, machyi makaw hkala nba hkrum ai ni hpe gawn lajang ai, Sagu sama hte bai nhtang wa ai nawku hpung rai ra ai;
• A babysitter church, ma woi ai Nawku hpung nmai byin shangun ai nga nna Wa Sarabyin tsun ai. Sasana majen je lam galaw na n sharawng ai, nga nga sai hpung masha ni hpe chyu sha, lakawn nna nga mayu ai Jau ginwang ni hpe, A babysitter church, ma woi nna nga ai nawku hpung, ngu nna Wa sarabyin tsun shamying ai;
• Sasana majen je lam galaw ai nawku hpung gaw, Madu Yesu hpe chye sai masha ni a lapran hta chyu sha, shanu nga ai masa n nre ai sha, de a shing gan de pru hkawm sa ai; chyum laika hta na Zacchaeus, Nicodemus the Samaritan num sha ni zawn rai ra ai.

Asia dan hta sasana majen je lam awng dang na matu gaw, tinang hkaw tsun mayu ai masha ni hte hku hkau lam gaw gap la lu ra ai; Christian makam masham hpe, atik anang hpung masha shatai la mayu ai makam masham uhpung ngu ai masa, masha ni mu mada kau ya ma ai hpe shaning law law hkrum lai wa saga ai.Evangelical nawku hpung nkau mi a majaw mung rai na re.

Raitim mung, Vatican II a hpang kaw nna, Cahtolic nawku hpung a sasana majen je lam masa gaw, shinggyim masha yawng a atsam ni hpe hkungga manu shadan ya ai, shinggyim sari hpe hkungga manu shadan ya ai masa rai nga ai. Shinggyim masha ni a kabu gara ai lam ni gaw nawku hpung a kabu gara ai lam ni, shinggyim masha ni a myit ru myit tsang lam ni yawng gaw nawku hpung a myitru myit tsang lam ni re, ngu ai masa rai nga ai.

Dai ni na aten, kabu gara ai shiga shachyam shabra lam ngu nna tsun ai shaloi, hpung masha shalaw la lam ngu ai masa sha nrai, dai hta grau dam lada ai masa mu mada chye na matu nawku hpung sharin shadum ya nga ai. Ndai lam ni hpe, Evangelii Nuntiandi, Redemptoris Missio ngu ai nawku hpung a matsun laika ni hta sharin matsun da ya nga ai. Sasana galaw ai ngu ai gaw, Wenyi lam, makam masham lam ni hpe sharawt ya ai magam lam ni sha nrai, shinggyim masha ni a hkum hkrang hte seng ai rawt jat bawng ring lam, sut masa rawt jat lam ni yawng lawm nga ai, ngu ai hpe nawku hpung a sharin matsun lam ni hta mu lu nga ai.   

Hkumtsup ai sasana majen je lam ngu ai gaw, shinggyim masha yawng a hkumzup ai hkye hkrang la ai lam hte, lawt lu lam, ngu ai lachyum rai nga ai.       

Homily by Cardinal Charles Bo