Ga Shaka Dingsa na masha ni hpe San Pra masha tang ai lam nga ai kun?

Ga Shaka Dingsa na masha ni hpe San Pra masha tang ai lam nga ai kun?

San Pra ai masha ngu Nawku Hpung a masin masa, mahkrun lam hte hkrak sawk sagawn nna tang ai lam gaw n nga shi na masa hta nga ai. Hpa majaw nga yang Nawku Hpung a masin masa, mahkrun lam hte sawk sagawn na labau sagawn n mai byin ai majaw rai nga ai. Shanhte a lam chyum laika hta tsun da ai hta lai nna, bai “traditional belief” ngu ai jiwa ni tsun hkrat wa ai lam ni asan sha sawk sagawn la n mai ai majaw mung rai na re. Raitim shanhte hta na n kau ni gaw San Pra masha tai mat ai ngu hkam la let San pra masha ngu hkinghtawng mying hte shamying da ai lam ni gaw nga nga ai. Dai gaw chyum laika hta rawng ai hte maren shanhte a makam masham hte dinghpring dingman ai prat ni hpe sagawn nna masat shamying da ai rai nga ai. San Pra masha mying jahpan hta Lamu kasa ni a mying ni mung lawm nga ai. San Pra ai Michael, Raphael, Gabriel,

Ga Shaka Ningnan prat hta gaw Chyoi Pra ai Wenyi yu hkrat wa ai shawng hta Madu Yesu hpe kam sham ai a majaw sat kau hkrum ai ni hpe mung san pra masha tang ai hpe mu lu ga ai. Dai majaw, Nawku hpung gaw, Ga Shaka Dingsa prat na masha ni mung San Pra masha mai rai nga ai ngu nna mung hkam la ai rai nga ai.

Kahtawlik nawku hpung hta san pra masha ngu masat hpang wa ai gaw Madu Hkristu shangai ai hpang, Shi a hpang hkan, shi hpe kam sham ai a majaw Roma hpyen ni e zingri sat hkrum ai ni hpe masat masa galaw san pra masha hku tang hpang ai kaw nna rai nga ai.

Abraham ngu ai mying hte San Pra masha tang hkrum ai wa gaw AD 366, tsan ban mali ngu na aten a Jau hte Yate rai nga ai Kidunja (or Kindunaja) kaw na Abraham the Great ngu ai wa rai nga ai. Shi hpe Kahtawlik, Eastern Orthodoxy hte Oriental Orthodoxy makam hpung ni San pra masha hku hkap la ai rai nga ai. Ga shaka dingsa prat hta na masha ni kaw nna Karai Kasang a hpang hkan ai dinghpring dingman ai ni, sumsing mungdan hta ningngai nga na sai ngu hkam la lu ai ni hpe San pra ai ni a jahpan hta bang da ma ai. San pra ai hkinghtawng mying jaw da ma ai. Shanhte a shani shagu sak hkrung lam hta makam masham hte dingman dinghpring ai hku sak hkrung nga ai hpe masam maram nna masat da ai rai nga ai. Ga shadawn Abraham hpe Nawku hpung a makam hta teng man ai makam kawa hku hkap la da nga ai. Jiwoi Jiwa ni hte Myihtoi ni e, anhte a matu akyu ara hpyi ya rit ngu San pra ai ni a latany akyu hpyi ga hta lawm nga ai. Dai hpe maram yu yang nan Ga Shaka dingsa prat na dinghpring dingman ai hte Karai Kasang a hpang hkan ai hpe san pra masha hku hkap la da ai dan dawng nga ai.

Tsaban 17 aten hta sawk sagawn masat da ai San pra ai ni a jahpan hta Ga Shaka Dingsa prat na Myihtoi Isaiah, hte Habakkuk, Daniel, hkawhkam David hte Abraham ni mung lawm nga ai. Hpang daw de Nawku hpung kawn masam maram let jat bang la ai mying ni mung naw nga nga ai. Raitim, shanhte a poi nhtoi ni hpe gaw laksan masat da ai lam n nga ai hpe mu lu ga ai.

Myu shayi ni hta na, Nawku Hpung a masin masa, mahkrun lam hte hkrak rai nna, shawng ningnan San Pra masha tang hkrum ai wa gaw Sweden mungdan hta nga ai, AD 926 shaning hta n nga mat ai. San Pra ai Wilborada rai nga ai; 1047 shaning hta Wa Sarabyin Clement II e tang ya ai rai nga ai. Shi a poi nhtoi gaw May shata 2 ya shani rai nga ai. Shi gaw Switzerland mungdan hta San pra ai Wiborada gaw laili laka hte seng ai shara (libraries) ni hte dai hpe yu reng ai (Librarians) ni a kamhpa shara ngu hkam la da ai rai ma ai.