Egypt Mungdan na San Pra ai Yawhan a Poi Nhtoi (March 27)

 Egypt Mungdan na San Pra ai Yawhan a Poi Nhtoi (March 27)

Egypt Mungdan na San Pra ai Yawhan gaw, Tsa ban (4) ram hta sak hkrung nga lai wa ai, San Pra ai masha rai nga ai. Shi gaw, ruyak jam jau hkam sharang ai, grau nna Lusha Gam ten hta hkangalaw ai masing gaw, masha ni a matu, kasi kamang tai lai wa ai. Shi gaw, mungkan ga ntsa na ja sutgan mahkra hpe shingdu gayin tawn kau da nhtawm, akyu hpyi shaja ai, makam masham lam hte seng nna myit sumru yu ai hte ru yak jam jau hkam sharang nna sak hkrung ngai lai wa sai rai nga ai.

San Pra ai Yawhan, Shi a asak (25) ning du ai shaloi, shi a daidaw buga makau, Egypt Mungdan a dingdung maga kaw na bum langai mi kaw tawra sa shakut let nga lai wa ai. Dai shara kaw asak kaba sai tawra langai mi gaw, shi hpe madat mara myit hte tinang hkum hpe nyet kau ai myit jasat ni hpe sharin dawk bang yaw u ai. Shi a Tawra Sara n nga mat ai hpang shi gaw, dai bum ntsa na bunghku langai mi sha nga ai sumde htawt let tara shakut nga ai. Shi gaw, bai mi hta manga ya tup akyu hpyi myit sumru yu nna, aten shama wu ai. Bat (6) ya hte Laban shani gaw, shi kaw hpaji sa hpyi shajang ai masha wuhpung nau law ai majaw, shi gaw jarawp langai mi gap da wu ai.

San Pra ai Yawhan gaw, machyi ai ni hpe tsi shamai ai, mabyin lam tau hkrau tsun ya ai, lamik kumla madun ai, shi kaw sa ai la ni a makoi magap tawn ai shut hpyit mara ni hpe chye ya lu ai hpe atsam ni a majaw myit kaba lai wa sai rai nga ai. Masha ni law law gaw, shi a kasi kamang hpe hkan sa shatup ai akyu ni hpe hkam la lu ma ai.

San Pra ai Yawhan gaw, A.D (394) ning, Shi a asak (90) ning hta hputdi di let akyu hpyi nga yang, Madu kaw yup pyaw ban sa mat wa sai rai nga ai.

Shi n nga mat ai hpang, Nawku Hpung gaw, Shi hpe San Pra ai Masha dang dat let, Shi a Poi Nhtoi hpe mung, March shata (27) ya shani ngu masat shagrau dat ya sai rai nga ai.

Daini Nawku hpung gaw, Egypt Mungdan na San Pra ai Yawhan a Poi Nhtoi hpe galaw nga ga ai aten hta, anhte a sak prat hkrun lam hta mung, kade mi ruyak jam jau hkrum katut ai raitim, Karai Kasang hpe n malap kau ai sha, akyu hpyi n gun la let, matut nna hkawm sa lu hkra shakut sa wa ga ngu nna, n gun jaw gam garan ya dat n ngai law.

By;

Sister Rose Angeline Maran Nang Doi (SFX)

RVA-Kachin Service (Myitkyina)