Hpa majaw chyum laika, mahkawn buk ni mari la yak mat a ta?

Ga San: Shawa mahkawn buk amyu myu nga taw ai. Lashio Sasana de lang ai gaw, shawng dip shapraw ai, Myitkyina Sasana hta lang ai gaw hpang jahtum dip shapraw ai lang taw nga ga ai. Ya gaw gara hpan mung n lu mari mat sai, mahkawn buk mung je ma wa sai. Sasana laika seng san yu yang n dut mat sai da. Hpa majaw chyum laika, mahkawn buk ni mari la yak mat a ta? Chye mayu dik ga ai. Chyeju hte naw htai ya rit. Muse Jau Ginwang, Nam Hkam mare, Mung-wi buga, Pying Hkam lawk na, ya ten Myitkyina PLN (1) kaw du taw nga ai Sara Luka Lasang Brang Tawng a ga san hpe htai ya na n ngai.

Nawku Mahkawn Buk hte seng nna gaw mayak lam amyu myu nga nga ai. Mahkawn buk htuk shapraw ai hta lawm ai ni hpe san yang dai mayak lam ni hpe grau chye na ya lu ga ai. Wa Jau gaw ndai hpang jahtum lang na hte de a shawng lang na mahkawn buk galaw shapraw ai hpe gaw dep dat ai. De a shawng na lang ni htuk shapraw ai gaw n dep, n mu, n chye dat lu ai.

Ndai ngai dep dat ai lahkawng lang kaw lawm ai ni jahta dan ai hta mayak lam law law chye la lu ai. Moi na nawku mahkawn buk hpe bai gram ai ngu ai hta mahkawn nnan ni bai bang jat ai, shut ai laika si ni hpe bai sharai jahtuk ai, nsi note ni hpe bai sharai jahtuk ai, ndai lam lam ni nga ai hpe chye lu ai.

Dai mahkawn buk byin wa hkra wuhpung ni hpe hpaw ninghtan ma ai. Mahkawn ningnan shalat ai ni gaw shalat, laika si hpe maram ai ni gaw maram, nsi note hpe bai jep maram ai ni gaw maram rai ma ai.

Dai zawn galaw ai hpe mung law malawng gaw rau hpawng de nna jawm galaw ma ai hpe mu chye lu ai. Bawng ban hpawng ni hpe mung lang hte lang galaw lai wa ma ai.

Saradaw Sasana masum rau jawm lang na matu yaw shada nna galaw ai re majaw gaw dai Saradaw Ginwang masum kaw nna jinghpaw laili laika chye ai ni rau jawm hpawng de rau jawm galaw ra ma ai. Laika si, nsi note, laika man tawn shara, ladaw hte ladaw, akyu hpyi ga, mahkawn mangwi ni hpe tam la yu la loi na matu masam maram jahtuk ma ai. Dai lam ni yawng ngut jang dai laika buk hpe bai jep ma ai. Shanhte hkum nan jep ngut jang kaga masha ni hpe laksan bai jep shangun ma ai. Ndai tsang ni hte Saradaw Ginwang masum jawm galaw ai re majaw gaw matut mahkai, hkrum bawng ban na aten masa yak ai lang mung law law nga ai majaw nhtoi bai sit lai ai lam ni mung law law lang nga lai wa na masa hta nga ai.

Tsang hte tsang galaw tim ra rawng ai lam gaw bai nga taw rai nga ai majaw yawng ra sharawng ai hku htuk shapraw lu na matu daw dan ai shangut lu na aten galu mat ai masa hta nga ai. Laika dip shapraw ai hta mung anhte a buga hta gaw madang tsaw laika dip jak rung (press) n nga ai majaw dai nga ai shara de matut mahkai nna htuk shapraw ra ma ai. Laika buk htuk shapraw ai hta mung dai jak rung kaw nna n law htum masat da ai madang n du yang n htuk shapraw ya ai rai nga ai.

Mahkawn buk htuk shapraw shagu, dai mahkawn buk a matu laksan alu n masat da ai majaw gaw kaga ga baw hte re ai alu ni kaw nna gan jai lang ra na masa hta mung nga ai. Mahkawn buk kalang htuk shapraw shagu press kaw hkrat ang ai madang hte htaw wa htaw sa shabrai ni hpe sha jahtuk nna bai shabra ai re majaw gaw amyat law law n nga ai lam mung chye lu ai. Dai majaw hpang kalang bai dip shapraw na matu mung kaga ga baw hte re ai alu ni hpe sha bai jai lang lang di ra ai masa hta nga taw ai majaw dai hpe jahtuk bawng ban ra ai lam ni mung nga nga ai. Langai mi gaw, mahkawn buk hpe dut shabra ai hta ginjaw de dai hkrat ang ai hte bai n du ai, hpang hkrat nna she du ai lam ni mung nga ai masa hta nga ai. Bai sasana ginra nkau ni hta manu shabrai n la ai sha garan jaw ai lam kaji kajaw mung nga ai lam chye lu ai.

Mahkawn buk hpe dut shabra ai hta ginjaw kaw nna masat dat ai gaw shawng de tsun sai hte maren, amyat n shakap ai daram rai nga ai. Ndai gaw ngai mu mada ai hpe tsun ai rai nngai. Ya hpang jahtum na mahkawn buk hpe htuk shapraw na matu press de ap da sai lam gaw na lu ai. Kade nna yang mahkawn buk ningnan lu la na rai nga ai.

Laika buk seng ni hta mahkawn buk, chyum laika buk hte nawku hpung hte seng ai kaga laika buk ni n nga wa ai mung, mi tsun dan sai hte maren, version kalang htuk shapraw ai hpang bai htuk shapraw na hta mari na masha kade nga na, lu dut na kun, n lu dut na kun, dai hte seng nna fund nga ai kun, n nga ai kun amyu myu maram yu nna bai n htuk shapraw lu shi ai masa lam ni a majaw rai na re ngu kam ai.

Ndai ram mi hte htai ya let, Nawku Hpung makam masham hte seng ai laili laika gyin shalat, htuk shapraw ai hta masan sa lawan ladan galaw shapraw sa wa lu na matu akyu hpyi hpaji jaw shang lawm nga ga ngu saw shaga dat nngai.