Hkrung Rawt Ai Lam Hpe Kam Ai Makam Gaw Si Hkrung Si Htan Lam Hpe N Hkrit N Tsang Ai Hte Hkap La Lu Shangun Ai Nga Nna Wa Sarabyin Tsun Ai

Wa Sarabyin: Hkrung Rawt Ai Lam Hpe Kam Ai Makam Gaw Si Hkrung Si Htan Lam Hpe N Hkrit N Tsang Ai Hte Hkap La Lu Shangun Ai

  February 9, bat masum ya shani, bat shagu, bat masum ya shani galaw ai, hpung shawa masha ni hte hkrum shaga ai lamang hta, Wa Sarabyin Francis, Hkristan masha ni hkrung rawt ai lam hpe kam sham myit tawn da let si na hpe n hkrit n tsang hkap la ga, ngu n-gun jaw da ai.

  Hkristan makam masham gaw si hkrung si htan kaw nna lawt lu ai n rai tim, dai si na hpe hkam la gwi ai atsam hte myit masa hpe jaw ya ai.

  San Yawsep gaw Nu Maria hte Madu Yesu a yu lakawn ai hta angwi apyaw rai kaja ai hku si wa lu ai. San Yawsep gaw  atsawm sha si wa ai zawn shi hta kam hpa ai ni mung si na hpe n hkrit n tsang ai sha makam ngang kang, Yesu a nni nkri hta jawm pawng ai lam re hpe myit dum let si wa na matu kamhpa shara mung rai nga ai. Angwi apyaw rai si wa lu na matu San Yawsep hpe kam hpa nga ga, ngu Wa Sarabyin Francis shadum jahprang da ai.

   Wa Sarbyin Francis gaw “San Yawsep hku nna Nu Maria hpang de hkre di sa ga; Nu Maria hku nna Yesu Madu hpang de sa ga,” ngu Sarabyin Benedict XV matsun lai wa sai ga hpe bai tsun dan da ai.

  Anhte hkrum ang ai si hkrung si htan lam gaw anhte a prat kaw rai nga ai; lai wa sai prat kaw n rai nga ai. Masha nkau ni gaw si hkrung si htan lam hpe ji woi ji wa ni a  labau hka re ai ngu myit la hkam la nna shanhte hpe mara shagun chye ma ai.

  Masha nkau mi gaw si hkrum si htan lam hpe n kam hkrum ma ai; dai hpe la kau mayu ma ai; hkap la na matu yak ma ai; kap bra ana coronavirus tsin-yam a majaw anhte a makau grupyin ni hta tsaw ra ai ni n nga lawm lu ai sha shingtai si wa ra ai lam ni gaw si hkring si htan hpe hkap la na matu sung sung myit aru la shangun nga ai.

  “Hkristan makam masham gaw si na hpe hkrit tsang na matu n rai nga ai; dai hpe hkrum katut gwi na myit masin jaw bang ya ai she rai nga ai,” ngu Wa Sarabyin Francis n-gun jaw da ai.

  Hkrung rawt na hpe kamsham myit hte si hkrung si htan lam hpe hkap la nga ra ga ai. Hkrit tsang ai lam ni anhte hpe n ga-up dang kau lu u ga, Hkristu Madu a bai hkrung rawt ai hpe kam sham ga; Hkristu a mungsung lam gaw teng man asak hpe asan sha mu lu shangun ai.

  “Hpu nau shada dang rang hkat ai gaw hpa lam ni rai mi ta?”, ngu san let, “garai n si shi yang, kaba ai manghkang amu ni shayawm shamat kau na hpe n lahpawt n majan ai sha, prinem htingram lam la nna si wa ai gaw kaja dik rai nga ai, ngu Wa Sarabyin n-gun jaw da ai.

Hkristan Masha ni sumru na lam lahkawng

“Hkristan masha ni a matu sumru na lam lahkawng nga ai,” ngu Wa sarabyin Francis tsun jahpra da ai.

1. Anhte ni si hkrung si htan lam hpe koi yen kau n lu ga ai; dai re majaw, machyi masha ni hpe shamai shatsai tsi tsi lajang ai hta byin mai ai made anhte shinggyim masha ni galaw lu ai ladat hte Karai Kasang myit ra ai hta shakut tsi lajang sa wa ga; kaman lila re ai tsi lajang ai lam ni gaw shinggyim sari n rawng, shinggyim akyang n-nang, n rawng ai lam rai nga ai.
2. Grai machyi nna si ai hte hkam sha ru nna si ai lam ni zawn re ai, Si ai madang, masa hte seng ai. anhte gaw “palliative care” ngu tsun ai tsi mawan lajang ya ai ni yawng hpe chyeju dum ra ai; Raitim, “euthanasia” ngu tsun ai angwi apyaw sha si wa na matu tsi htu ai lam hpe gaw hkap la n mai ga ai hpe dum hprang ra ga ai, sadi ra ga ai, ngu Wa Sarabyin Francis tsun jahpra shadum da nga ai.

  Asak aprat gaw teng man ai lam rai nga ai, ahkaw ahkang hte seng ai rai nga ai; si mat na matu n rai nga ai. Ndai gaw Hkristan ni a matu sha n re ai, yawng hte seng ai, marai hkum shagu hte seng ai, ngu Wa Sarabyin matut sang lang da ai.

  Hpang Jahtum ginchyum dat mungga hta, San Yawsep a akyu hpyi htinglu htinglai ai a marang e si hkrung si htan lam hte seng ai mungsung hpe kaja ai hku, mai byin ai made hkap la lu mu ga kyu hpyi let, si wa maw ai ni a matu Kanu Nu Maria hte San Yawsep kaw akyu hpyi htinglu htinglai ya nga na matu saw shaga da nga ai.

Sourec: Vatican News

By Fr. Patrick Gawmaw Hkawng Yae

#vaticannews

#rvakachinservice