San Pra ai Jerome Emilani a Poi Nhtoi (February 8)

San Pra ai Jerome Emiliani (Shing n rai) Gerolamo Emiliani gaw, lai wa sai 1481 ning hta, Italy Mungdan, Venice mare kaw shangai chyinghkai wa ai rai nga ai. Shi gaw, Somashun Jau magam gun wuhpung hpe mung, gaw de da ya sai. Bai nna, Shi gaw, grai magrau ai hpyen du rai nga ai majaw, Treviso shara makau kaw na Csatenuovo tai hpyen ni hpe hkap sin ai shara kaw lit shatsam ya hkrum lai wa ai. Treviso mare ting tai hpyen ni a lata kaw hkrat sum mat ai majaw, shi gaw htawng kaw rim bang da hkrum wu ai.

Htawng kata kaw rawng nga ai shaloi, lai wa sai aten na shi a mara kata kaw nga lai wa sai prat ni hpe bai sawn sumru yu hkrup wu ai. Nu Maria a garum chyeju a marang e, shi htawng kaw nna bai lawt lu ai re, nga kam da ai majaw, hpang daw de shi hkum nan Karai Kasang kaw sak jaw kau nu ai.

San Pra ai Jerome gaw, shi a asak (37) ning hta Jau tai Sakramentu hpe hkam la lu sai. Shi lu ai sut gan yawng mayawng hpe mung, matsan masha ni a matu jai lang kau nu ai. Shi gaw, chyahkrai ma ni nga na nta, tsirung na machyi masha ni hte myit malai bai lu wa ai shawa num galaw ga sai numsha ma ni nga na matu jawng ni mung, gap da ya lai wa sai.

1532 ning hta, “Congregation of Clerks Regular of Somascha” mying ai Jau magam gun wuhpung hpe gaw de da ya sai. Ndai Wuhpung a yaw shada ai lam madung gaw, chyahkrai ma ni hpe yu gawn ai; ramma ni a laika lam hte asak naw kaji ai Jau ni hpe lam woi kaja byin tai wa lu shangun ai hpaji ni hpe sharin ya na matu rai nga ai.

San Pra ai Jerome gaw, Jau nnan tai wai ai ni hpe “Nanhte gaw, matsan mayan rai nga ra ai; myit yawn myit htum lam, garen gari  lam ni hkrum sha na, masha ni e jahpoi asawng ai zawn re ai lam mung hkrum sha ra na myit dai. Ndai zawn re ai mahkrum madup ni a aru madung hpe Karai Kasang sha she chye da ya nga ai. Raitimung, ndai mabyin ni byin wa ai a yaw shada lam (3) hpe dum chye da ra nga ga ai. Dai lam ni gaw, (1). Karai Kasang gaw, Shi a tsawra ai kashu kasha ni kaw, anhte hpe shatsam la nna shachyoi shapra ya ai rai nga ai. (2). Kaga kadai hpe mung, hpa hpe mung n kam shamyet ai sha, Shi Madu Yesu kaw chyu sha kam shamyet ra ai hpe Shi ra sharawng ai majaw rai nga ai. (3). Karai Kasang gaw, Ja hpe wan mang kaw ju nna lata la ai zawn, nang hpe galaw la mayu nna rai nga ai. Ndai zawn makam masham ngang ngang rai nna, ruyak jamjau jamhkau ni hpe hkam sharang kau jang, ndai prat hta myit ngwi myit pyaw simsa ai lam hpe jahkring jahkra a matu jaw nna, hpang na prat hta gaw, prat dingsa jaw ya na rai nga ai.” nga nna shadum n gun jaw matsun ya ya rai wu ai.

San Pra ai Jau Jerome gaw, machyi makaw masha ni hpe yu gawn lajang ai kaw na shakap la ai ana ahkya hte nan 1537 ning, February shata (8) ya shani hta Madu kaw yup pyaw ban sa wa sai rai nga ai.

Jau Jerome n nga mat ai hpang, 1747 ning hta, dai aten na Wa Sarabyin Benedict (XIV) kawn A lu ai masha hku nna shagrau dat ya sai.

Dai hpang, 1767 ning, July shata (16) ya shani hta gaw, dai aten na Wa Sarabyin Clement (XIII) kawn, shi hpe San Pra ai Masha dang dat let, shi a Poi Nhtoi hpe mung February (8) ya shani ngu masat shagrau dat ya sai rai nga ai.

San Pra ai Jau Jerome hpe 1928 ning hta Wa Sarabyin Pius (XI) kaw nna mung, shi hpe “Chyahkrai ma ni lak san kam shamyet lu ai San Pra ai Masha” nga nna masat shagrau dat ya sai rai nga ai.

Daini Nawku hpung gaw, San Pra ai Jau Jerome Emiliani a Poi Nhtoi hpe galaw nga ai aten hta, anhte a makau grup yin hta nga ai machyi makaw hkrum nga ai ni, matsan chyahkrai nmai ni, lam dam nga ai hpunau ni yawng hpe dang lu ai daram lakawn lanawn pawn ba la lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)