Ma Yesu hpe Nawku Htingnu e Karai Kasang Kaw Ap Ya ai Poi (February 2)

Hkrismat Poi a hpang nhtoi (40) ya du ai shaloi, San Yosep hte Maria gaw shan a kasha, Ma Yesu hpe Yerusalem mare kaw na Nawku Htingnu hta Karai Kasang kaw sa ap ya na matu sa wa ma ai. Dai gaw; “Israela amyu sha ni hta kanu a hkritung kaw nna shangai wa ai kasha alat hpe, Ngai kaw asak jaw nna shachyoi shapra da mu; ma dai gaw, Ngai hte seng nga ai.” (Pru 13:1) nga nna Madu jahkrat tawn ai hkan sa tara hpe jasan jaseng ai rai nga ai.

Maria gaw, shi a hkum hpe jasan jaseng ai kumla rai nga ai, u hkru du lahkawng hpe sak jaw ai. Hpa majaw nga yang, “Kanu a hkum jasan jaseng ai nhtoi du ai shaloi, kanu gaw hkinjawng wa kaw, laning mi ladu hkrum sai sagu kasha langai mi hte u hkru du langai mi sa sak jaw na rai nga ai. Sagu kasha n mai byin jang u hkru du lahkawng hpe sa sak jaw ya ra na rai nga ai.” (Jawjau 11:6-8) nga nna, Madu matsun da nga ai. Ma Kanu ni gaw, ma shangai ai shaloi sai hkaw ai majaw, nhtoi (40) ya tup n san n seng ai nga nna masat da ai rai nga ai.

Simun mying ai dingman ai masha langai mi gaw, Ma Yesu hpe shi a lata hte pawn la ai; dai hpang Nawku Htingnu kata kaw Karai Kasang hpe shakawn shagrau let, “Madu e, ya gaw na a mayam wa hpe myit shangwi shapyaw ya nu law! Na a Mungga gaw dik wa nu ai. Masha yawng mayawng a matu, Nang lajang shachyip da ai hkye hkrang la ai mabyin, mungdan hpe Nang shadan shalen ya na nhtoi, Na a amyu sha Israela a hpung shingkang hpe nye a myi hte nan mu lu ni ai law.” (Luka 2:29-32) nga ai.

Ma Yesu a kanu yan kawa gaw, ndai zawn Ma hte seng nna Simun tsun ai ga hpe na ai shaloi grai mau mat ma ai. Simun gaw, matut nna shanhte hpe shaman manggala jaw let Kanu Maria hpe; “Ma ndai a majaw Isarela mungdan gaw kabu hpa, awng sharawng hpa, nhtan shai mang hkang ni byin tai wa na; masha law law a myit mang ai lam hpe shadan shaleng ya na rai nga ai. Dai majaw, na a salum hpe nhkyi hte galun waw ai jahkrum na rai nga ai.” nga nna tau hkrau shadum dat wu ai.

Dai majaw, Nawku Hpung gaw, daini Ma Yesu hpe Nawku Htingnu e Karai Kasang Kaw Ap Ya ai Poi Nhtoi hpe galaw nga ga ai aten, anhte hta ra nga ai shaman chyeju ni hpe lak san akyu hpyi la nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)