Ireland Mungdan na San Pra ai Brigid @ Bride a Poi Nhtoi (February 1)

San Pra ai Brigid @ Bride gaw, Ireland mungdan masha ni laksan kam shamyet ai lahkawng ngu na San Pra ai masha rai nga ai. Shi gaw, Kildare mare kaw na shawng ningnan Mama Jawng gaw gap da ya ai san pra ai amyu shayi mung rai nga ai. Dai Mama jawng kaw, shi gaw, aten shaning law law magam gun hpai lai wa sai. Kildare mare kaw na Mama jawng hpe, shawng de Cil-Dra Jawng shing n rai “The Church of the Oak” ngu nna shamying da nga ai. Shi gaw, Ireland Mugndan kaw na Mama jawng ni law law hpe gap da ya lai wa sai rai nga ai.

San Pra ai Brigid gaw, A.D 450 ning grup yin hta shangai chyinghkai wa ai lam, shi a labau hta mu hti lu nga ai re. Shi a Kanu yan Kawa gaw, Ireland mungdan a laksan kam shamyet ai San Pra ai Patrick hkum nan Kashin Kamun Sakramentu jaw da hkrum ai yan rai nga ma ai.

Kaji ai ten kaw na, Brigid gaw, Karai Kasang hpe madung tawn ra ai myit, tara shakut ai myit grai rawng ai hpe yawng hte mu chye ya ma ai. Shi Mama tai ai hpang shawa masha ni gaw, Mama Brigid hpe aten shagu galoi mung kabu gara myit pyaw let nga chye ai sat lawat, gam garan jaw chye ai myit jasat ni hpe mu chye lu ma ai.

Mama Brigid gaw hkum shingyan grai tsawm ai shayi sha rai nga ai majaw, shi hte dinghku de mayu ai ni agung alau n hkrum mu ga nga nna, shi a tsawm ai hkum gawng shingyan hpe la kau na matu, Karai Kasang kaw akyu hpyi ai, nga nna mung chye lu nga ai. Raitimung, Bridgid Mama tai Ga Sadi hkam la ai shani gaw, shawoi na hta grau nna shi a hkum shingyan tsawm wa ai lam labau hta ka da nga ai.

Shi a hkum hpe Karai Kasang hpe chyu sha ap kau na myit hkut da ai majaw, Ireland mungdan na ni gaw shi hpe “Ireland mungdan a Num Ningnan @ Bride” nga lachyum pru ai “Brigid” nga nna shagrau shamying ya ma ai. San Pra ai Brigid hpe nga chyu hte seng ai bungli galaw sha ai ni laksan kam shamyet ai San Pra ai masha “Patroness of Dairy Worker” ngu nna masat shagrau ai rai nga ai.

San Pra ai Brigid a akyu hpyi shaja ai, shagrit shanem ai, matsan mayan re ai ni hpe garum jaw ya ai kasi kamang ni a majaw, masha law law hpe sharin shapan shading sharai ya lu sai rai nga ai. Bai nna Tsaban (6) hta Ireland mungdan na Kahtawlik Nawku Hpung madang tsaw rawt galu kaba wa ai mung shi a kasi kamang a majaw grai nga ai.

Mama Brigid gaw, A.D (523) ning hta Madu kaw yup pyaw ban sa wa sai rai nga ai.

Mama Brigid n nga mat ai hpang, Nawku Hpung gaw, shi hpe San Pra ai Masha dang dat let, shi a Poi Nhtoi hpe mung February shata praw (1) ya shani masat shagrau dat ya sai rai nga ai.

Daini Nawku hpung gaw, San Pra ai Mama Brigid a Poi Nhtoi hpe galaw nga ai aten, anhte marai hkum shagu mung, Karai Kasang Wa a matu, kaning re ai prat hta raitim, sak jaw ap nawng lu ai ni byin tai lu hkra shakut sa wa ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)