Wa Sarabyin Francis Gaw: Karai Mungga Hte Shatsawm Lai Ga Nga Nna Tsun Dat Nga Ai Shiga

January 23, laban shani, San Peter Shawa pa hta, “Madu A Lamu Kasa Akyu Hpyi Ga” tsun ten, Karai Kasang a sharawng awng ai kabu pyaw lam hte ningnan re ai hta galai shai sa wa ga, ngu Wa Sarabyin Francis, saw shaga, n-gun jaw da ai.

Dai shani hti ang ai Kabu Gara Shiga Chyum Laika hta Madu Yesu hpaw hti ang ai chyum daw gaw Esia 61:1-2 hta na rai nna, dai myihtoi ga shi hta dik wa sai lam Madu Yesu tsun ai. Dai gaw matsan mayan ni hte dip da hkrum ai ni hpe shalawt dat ya na lam rai nga ai, ngu Wa Sarabyin Francis sang lang da ai.

Chyoi Pra Ai Wenyi hte Namnam chya hkrum ai wa

Madu Yesu a mungga a marang e masha ni a myit hpe shadut jahprang ya ai raitim, shanhte hkum nan myit mada myit la hkam la ai hte n tsen n hten ai myit ni a majaw shanhte a lapran myit um-ang lam ni, n dan n len ai lam ni law law byin pru wa ma ai. Shanhte ni sakse hkam lai wa ai Messaiah Hkyela Madu gaw Chyoi Pra Ai Wenyi e namnam chya ya ai hkrum nna, hpring tup ai lachyum rawng ai wa rai nga ai.

Anhte hkaw tsun ai mungga gaw Wenyi e namnam chya ya hkrum ai hta na rai ra na; bai, daini na prat masa hta hkan nna Yesu a lam hpe chye na hkam la mu ga, Kabu Gara Shiga hpe lakap let hkaw tsun sakse hkam ra ai, ngu mung Wa Sarabyin sang lang jahpra da ya ai.

Madu Yesu a sasana magam hta akyu hpyi let sang lawm gun hpai ra ai lam, shaloi anhte hkaw tsun ai Karai Mungga gaw Wenyi chyeju hte hpring kabrat ai nga na rai nna, chyum laika mungga gaw sak hkrung mungga re ai hpe mung sakse hkam lu na ga ai; Wenyi a chyeju hte Karai Mungga gaw anhte a shani shagu na prat hkrunlam hta lam woi ya let anhte hpe n-gun atsam jaw bang ya nna galai shatsawm ya na rai nga ai.

Shani Shagu Kabu Gara Shiga Hti Ga

Karai kasang anhte hpe mungga hte sharin shaga nga ai hpe hkap la kam sham let Karai Mungga gaw anhte a shani shagu na sak prat hpe shatsawm ya u ga matu Kabu Gara Shiga Chyum Laika hpe hti sumru nga ga; anhte hpe galai shai ya ai chyum daw kaji ji re ai ni hpe shani shagu kahtap kahtap nna lang hte lang bai hti hti rai nga ga; ndai Kabu Gara Shiga mungga ni gaw anhte hpe hkre di shaga nga ai hte hkre di karum shingtau lam woi ya nga ai rai nna grau ai chyeju hte simsa ai prat hpe jaw ya ai. Chyoi Pra ai Wenyi gaw anhte ni Karai Mungga madat hkam la ai hta karum ya u ga; Kanu Nu Maria mung anhte ni Kabu Gara Shiga hta sak hkrung nga lu na matu akyu hpyi htinglu htinglai kasi kamang tai nga u ga kam sham kam hpa let sak hkrung nga ga, ngu mung Wa Sarabyin Francis saw shaga da nga ai.

By Fr. Patrick Gawmaw Hkawng Yae

#vaticannews

#rvakachinservice 

https://www.vaticannews.va/en/pope/news/2022-01/pope-at-angelus-be-transformed-by-the-word-of-god.html