Wa Sarabyin: Hkristan Ni Kahkyin Gumdin Wa Na Matu Akyu Hpyi Ai Laban Bat Hta Anhte Yawng Shang Lawm Lu Hkra Shakut Ga

“Hkristan ni kahkyin gumdin wa na matu kyu hpyi ai lamang” hpe shaning shagu mungkan madang galaw nga ga ai rai nna, dai ning 2022 shaning hta gaw January 18 -25 laman galaw na matu masat da ai rai nga ai.

January 16, laban shani, Madu A Lamu Kasa Akyu Hpyi Ga tsun ten, Wa Sarabyin Francis, ndai lamang hte seng nna tsun ai hta Hkristan masha shagu tinang a mayak lam ni hte jam jau lam ni nga ai raitim ndai mayak jam jau ni a lapran shang lawm lu hkra shakut ga, ngu n-gun jaw saw shaga da nga ai.

Daining na ga manoi ga baw ginlam gaw hpaji rawng ai hkawhkam masum shangai wa na Messaiah Hkye La Madu, Hkawhkam hpe sa tam ai shaloi sagawn ai ga si hpe lata da ma ai, “We Saw the star in the East, and we came to worship him” “Sinpraw mung hta e shi a shagan dan pru ai hpe anhte mu lu sagaw ai rai nna, shi hpe nawku na matu anhte du sa ga ai” ngu ai rai nga ai.

Wa Sarabyin Francis gaw anhte mung dai hpaji rawng ai hkawhkam masum zawn sha “kahkyin gumdin lam” lu la na matu akyu hpyi buhkawm nga ga ai ni rai ga ai; Madu Yesu hpe madung da azi yu let hkawm sa nga ga ai rai yang anhte a myit mada shara pandung de grau grau ni htep sa wa lu na ga ai, ngu shadum n-gun jaw da ai.

Hkristan ni ginlung kahkyin gumdin wa hkra shakut ai hta jam jau hkrum, shoi chyum hkrum ai lam ni a lapran dakring dakran rai shakut shaja sa wa lu matu anhte marai hkum shagu shaku shang lawm akyu hpyi na hpe myit mada let Wa Sarabyin Francis n-gun jaw da ai.

“The Pontifical Council for Promoting Christian Unity” kawn resource materials for the Week of Prayer for Christian Unity ngu ndai ga baw hpe masha shagu shang yu, shang la karan kachyan lu na matu yaw shada let website hta bang da ya nga ai.

By Fr. Patrick Gawmaw Hkawng Yae

https://www.vaticannews.va/en/pope/news/2022-01/pope-may-we-all-join-in-week-of-prayer-for-christian-unity.html