Wa Sarabyin: Akyu Hpyi Ai Gaw Anhte A Masin Salum Hpe Karai Kasang A Matu Hpaw Da Ai Nga Nna Tsun Dat Nga Ai Shiga

Wa Sarabyin: Akyu Hpyi Ai Gaw Anhte A Masin Salum Hpe Karai Kasang A Matu Hpaw Da Ai

January 9, Yesu Madu Kashin Kamun Hkam Ai Poi Laban shani, San Peter Shawa Pa hta, “Madu A Lamu Kasa Akyu Hpyi Ga” tsun ten, Wa Sarabyin Francis, tinang a kashin kamun hkam ai nhtoi hpe bai myit dum na hte akyu hpyi ai a ahkyak dik ai lam hpe sumru woi da nga ai.

Dai shani hti ang ai Kabu Gara Shiga chyum daw gaw, Yawhan Baptista gaw Yawdan hka hkinggau hta myit malai ai kashin kamun jaw ya ai ten, Yesu Madu hkum nan mung Yawhan a lata hta kashin kamun sa hkam la ai lam rai nga ai.

Yesu Madu gaw Shi hta mara n nga ai rai tim, mara lu ai ni hte rau tsap nga ai gaw anhte mara lu ai ni hte rau rai nga nna mara lu ai anhte hpe chye na hkam sha lawm ya ai hte mara hpe raw dat hkyam sa ya ai lachyum rai nga ai.

Madu Yesu Akyu Hpyi Ai

Madu Yesu Kashin Kamun hkam ai shaloi akyu hpyi lai wa ai. Anhte hpyi ai zawn sha akyu hpyi lai wa ai. Shi akyu hpyi ai gaw Kawa Karai Kasang hte man hkrum shaga taw ai rai nga ai.

Kashin kamun hkam ai shaloi galaw ai lam lahkawng hpe mu lu ai; langai gaw Yesu Madu sumsing lamu de mada yu ai; kaga langai gaw lamu de nna nsen ngoi pru wa ai. Ndai gaw Kawa Karai Kasang hte Madu Yesu man hkrum shaga ai akyu hpyi ai lam rai nga ai. Yesu Madu gaw shi a myit masin salum kaw nna nan akyu hpyi ai rai nga ai.

Mayak mahkak lam law law anhte hkrum sha nga ga ai. Dai mayak lam ni anhte hpe gang jahkrat kau ya ai n rai u ga. Karai Kasang gaw anhte a lapran kaw bungli galaw nga ai. Anhte a akyu hpyi nsen gaw Karai kasang hte anhte a lapran matut mahkai ya ai, langai sha tai wa shangun ai. Akyu hpyi nsen gaw Karai Kasang a masin salum hpe hpaw ya ai rai nga ai.

Anhte a kashin kamun hkam ai nhtoi hpe bai myit dum let Karai Kasang a nsen hpe madat mara nga ga, ngu Wa Sarabyin Francis mungga htawn da ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2022-01/pope-francis-angelus-baptism-messiah-john-baptist-january.html