Hkawhkam Masum Poi hte Epihpani Poi (January 6)

Daini gaw, Greek ga hku nna, “Epifani” (Shadan Shapraw ai) Poi Nhtoi rai nga ai. Madu Yesu Hkristu hte masha yawng mayawng a malai ni rai shajang ai hkawhkam masum hkrum ai masat dingsat nhtoi rai nga ai. Hpaji chye ai marai masum hpe Hkawhkam Masum ngu nna shamying nga ai re.

Shanhte gaw, Sinpraw Dan kaw nna, Yesusalem mare de du sa wa nhtam “Yuda amyu sha ni a matu shangai wa ai hkawhkam kanang rai a ta? Shi a shagan hpe sinpraw dan e, anhte mu lug a ai majaw, shi hpe hkungga jaw na matu anhte du sa wa ga ai.” nga nna san sagawn ma ai. Dai shiga hpe Herod hkawhkam na lu ai majaw, myit kahpra mat wu ai.

Dai majaw, shi gaw hkin jawng ni, hpaji chye ai masha ni hpe shaga la nhtawm, Hkye la Madu Kanang shangai wa ai hpe sawk sagawn shangun wu ai. Shanhte chyawm gaw, “Yuda mung, Betalehem mare kaw na rai na re; kaning rai nme law, Myihtoi Mika a laika hta: Yuda mung, Betalehem mare e, nang kaw nna Nye a amyu sha ni hpe bau sin, yu lakawn lajang ya na, up hkang aya lu ai wa langai mi paw pru na rai nga ai, nga nna ka da nga ai.” ngu nna bai htan ya ma ai.

Herod Hkawhkam gaw, dai hpaji chye ai marai masum hpe Betalehem mare de shangun dat nhtawm, “Nanhte pru sa wa nna, Ma a lam a sawk sagawn yu mu. Nanhte shi hpe mu hkrup jang, ngai hpe shiga bai wa shana ya marit; shaloi ngai mung shi hpe hkungga sa jaw na n ngai.” nga nna matsun dat wu ai. Dai hpang, hpaji chye ai masha masum mung pru sa mat wa ma ai. Shanhte a shawng e lamu ntsa htoi kabrim let hkawm taw ai shagan gaw, Ma Chyangai nga ai shara kaw du ai shaloi hkring mat nna, shanhte grai kabu mat ma ai. Nta nhhku de shanhte du shang wa ai shaloi, Machyai hpe Shi a Kanu Maria hte rau nga ngai hpe mu lu ma ai.

Shanhte gaw, ga ntsa e gum dagup let hkungga jaw ma ai hte shanhte gun sa wa ai ja, mura hte lawban kumhpa ni sak jaw ma ai. Dai hpang, yup mang kaw shanhte hpe Herod hkawhkam hpang maga hku nna bai n wa na matu, sadi jaw hkrum ma ai majaw, shanhte gaw kaga lam hku nna shanhte a nta buge de bai nhtang wa mat ma ai.

Hpaji rawng ai marai masum a mying ni gaw, Gaspa, Melhkaw hte Baltasa ni rai ma ai. Shanhte sak jaw ai ja kumhpa a lachyum gaw, hkawhkam hte seng ai ngu mayu ai rai nga ai; tsun mayu ai gaw, Ma Yesu gaw, Hkawhkam rai nga ai ngu ai a sakse rai nga ai. Lawban a lachyum gaw, akyu hpyi ai lam madun ya ai; dai gaw, Ma Yesu gaw, Karai Kasang mung rai nga ai ngu ai a kumla rai nga ai. Mura gaw, si a masha a moimang hpe chye yang lang ai. Dai gaw, Ma Yesu gaw, shinggyim masha yawng mayawng a matu si hkam ran a a kumla hpe madun ya ai lam rai nga ai.

Daini na aten hta gaw, Hkawhkam Masum Poi Nhtoi hpe shaning nnan a shawng na Laban Shani hta galaw ai she malawng rai nga ai.

Dai ni na aten hta gaw, Maigan Mungdan shara shagu hte Jau nga ai Shara ni hta gaw, January shata (6) ya shani nan galaw nga ai. Raitimung, anhte a Buga hkan gaw, Wa Jau ni n du n dep hkap shi ai shara ni grai nga ai majaw, Laban Shani hta sha-ang let galaw ai lam rai nga ai.

Daini Nawku Hpung gaw, Hkawhkam Masum Poi Nhtoi hpe galaw nga ai aten, Anhte mung, Hpaji rawng ai masha ni zawn, Madu hpe mu hkra tam let, shi madu hpe gying dan ai kumhpaw kumhpa sak jaw lu ai ni tai lu hkra shakut nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)