Mara N Lu ai Chyoi Pra ai Ma Ni a Poi @ Holy Innocents (December 28)

Daini na nhtoi hta Nawku Hpung gaw, Chyoi Pra ai ma kasha ni hpe laksan myit dum let shakawn shagrau ai poi shani rai nga ai. Ndai Chyoi Pra ai ma kaji ni gaw, “Mahkawn Mangoi Hpung (shing n rai) Choirboys ni kam shamyet ai San Pra ai masha ni” nga nna mung shagrau ai hpe hkrum ma ai. Shangai wa ai, Ma Yesu hpe tsepkawp shamyit sat kau lu hkra nga nna, Herod hkawhkam tara jahkrat ai majaw, sat kau hkrum ai Batalehem mare kaw na ma kaji ni rai nga ma ai.

Yuda mung na, Herod hkawhkam gaw, sinpraw dank aw na sa wa ai hpaji rawng ai masha marai masum, shi hpe masu kau da masai nga nna grai myit pawt lai wa ai. Dai majaw, shi gaw Betalehem mare hte dai mara makau mayang kahtawng hkan na asak lahkawng ning hte lawu na la kasha nga manga hte hpe sat shamyit kau shangun wu ai. Ma Yesu chyawm gaw, dai sat shamyit ai kaw nna lawt mat wa ai. Shi gaw, Kanu yen Kawa hte rau Egutu (Egypt) mungdan de yen lawt mat wa ai.

Ndai mara n lu ai sha si hkam mat wa sai, chyoi pra ai ma kaji ni hpe, San Pra ai Augustine hte San Pra ai Irenaeus zawn re ai Nawku Hpung a kanu kawa “Fathers of the Church” ni gaw, “Makam Masham a majaw, sai hkam ai San Pra ai Masha ni” (Martys) nga nna shagrau masat ya ma ai. Dai Chyoi pra ai ma kaji ni gaw, n-gup aga hte n re ai sha, shanhte a asak hte nan Hkye La Madu Yesu a sakse sakgan ni tai ya masai.

Shanhte gaw, Mungkan ga a n shawp n kap ai, nat satan a agung alau hpe n hkrum ai sha, mungkan ga kaw nna lawt pwu wa let, n htum n wa ai Sumsing mungdan na Janmau lug up la ai ma kaji ni rai nga ma ai. Dai re majaw, nawku hpung gaw, dai Chyoi Pra ai Ma Kaji ni hpe akyu hpyi ai lam galaw nna, shakawn shagrau ya ai lam rai nga ai.

Daini Nawku hpung gaw, Mara N Lu ai Chyoi Pra ai Ma Ni a Poi hpe galaw nga ai aten hta, ya ten, mara kaba sat kau hkrum ai Ma kaji ni a matu laksan akyu hpyi garum ya ai hte grau nna ma kaji ni hpe hkungga tsawra manu shadan chye ai myit masa ni mung, anhte n tsa hta jat bang ya rit ga matu, akyu hpyi nga ga law.

By;

Sister Rose Angeline Maran Nang Doi (SFX)

RVA-Kachin Service (Myitkyina)