Sasana Ma Ni Hpe Wa Sarabyin Francis Hkrum Shaga

Vatican’s Santa Marta Paediatric Dispensary kawn lajang ya ai lamang rai nga ai “Wa Sarabyin Francis, Sasana ma ni hte shanhte a kanu kawa ni hpe hkrum shaga ai lamang hpe, December 19, laban ya shani, Vatican na San Paulu VI hkaw hta galaw la lu sai lam Vatican Shiga Dap kaw nna ndau da ma ai.

Hkristmas a shawng na laban, Du Sa Ladaw laban mali hta ndai lamang hpe Wa Sarabyin Francis hkap la galaw ai rai nga ai.

“Ra kadawn ai ni a nsen madat na la na gaw grai ahkyak ai”, ngu Wa Sarabyin Sasana ma ni hpe sharin shaga da ai.

Ra kadawn ai ni hpe sagawn tam la ra ai; shanhte a nsen hpe madat ya ra ai; dai gaw shada tsaw ra ai hpe madun dan ai ahkyak lam rai nga ai. Hpu nau ni hpe anhte a myi hte n yu ai rai yang gaw, shanhte a ra kadawn ai hpe anhte galoi mung chye na ya lu na n rai nga ai. Kaga masha ni a nsen hpe n madat ai wa gaw madu hkum hpe madu n madat ai wa mung rai nga ai. Raitim, madu hkum hpe madu madat ai hpe sha madung da ai rai yang gaw tingg yen myit ni rawng wa chye ai hpe dum hprang ra ai. Hpu nau ni a nsen hpe madat ya ai gaw grau nna kaja ai rai nga ai, ngu sharin shaga let nsen kaba hte jahtau ndau na matu Sasana ma ni hpe saw shaga da ai.

“Dai ni, anhte ndai shara kaw du hpawng nga ai gaw shada karum shingtau hkat na matu rai nga ai; ndeng marai rawng mu; sa nna hpawng de let kaja ai, akyu rawng ai lamang ni hpe galaw mu, ngu n-gun jaw da ai.

Santa Marta Paediatric Dispensary gaw langai lang ngu na Mungkan majan a hpang, gaw de da ai rai nga ai; 1922, May 8 ya shani, Wa Sarabyin Pius XI masat shagring da hpang ai rai nga ai. Ndai lit hpe woi awn na matu Wa Sarabyin Pius XI hkum nan Sisters of the Daughters of Charity of San Vincenzo de Paul hpung ni hpe ap jaw da ai rai nga ai; magam lit gaw majan a majaw matsan mayan rai nga ai sasana ma ni hpe makawp maga bau sin bau kaba ya na lit magam rai nga ai.

Ya ten hta, Cardinal Konrad Krajewski gaw Sarabyin rung hte matut mahkai ai ndai Charity hpung ni a hpa-awn (president) rai nga ai.

Fr. Patrick Gawmaw Hkawng Yae

https://www.vaticannews.va/en/pope/news/2021-12/pope-santa-marta-dispensary-christmas-meeting-children.html