Christmass Mungga ( 24.12.2021 )

Hkristmas Poi Shani, C, 2022

 Hkristu hta tsaw ra ai nu wa hpu nau ni e, ndai hpawtni gaw Hkristmas poi rai nga ai.

Hkristmas du shagu anhte ni yawng a masin salum hta kaga poi ni hta grau ai, tsun dan n lu ai kabu pyaw lam hpe hkam sha chye ga ai. Makam n bung ai ni pyi lak lai ai myit dum hpa langai hku hkam sha ma ai.

Myit ru myit tsang, hkri ba lit li ai lam ni hkoi mat ai zawn nga hkam sham ga ai gaw teng sha rai nga ai.

“Mungga gaw masha tai wa sai rai nna, anhte a lapran e nga nga ai” (Yh 1:14).

“Madu gaw shi hpe hkap la nna Shi a mying ningsang hta kam sham ai ni Karai Kasang a kashu kasha tai lu ai ahkang hpe jaw ya mu ai,” (Yh 1:14).

Hkristmas poi hpe lachyum shalen ga nga yang “kabu pyaw lam jaw ya ai Poi” ngu tsun mai ga ai. Masha kaba kaji, matsan lu su, hpaji chye ai, n chye ai ni yawng ra sharawng ai poi rai nga ai.

Ndai Hkristmas poi gaw shinggyim masha shada garan ginhka ai lam ni yawng hpe shamat kau ya ai. Hkristmas poi a kabu pyaw lam gaw sak naw ram ai ramma, shing n rai, sasana ma ni zawn hkam sha shangun ai.

Betlehem mare hta shangai chyinghkai wa ai ma Yesu a marang e shinggyim masha shagu myit su kasha ni tai wa ai zawn rai nga ai.

U shat wa kang hta shangai wa ai ma Yesu a marang e masha shagu n myit mada sut su ai ni tai wa ai zawn rai nga ai.

“Anhte a matu kasha langai shangai sai! Anhte hpe shadang sha jaw mi ai!,” (Is 9:6).

Ma Yesu ngu ai wa gaw kadai rai? Anhte a matu shangai wa ai ngu ai gaw hpa rai ta? Shi shangai wa ai gaw anhte a ntsa hpa akyu ara jaw ai rai? Anhte kaw lama ma hpyi sawn yu ai kun?, ngu ai lam ni hpe sumru ga.

Ma Yesu gaw kadai rai ta?

Nu Maria hta shangai wa ai wa, Karai Kasang a kabu gara shiga hpe gun sa ya ai wa rai nga ai.

Karai Kasang gaw Ga Shaka Dingsa prat hta, shinggyim masha ni hpe Myihtoi ni hku nna, lam amyu myu hte, ga tsun lai wa ai. Myihtoi ngu ai lachyum hta masha langai ngai a malai ga shaga ya ai lachyum rawng nga ai.

Mungkan masha ni gaw Karai Kasang a lam kaji kajaw sha chye ma ai majaw shut shai ai hku myit la hkam la ma ai. Dai majaw Karai Kasang gaw Shi a tsaw ra ai hte hkye hkrang la lam a masing ni hpe hparan na matu Shi a Kasha shingtai hpe shangun dat na myit daw dan ai, ngu Hebrew ni kaw shagun dat ai laika hta tsun da nga ai. Shi gaw Kawa Karai Kasang anhte hpe tsaw ra ai mau hpa shiga hpe gun sa ya ai wa rai nga ai.

Shangai wa ai ma Yesu gaw Karai Kasang a Kabu Gara Shiga hpe gun sa ya ai hta sha n ga, shi hkum nan mung Kabu Gara Shiga Rai nga ai. Yesu a lam sumru ai rai yang Shi gun sa ya ai shiga hpe hkan tam nga n ra sai. Dai shiga gaw shi hta nan rawng nga ai.

Ma Yesu hpe sa nawku ai sagu rem ai ni hpe masam maram yu yang ndai lam dan dawng nga ai. “Sagu rem ai ni mung shanhte wa nna, shanhte hpe lamu kasa tsun dan manu ai hte maren, na la, mu la ai lam mahkra a majaw, Karai Kasang hpe shagrau sha-a nna, shakawn kungdawn let bai wa ma ai,” (Lk 2:20).

Lamu kasa ni gaw sagu rem ai ni hpe mungkan ga hpe hkyela na Messiah Madu shangai wa sai ngu tsun dan ma ai. Hpaji machye machyang lam hta ningra ma ai rai nna, prat maka n tsawm ma ai raitim, ma Yesu hpe myi chyaw mu lu nawku lu ma ai majaw Karai Kasang a tsaw ra hpe hkam sha let bai htang wa ma ai.

Ushat wakang hta galeng taw ai ma Yesu gaw ma chyangai sha naw rai nga ai majaw n-gun lagaw n rawng ai wa ngu mu mada ga ai raitim, Karai Kasang zawn sha htani htana mahkra dang chye ai wa rai nga ai. Karai Kasang nan rai nga ai.

“Daini na nhtoi hta Hkye Hkrang la ai Wa Hkristu ngu ai Madu gaw, David a mare e nanhte a matu shangai wa sai,” (Lk 2:11).

Shinggyim hkum sa la ai hpe tsun ai hku rai yang gaw teng man ga rai nga ai. Raitim, grau sung ai hku matut sumru ga nga yang, Ma Yesu gaw dai ten hta du sa ai wa n re ai sha, htani htana nga nga ai, aten shagu du sa ai wa rai nga ai.

“Shawng ningpawt e Mungga nga ai; dai Mungga gaw Karai Kasang hte rau rai nga ai, dai Mungga nan Karai Kasang rai nga ai. Shi gaw Karai Kasang hte maren rai nga ai,” ngu Yawhan 1:1 hta Chyum Laika sara asan sha tsun da nga ai.

Ma Yesu a kaji la ai lata gaw mungkan ga hpe hpan hpajang lu ai hte dai hpe aten shagu hting hkang da lu ai. Dai zawn sha hpan da hkrum nga yawng nga pra hpe kaman nila byin hkra mung galaw lu ai rai nga ai.

“Karai Kasang gaw dai Mungga hku nna arai yawng mayawng hpe hpan da nu ai. Hpan da ai arai yawng mayawng hta dai Mungga n lawm ai tai wa ai gaw langai mi mung n nga ai,” (Yh 1:3).

Madu Yesu gaw yawng mayawng hpe dang di lu ai rai tim, NumSha langai mi hta shangai wa ai (Gal 4:4). Kaga masha hpe ra mara yawng a matu shamyat shanat ra ai ma langai hku shangai wa ai. Dai ni, shi a marang e anhte ni kabu pyaw nga ga ai.

Dumsu wakang hta galeng taw nga ai ma gaw anhte prat a nhtoi rai nga ai

Yawhan gaw shi a chyum laika hta “nhtoi hte nsin” ngu ai ga hpe jahkring hkring jai lang da ai. Shi a ga hte maren nga yang, “nhtoi” gaw mai kaja ai lam, sanseng chyoi pra ai lam, dingman dinghpring ai lam, tsaw ra ai lam, kabu pyaw ai lam, htani htana asak lam ngu ai Karai Kasang sharawng awng ai lam a matu jai lang da ai rai nga ai.

“Nsin” hpe gaw mara hte seng ai lam, nju ndawng ai lam, yawn hpa lam hte rau n hkru n kaja ai lam yawng a madu rai nga ai satan hte seng nna jai lang da ai rai nga ai.

1Yh 1:9 hta, “Karai Kasang gaw nhtoi rai nga ai hte shi hta nsin hpa mung n rawng nga ai,” ngu San Yawhan adan alen sakse hkam da nga ai.

“Dai nhtoi gaw mungkan ga de du sa nna, masha nlang hte a ntsa e jahtoi ya ai nhtoi majing rai nga ai,” nga nna Yawhan 1:9 hta mung matut sakse hkam da nga ai.

Yh 8:12 hta mung, “Yesu shanhte hpe bai tsun mu ai gaw, Ngai gaw mungkan ga n nhtoi rai nga nngai. Nye a hpang hkan nang ai wa gaw asak a nhtoi hpe lu la na ra ai rai nna nsin hta galoi mung n hkawm n sa na ra ai,” ngu Yesu Madu Shi hkum hpe shadan shalen dan ai hpe mung Yawhan sakse hkam da ai.

San Yawhan gaw ndai mungkan ga hta, “nhtoi hte nsin”, “kaja ai hte n kaja ai”, “asak hte si hkrung si htan”, “Karai Kasang hte Nat sadan lapran majan byin nga ai ngu tsun jahpra da ai. Hpang jahtum hta gaw Karai Kasang chyu sha awng dan lam a madu rai nga ai ngu mung matut tsun da ai (Yh 1:5).

Ndai majan gaw mungkan ntsa sa pra ai ni yawng masin salum hpe arang tawn nna prat htum ten du hkra gasat nga ra ai.

Shangai wa sai ma Yesu gaw nsin hta hkawm nga ai anhte hpe Shi a nhtoi shingkang hte lam woi, makawp maga bau sin ya let sumsing mungdan de woi lung wa na ra ai. Nsin hta hkawm nga ai ni anhte gaw bai n shut kataw hkra teng man myit malai hte Shi Madu hta kam sham kam hpa let sak hkrang hkawm sa nga ra ga ai.

Wakang hta galeng taw ai ma Yesu gaw anhte a asak rai nga ai

San Yawhan gaw anhte ni kadai mung shingran n mu yu ai yupmang shingran sawn hpa lam langai hpe shalen dan ai. Dai gaw, Nu Maria hta shangai wa ai ma Yesu kaw nna htoi pru wa ai nhtoi shingkang hpe hkap la ai wa gaw Karai Kasang a kashu kasha tai wa ai, ngu ai rai nga ai (Yh 1:12).

San Yawhan a kabu gara shiga hta Yesu Madu gaw anhte a asak rai nga ai ngu nna mung jahkring hkring tsun da nga ai (Yh 3:16; 10:10-28; 14:6).

Yesu Madu a htani htana asak hte rau shi hta kam sham ai ni a htani htana asak hpe tsun ai rai nga ai.

Ma Yesu anhte langai hpra kaw hpyi shawn da ai lam langai sha nga ai

Dai gaw, Shi Madu hpe anhte a hkyela Madu hku hkap la na hte shi a hkye hkrang la ai hpe hkam la na matu rai nga ai. Shi a nhtoi shingkan hpe hkam la lu na matu nsin ngu ai mara hpe koi yan kau na hte dai mara kaw nna teng man myit malai hte shi hpang si shang wa na hpe Shi anhte a ntsa ra sharawng nga ai.

Shinggyim masha law malawng gaw nsin hpe lata ma ai, htani htana asak hpe lata na malai si hkrung si htan lam hpe lata ma ai, ngu San Yawhan tsun sadum da nga ai. Madu Yesu shangai wa ai ndai Hkristmas hte na a prat hta nye a prat hta anhte ni gara hpe lata na ga ai kun? Nsin hpe kun, nhtoi hpe kun? Htani htana asak hpe kun, si hkrung si htan lam hpe kun?

Akyu hpyi saga

Wa Karai Kasang e, shangai wa sai ma Yesu a nhtoi shingkang gaw ndai Hkristmas hta anhte ni aprat a matu htani htana asak hte nhtoi hpe lata la lu shangun ya rit. Anhte a Madu Hkristu a marang e hpyi nem nga ga ai.  Amen.

Hti ang ai Ja Chyum Mungga ni gaw

Chyum Mungga Daw (1) Is 52:7-10

Chyum Mungga Daw (2) Heb 1:1-6

Kabu Gara Shiga  Yh 1:1-18

Ndai Ja Chyum Mungga ni hpe hti nna, hpawtni na nawku dawjau lamang ni hpe woi awn nga ga.