Wa Sarabyin: Karai Kasang A Myi Hpe Shalen La Na Matu Gaw Nu Maria Zawn Shagrit Shanem Ra Ga Ai

December 8, bat masum ya shani, gaw “Nu Maria mara n kap ai Na-um Na-sin Poi” nhtoi rai nga ai. Dai shani gaw Kahtawlik Nawku Hpung a ahkyak dik poi ni hta na poi kaba dik langai re majaw, Wa Sarabyin Francis, San Peter Shawa Pa hta, “Madu A Lamu Kasa Akyu Hpyi Ga” tsun ai hpe hpung shawa masha ni hte rau galaw ai lam chye lu ai.

Madu a lamu kasa Nu Maria kaw ga sa shana ai mabyin gaw Nu Maria a tsawm htap ai masin salum hpe shadan shalen ya ai lam Kabu Gara Shiga Chyum Laika hta dan len ai hku mu lu ga ai.

Chyeju Hte Hpring Ai

Lamu Kasa gaw Maria hpe “Chyeju hte hpring nga ndai” ngu shakram ai. Ndai gaw teng man ga rai nga ai. Chyeju hte hpring ai, lachyum gaw n kaja lam hta na koi yen lu ai, Nu Maria mara n kap na-um na-sin ai hpe tsun ai rai nga ai.

Maria gaw Lamu Kasa ga sa shana na matu hkrum shaga ai shaloi myit yak chyamchya hkrum lai wa ai. Shakawn shagrau hkrum ai shaloi, shacyan shaga ya ai shaloi, shatsaw sharawt ya hkrum ai shaloi ni hta gawngba, raidum lam ni hpe byin shangun ai. Gawngba raidum myit rawng wa chye ai.

Nu Maria gaw, shi hpe Lamu Kasa ga sa shana ai shaloi, dai zawn n myit la ai. Shi hkum shi shagrau ai lam n galaw ai. Shagrit shanem ai hte Karai Kasang a myi hpe shalen la, mawng la, lau la ai rai nga ai, ngu Wa Sarabyin Francis shang lang da ai.

Shi Hkum Shi Nyet Kau Ai

“Nu Maria shi hkum shi nyet kau ai” gaw mungkan myit hte seng ai myit hpe nyet kau hpe tsun mayu ai rai nga ai. Lamu Kasa shi hpe shagrau sha-a ai lam hte seng nna shi prat hta shakawng shanga di ai lam kachyi mi mung n nga lai wa yu ai. Hpa majaw nga yang, shi gaw Karai Kasang kaw na shagrit shanem ai chyeju hpe hkam la da ai majaw rai nga ai.

Shi hkum hpe Karai Kasang hte hpu nau ni a matu aten tup, hpring tup, ap jaw da ai.

“Hpan da hkrum yawng hta kaba dik masin salum gaw, dai Nazareth na ginsum nta kaji kaw nga nga ai; dai masin salum htuk htak shamu taw nga ai,” ngu Wa Sarabyin Francis madi madun da ai. Dai shagrit shanem ai lam ni hta Karai Kasang, shinggyim labau hpe galai shatsawm ya sai. Dai ni na prat hta mung Karai Kasang a tsaw ra chyeju gaw lai wa sai labau hta grau ai hku jaw ya nga ai re, ngu mung Wa Sarabyin shang lang da ai.

Nu Maria Gaw Anhte Hpe Galoi Mung N Kau Da Ai

Karai Kasang a kaba la ai chyeju ni hpe hpyi nem nga na matu Wa Sarabyin Francis bai shadum da ai; shagrit shanem ai hte kabu hkinnum let anhte hkum hpe shalawt la nna anhte a myi Karai kaw du, Karai a myi anhte kaw du rau hkrum rau rai nga hkra nihtep hpu nau shada garum shingtau pawn ba la hkat nga ga ngu saw shaga ai.

“Anhte a masin salum hpe mung hkum shamat kau ga! Nu Maria kaw akyu hpyi htinglu htinglai ai hpe Nu Maria ninghkap ai galoi n na yu ai,” ngu ai sakse hkam ga hte Wa Sarabyin Francis shi a mungga hpe jahtum da ai.

By Fr. Patrick Gawmaw Hkawng Yae

#vaticanews

#rvakachinservice

https://www.vaticannews.va/en/pope/news/2021-12/pope-francis-angelus-solemnity-mary-immaculate-humility.html