Wa Sarabyin: Aten Shagu Sadi Maja Nga Let Akyu Hpyi Nga Mu

November 28, Du Sa Ladaw (1) ngu na laban shani, San Peter shawa pa hta, “Madu A Lamu Kasa Akyu Hpyi Ga” tsun ten, anhte a yup malap taw ai wenyi hpe jasu jahprang la lu na matu galoi mung maja let akyu hpyi shaja nga nna prat hta ahkyak dik htum hpe madung da sumru galaw sa wa ga, ngu saw shaga da nga ai.

Dai shani na chyum daw ni hpe sumru woi da let, Hkyela Madu du sa wa na hpang jahtum aten hta anhte hpe hkye la na matu Madu du sa wa ai re ai hpe myit mada kam sham let anhte prat hta hkrum sha nga ai tsin-yam tsin-dam ni a lapran kabu pyaw ai myit masin hte ala ding da nga ra ga ai lam sumru woi da nga ai.

Jan rai rawt tsap let nanhte a baw ni hpe sharawt da na matu Madu saw shaga nga ai. Hpa majaw nga yang hkye hkrang la lam gaw du wa magang ra ai,” ngu mung sadi maja nga na matu, Wa Sarabyin shadum da nga ai.

Aten shagu dum hprang let sadi maja nga nna akyu hpyi nga mu!

Lani hte lani hkrum ang ai tsin-yam tsin-dam ni hte nni nkri ni hpe hkam jan awng dang lu na matu anhte a hkye hkrang la na lam hta madung da hkawm sa nga ra ga ai lam, Madu Yesu hkum na a ga “akyu hpyi let maja nga mu” ngu tsun shadum da ai ga hpe mung madi madun da ya ai.

Ndai zawn sadi maja nga ai gaw Hkristan prat hta ahkyak madung zaw nan rai nga ai majaw anhte ni zet zet ja ja rai nga nna prat hta ahkyak ai lam hpe hkan shatup na myit maju galai kau ya ai lam ni hpe mung koi yen kau nga ga.

Hprang maja nga ai ngu ai lachyum gaw anhte a masin salum hpe lagawn lamawn ai lam byin shangun ai kaw nna makawp maga la ai hpe tsun ai rai nga ai. Yup yaw taw ai Hkristan ni gaw wenyi shamu shamawt lam hta n-gun yawm wa nna akyu hpyi maja nga na lam hta mung n-gun yawm wa ai.

Ndai masa hta naw sak hkrung nga ga ai rai yang, anhte a prat gaw matsan mayan naw rai nga ga ai. Anhte hta masan sa taw nga ai hta lai nna kaga lam ni yawng hpe malap mali di da ai mung tai nga ai, ngu Wa Sarabyin Francis shadum da nga ai.

Sa Rit, Madu E, Sa Rit!

Makoi magam taw ai ahkyak lami/ning-ip gaw dum hprang sadi maja let akyu hpyi ai lam rai nga ai. Akyu hpyi ga gaw anhte a masin salum hta galoi mung nhtoi jahtoi ya nga ai, Karai Kasang hpang de woi sa ya ai, wenyi yup malap taw nga ai kaw nna yup hprang shangun ya nna dai wenyi lam hpe ahkyak madung da sa wa na matu lam madun ya ai.

Anhte gaw akyu hpyi ga tsun na hpe galoi n mai koi yen da ai.

Ndai Du Sa Ladaw hta , shani shagu ”Sa Rit, Madu E, Sa Rit”  ngu akyu hpyi nga na matu saw shaga let Wa Sarabyin Francis, shi a mungga hpe jahtum da ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-11/pope-at-angelus-be-vigilant-and-pray-always.html