Wa Sarabyin: San Yawsep Gaw Lachyum Nga Ai Shinggyim Hku Hkau Lam Kasi Kamang Rai Nga Ai

November 24, bat masum ya shani, San Peter Shawa Pa hta, Hpung Shawa Masha ni hte hkrum shaga ai ten, San Yawsep a kasi kamang hpe hkan sa na matu Shawa masha ni hpe n-gun jaw saw shaga da ai lam Vatican Shiga Dap kaw nna ndau da ma ai.

San Luka hte San Mahte yan a Kabu Gara Shiga ni hpe lakap let, Wa Sarabyin Francis, San Yawsep hte Madu Yesu a lam hkaw tsun da ai.San Luka hta San Mahte, lahkawng yan gaw Madu Yesu a kawa  Yawsep hpe shinggyim hkum shan sai masa lam hku hkan nna daw ang ai lam hta grau ai ngu tsun da ma ai hpe Wa Sarabyin Francis madi madun da ai. San Yawsep gaw Madu Yesu a kawa (fully the father of Jesus) nan rai nga ai, ngu tsun da ai.

Shi a marang e, Madu Yesu, Karai Kasang hte shinggyim masha lapran tawn da ai Shi a ga shaka hte hkye hkrang la labau hpe jahpring ya ai.

Hkristu Hpe Daw Jau Ai Wa

San Yawsep gaw wuhpung wuhpung ni hta nau n dan dawng ai raitim, Karai Kasang a Hkye Hkrang La masin hta ahkyak kri madung kaw shang lawm ai wa rai nga ai, ngu San Mathe madun da ai hpe Wa Sarabyin Francis madi madun da ai.“San Yawsep gaw masha wuhpawng ni lapran Madu Yesu magam galaw ai mabyin labau ni hta n mu mada ga ai raitim, ra ahkyak ai hte hkyak hkyak ra kadawn ai lam ni hta shang lawm ap nawng garum ya nga ai wa rai nga ai, ngu mung Wa Sarabyin Francis matut madi madun da ai.

San Yawsep gaw kadai n dum ai, n mu mada ai, makoi magap taw ai, magam lam hte yak hkak ai masa lam ni hta ahkyak ai lami laman hku shang lawm nga ai hpe, sumru ai ni kadai mung mu lu na ra ai ngu mung Wa Sarabyin madi madun da ai.

Ndai mungkan hta mung San Yawsep zawn rai nna, n mu mada lu ai, makoi magap taw ai shara kaw ahkyak ai magam ni hta ap nawng nga ai ni law law nga ma ai rai nna, anhte a mungkan gaw dai zawn re ai num la ni yawng hpe ra kadawn nga ai, ngu mung shadum jahprang saw shaga da ai.

Hkye Hkrang La WA hpe makawp maga bau sin ai wa

San Luka gaw San Yawsep hpe Yesu, Maria yan nu hpe makawp maga bau sin ai wa rai nga ai, ngu ndau da ai hpe mung Wa Sarabyin madi madun da ai. Nawku Hpung labau hta mung San Yawsep gaw Nawku Hpung hpe bau sin makawp maga ai wa mung Wa Sarabyin tsn dan da ai.

Ga Shaka Dingsa Chyum Laika hta na Ca-in gaw shi a kanau Abela hpe sat kau ai hpang “Ngai gaw nye a kanau hpe hkan lakawn ai wa zawn nawn a ni?” ngu Karai Kasang hpe bai htan ai. San Yawsep gaw Karai Kasang hpe Ka-in zawn n htan ai. San Yawsep gaw hpu nau ni hte nau na ni hpe gara hku bau sin makawp maga ra ai hpe kasi kamang tai ya ai, lam madun ya ai.

San Yawsep gaw anhte yau mat chye ai, hkam sha lawan ai wuhpung wuhpawng ni gara hku hku hkau kanawn mazum ra ai hpe lam matsun ya ai wa rai nga ai, ngu mung Wa Sarabyin madi madun da ai.

Kabu Gara Shiga Chyum laika hta tsun ai Madu Yesu hte seng ai shinggyim aru arat, ahti labau gaw anhte a prat hte gara hku shangang shakang nna matut manoi, manang tai ya nga ai hpe shalen ya ai. Karai a Kasha gaw ndai yaw shada lam a majaw ndai mungkan ga de du sa nna ga shaka tawn da ai.

San Yawsep gaw yak hkak jam jau ai lam ni hta garum shingtau ya ai dawhpum rai nga ai

Hpang jahtum mungga hta San Yawsep gaw yak hkak jam jau ai lam magup hta garum shingtau ya ai, anhte hpe manang tai ya let garum ya nga ai, ngu Wa Sarabyn Francis tsun dan da ai.

Wa Sarabyin Francis gaw anhte yawng a matu, San Yawsep kaw mung ndai hku akyu hpyi htinglu htinlai da ya nga ai.

San Yawsep e,

Nang gaw Yesu, Maria yan nu hpe bau sin makawp maga ya ai wa rai ndai.

Anhte prat hta shada hku hkau na lam woi garum ya rit.

Kadai mung shingtai kau da n hkrum u ga,

Anhte marai hkum shagu a labau hta pri nem htingram lam galaw sa wa lu u ga,

Shawng de galaw shut hpyit lai wa sai lam ni hpe bai n shut u ga,

Tsan tsan de shaden kau ya rit.

Nat sadan mung anhte a ntsa ga hkaw mi mung n tsun lu u ga,

Nang hte hku hkau mayu ai ni yawng hpe na kasi kaja madun dan rit.

Maria, Yesu shan nu yak hkak jam jau ten garum ya ai zawn,

Anhte a prat hkunlam hta mung garum shingtau la ya rit. Amen.

By Fr. Patrick Gawmaw Hkawng Yae

#vaticannew #rvakachinservice

Vatican News