Wa Sarabyin: Laban Missa Hta, “Daini Na Tsinyam Tsindam Ana Hpe Tsi Tsi Shamai Hkam La Ai Gaw, Hpawtni Na Myit Mada Shara Hpe Gaw De Da Ai Tai Nga Ai”

November 14, Laban shani, Vatican, San Peter Nawku Htingnu Kaba hta, Wa Sarabyin Francis, “matsan mayan ni a nhtoi masat dingsat” Missa Hkungga hpe nawng jau woi lai wa ai hta “Daini na aten na ana ni hpe tsi lajang sa wa ai gaw, hpawtni ngu ai shawng lam a matu myit mada shara hpe gaw de sa wa ai rai nga ai” ngu tsun da nga ai.

Dai laban shani hti ang ai Kabu Gara Shiga hta na, Masha Kasha du sa na hpe sadi maja let ala nga ai gaw daini na ana hpe tsi lajang ai lachyum rai nga ai hte hpawtni na myit mada shara hpe mung jaw ya nga ai, ngu ai lachyum mung rai nga ai.

Daini na nhtoi hta hkam sha nga ai “Ana”

Matsan mayan ni a tsinyam tsindam, nni nhkri nchyi nmu, jamjau jamhkau, aru ara hkrum sha ai, n tara ai ni a gumshen ai hpe hkrum sha ai zawn re ai lam kaw nna lawt lu na matu makawp maga la ya ra nga ai, ngu Wa Sarabyin Francis tsun da nga ai.

Hpawtni na “myit mada shara”

Tsinyam tsindam, nni nhkri, nchyi nmu, jamjau jamhkau, aru ara hkrum sha ai, n tara ai ni a gumshen ai hpe hkrum sha ai kaw nna hkap jan lu ai, lawt lu ai gaw hpawtni na myit mada shara kaba rai nga ai. Yesu Madu gaw anhte a masin salum chyinghka hpaw ya let myit mada shara kaba jaw ya mayu nga ai. Anhte a myit tsang ai, hkrit tsang ai kaw nna shalawt ya ai. “Hpawtni na myit mada shara gaw daini na hkam sha ra ai tsinyam tsindam ni hpe hkam jan lu na matu n-gun rai nga ai.

Anhte hpa galaw lu na rai?

Tsinyam tsindam, nni nhkri, nchyi nmu, jamjau jamhkau, aru ara hkrum sha ai, n tara ai ni a gumshen ai hpe hkrum sha ai lam ni a lapran myit mada shara ngu ai gaw Hkristan masha ni a matu ahkyak ai teng man lam jaw ai gaw hpa rai ta?

Anhte gaw hpawtni na myit mada shara gaw daini na tsinyam tsindam, nni nhkri, nchyi nmu, jamjau jamhkau, aru ara hkrum sha ai, n tara ai lam ni hpe hkam jan lu na lam jaw ya ai hte tsi tsi shamai ya lu ai.

Anhte a myit mada ai lam hpe rau jawm gaw de sa wa ra ai.

Myit mada shara hpe gaw, si mani ai sat lawat hte matsan dum lama, lanu lahku la ai a marang e pu tsawm shangun ya ai. Tsun mayu ai gaw matsan mayan ni a myit mada shara hpe jaw ya lu ai rai nga ai. Matsan mayan ni hpe lu sha jaw ai, bu na hpun na, tsi tsi na, hte kaga ra kadawn ai lam ni hta garum ya ai, shanhte a matu tara ai lam hpe hpaw ya ai, shanhte hpe gaw sharawt ya ai, shanhte a sari manu hpe shatsaw sharawt ya ai lam ni gaw anhte ni yawng galaw ra ai magam rai nga ai.

Madu Yesu gaw shanhte hta anhte hpe ala dingda nga ai, ngu Wa Sarabyin Francis, laban shani, Missa Hkungga nawng jau ai hta, mungga shaga da ai hpe Vatican Shiga Dap kaw nna ndau da ma ai.

By Fr. Patrick Gawmaw Hkawng Yae

#vaticannews

#rvakachinservice

https://www.vaticannews.va/en/pope/news/2021-11/pope-nurture-tomorrow-s-hope-by-healing-today-s-pain.html