San Pra ai Saradaw Aloysius Versiglia hte Jau Callistus Caravarioa Yen a Poi Nhtoi (November 13)

San Pra ai Saradaw Aloysius Versiglia gaw, Italy Mungdan, Pavia Ginwang, Oliva Gessi mare kaw, lai wa sai 1873 ning, June shata (5) ya shani, shangai chyinghkai wa ai rai nga ai. Shi a asak (12) ning hta Vadocco Jau tai jawng de shang mat wa ai. Dai shara kaw, San Pra ai Don Bosco hte chye chyap la lu nu ai.

1895 ning hta, Jau tai wa nna, Genzano mare na, Jau tai jawngma ni hpe yu lai wa sai. Salesian Sasana magam gun wuhpung ni, Miwa mungdan de shang nna lang sa du mara ai hta mung ningbaw magam gun hpai lai wa sai rai nga ai. Shanhte gaw, 1906 ning hya Miwa Mungdang, Shiu Chou mare hta, jawng hpaw la lu masai. Dai hpang (15) ning ngu na, 1924 ning, January shata (9) ya shani hta Shi, Saradaw tai wa sai rai nga ai.

San Pra ai Jau Callistus Caravari gaw, Italy Mungdan, Turin ginwang na, Courgne mare hta, lai wa sai 1903 ning, June shata (8) ya shani shangai chyinghkai wa ai rai nga ai. Shi mung, Saradaw Aloysius hte maren Valdocco Jau tai jawng kaw laika hpaji sharin lai wa sai. 1924 ning, Miwa mungdan de sasana maden je sa wa ai kaw shi mung lawm sa wa ai; shi gaw, Saradaw Aloysius Versiglia kaw na Jau tai Sakramentu hkam la lai wa ai. Dai hpang Shiu Chou Saradaw ginwang kaw Saradaw a malai Jau kaba, Vicariate aya dang da hkrum wu ai.

Saradaw Aloysius hte Jau Callistus yen gaw, Miwa amyu shayi masum a asak lawt lam hte hkawnsek prat hpe makawp maga ya ai majaw, Lin Chou hka kau na Li Htau ngu ai shara hta, 1930 ning, February shata (25) ya shani e sat kau hkrum masai. Ndai zawn Saradaw hte Jau gaw, tara a majaw sat kau hkrum ai mabyin lam hpe, Roma mare Nawku Hpung a ginjaw kaw na, San Pra ai Masha Masat Shagrau ai Wuhpung, Congregation of Causes of Saints gaw, 1976 ning, November shata (12) ya shani madi shadaw masat shagrin dat ya sai rai nga ai.

Dai hpang, 1983 ning, May shata (15) ya shani, dai aten na, San Pra ai Wa Sarabyin Yawhan Pawlu (II) gaw, Wa Saradaw hte Wa Jau yen hpe Alu ai jahpan kaw shalawm masat shagrau dat sai rai nga ai.

Dai hpang, 2000 ning, October shata praw (1) ya shani gaw, San Pra ai Wa Sarabyin Yawhan Pawlu (II) sha, Saradaw Aloysius hte Jau Callistus yen hpe San Pra ai masha ngu dang dat let, shan lahkawng a poi hpe November shata (13) ya shani ngu masat shagrau dat ya sai rai nga ai.

Wa Saradaw hte Wa Jau a labau kadun hpe hti hkaja la let, tinang makau grup yin hta lata tut hta garum shingtau la na ni hpe n hkrit n kang ai lawan ladan garum la lu na atsam jaw ya rit ga matu, Karai Kasang Wa kaw akyu hpyi la nga ga law.

By;
Sister Rose Angeline Maran Nang Doi (SFX)
RVA-Kachin Service (Myitkyina)