San Pra ai Josaphat a Poi Nhtoi (November 12)

San Pra ai Josaphat gaw, “Hkristian Hpung shagu myit hkrum myit ra lam hte seng nna kam hpa lu ai San Pra ai Masha” rai nga ai. Shi gaw, 1580 ning hta, Ukrian Mungdan kaw shangai wa ai rai nga ai.

Vilna mare kaw, shi amu galaw nga ai aten hta shi a Lauban wa gaw, shi hte rau arang shapraw nna amu galaw na matu, shi a ma num kasha ni kaw na shi ra ai langai ngai hpe jaw sha na, nga nna bawng wu ai. Raitimung, shi gaw, Tawra Jau tai na matu myit daw dan da sai hte maren, lauban wa a bawng ban ai lam hpe myit n hkrum lawm ai. Dai majaw, 1604 ning hta, shi gaw Vilna mare kaw na, San Pra ai Trinita Jau tai jawng de shang mat wa nu ai.

Jau tai wa ai shaloi mung, n dan n dawng ai hku nga na matu tara shaku tai. Kahtawlik Nawku Hpung hte Orthodox Nawku Hpung hpe myit mang langai sha tai na matu shadut shadum ya ai. 1617 ning hta, Jau Josaphat gaw, Polotsk mare kaw na, Saradaw tai wa sai. Shi gaw tara ga sharin ai laika buk nnan shapraw ai hte Jau ni a nga sat nga sa lam hpe gram hpajang ai amu ni hpe madung tawn galaw lai wa ai. Sinpraw dan na, Orthodox hpung a hkansa tara “Eastern Canon Law” gaw dinghku de sai wa hpe Jau aya hkam ya lu nga ma ai.

Ndai lam hte seng nna, Saradaw Josaphat gaw, dinghku n de ai sha Jau tai na matu shadut ai majaw, shi a matsun sharin ai lam ni grai awng dang wu ai. Dai majaw, Orthodox hpung masha ni shi hpe grai n ju ma ai. Saradaw Josaphat hpe mung, “Wenyi Lagut” nga nna jahpoi asawng lai wa ma ai. San Pra ai Josaphat chyawm gaw, “Roma Nawku Hpung hte Langai sha byin wa ra ai lit hte San Petru a ahkang aya gaw yawng a matu langai sha rai nga ai” nga ai myit jasat rawng ai majaw, “Ngai gaw, asak si hkam na matu jin jin rai nga n ngai” nga nna mahtai bai jaw dat wu ai.

1623 ning, November shata (12) ya jahpawt, San Pra ai Josaphat gaw, akyu hpyi na matu nawku jawng de sa wa ai shaloi, n hkru n kaja ai ni gaw shi hpe lam kaw rim la n htawm sinat hte gap sat kau ma ai.

Shi n nga mat ai hpang, shi hpe san Pra ai masha hku nna masat dat let, shi a Poi nhtoi hpe November shata (12) ya shani hta ding yang galaw ya ai rai nga ai.

Anhte mung, San Pra ai Josaphat a labau hpe hti hkaja la let, manaw manang ni hpa mi sa tsun tim, Karai Kasang Wa anhte hpe gara masa hte shaga la nga ai ngu ai hpe sha sawn sumru dinglik yu nna, matut sak hkrung hkawm sa nga ga law.

By;
Sister Rose Angeline Maran Nang Doi (SFX)
RVA-Kachin Service (Myitkyina)