"Lak Nak Galaw Shapraw Ai Lam Jahkring Kau Saga" Nga Nna Wa Sarabyin Tsun

Wa Sara Byin Francis gaw Hpyen Lup Wa Langai De Du Ai Shaloi Lak Nak Galaw Shapraw Ai Lam Jahkring Kau Ga nga nna tsun dat nga ai.

2021 November praw 2 ya, All Souls Day shani Roma Mare na majan a majaw hkrat sum mat ai hpyen la ni hpe lup makoi ai Hpransit  (Pyin Thit) hpyen lup wa langai de sa du gawan ai shaloi dai hku tsun dat ai rai nga ai.

"Majan gaw Mung dan a kashu kasha ni hpe  ma-ut kau ai, dai majaw laknak shapraw ai lam jahkring kau ga" nga nna lak nak galaw ai ni hpe sha-ang let tsun shadut dat ai lam rai nga ai.

Wa Sarabyin sa du ai shara gaw lai wa sai numbat lahkawng Mungkan majan hta hkrat sum mat wa sai  Hpransit hte Moroco hpyen la 1900 hpe lup da ai shara rai nga ai. Wa Sarabyin gaw laning mi hta kalang Kahtawlik Nawku Hpung kawn si ai ni a Wenyi a matu akyu hpyi ya ai poi nhtoi ‘All Souls Day” shani dai zawn lup de sa nna numri pan ahpraw hpe  lup grawng langai ngai kaw mara tawn nna laksan akyu hpyi ya ai lam galaw law re ai rai nga ai.

Si mat wa ai wa mying  hkrak rai nka da ai Lup grawng ntsa na matsing laika hpe hti  yu nna "Mungkan ga ntsa shan hte a mying ni n nga sai raitim, Karai Kasang a man hta anhte  yawng nga nga ga ai re, n dai gaw majan a majaw hkam sha ra ai yawn hkyen lam rai nga ai, majan n nga hkra anhte ni kade ram shakut nga ga ai kun, laknak htuk shapraw ai lam n galaw yang dai Mungdan a sut masa n-gun kaba wa na lam nnga sai kun ? nga nna Wa Sarabyin tsun lai wa ai.

Bai Wa Sarabyin Francis gaw dai shani na Mungga hta, “tinang Mungdan hpe makawp maga na matu asak ap nawng mat wa ai gaw yaw shada lam kaja rai nga ai, dai majaw shan hte ni yawng gaw Kasang hte rau rai nga na hpe hkrak nan kam nngai" nga nna Wa Sarabyin Mungga htawn tsun lai wa ai lam chye lu ai.

Wa Sarabyin gaw Mungkan Mungdan ni yawng hpe laknak dawm kau nna simsa lam gawde na  hpe galoi mung tsun shadut nga ai rai nna, tinang a Mungdaw  Mungdan hpe maga ya na arai laknak hku tawn da ai raitim kapaw wa jang makawp ninghkap na ladat  nnga ai hkrit tsang hpa Nuclear bawm hpe Mungkan ting ban shingdang kau na matu galoi mung tsun shadut nga ai lam Reuters shiga dap kaw shana dat ma ai.

Source : Reuters